Litva praciahnie abmiežavańni dla biełarusaŭ da 2026 hoda
Litva płanuje praciahnuć nacyjanalnyja sankcyi suprać rasijan i biełarusaŭ jašče na hod, pakolki Rasija praciahvaje vajnu va Ukrainie. Heta praduhledžana papraŭkaj da zakona, raspracavanaj Ministerstvam zamiežnych spraŭ, paviedamlaje LRT.
23.12.2024 / 15:19
Zakon ab abmiežavalnych mierach u suviazi z vajennaj ahresijaj suprać Ukrainy, abnoŭleny ŭ hetym hodzie, dziejničaje da 3 maja 2025 hoda. MZS prapanuje praciahnuć jaho dziejańnie da 2 maja 2026 hoda.
«Poŭnamaštabnaja vajna, raźviazanaja Rasijskaj Fiederacyjaj suprać Ukrainy 24 lutaha 2022 hoda, praciahvajecca i ciapier, tamu pryčyny, pa jakich byŭ pryniaty zakon, nie źnikli. Dziejańni Rasijskaj Fiederacyi akazvajuć istotny niehatyŭny ŭpłyŭ nie tolki na biaśpieku krain-členaŭ Jeŭrapiejskaha sajuza i NATO, ale i na biaśpieku Jeŭropy ŭ cełym», — havorycca ŭ tłumačalnaj zapiscy da zakonaprajekta.
Što tyčycca samich abmiežavalnych mier dla hramadzian Rasii i Biełarusi, źmianieńniaŭ nie prapanujecca.
U intervju BNS śpikier Siejma Saŭlus Skviarnialis nie vyklučyŭ, što abmiežavalnyja miery mohuć być uzmocnieny.
«Ja nie sumniavajusia, što my sutykniemsia ź vialikimi vyklikami paśla taho pracesu, jaki budzie nazyvacca vybarami ŭ Biełarusi. Pytańnie sankcyj i maštabaŭ sankcyj, asabliva ŭ dačynieńni da Biełarusi, chutčej za ŭsio, źmienicca, ale nie ŭ bok pasłableńnia. Havorka idzie pra pahrozu našaj nacyjanalnaj biaśpiecy», — śćviardžaje jon.
«Usie hetyja abmiežavańni pavinny być razumnymi, nie pavinny parušać intaresy tych ludziej, jakich my sami zaprasili ŭ Litvu i dali mahčymaść časova žyć tut, ale ŭsio pavinna razhladacca praz pryzmu biaśpieki», — skazaŭ kiraŭnik parłamienta ahienctvu BNS.