Экс-прэзідэнта ЗША Біла Клінтана шпіталізавалі ў Вашынгтоне
Біл Клінтан, 78-гадовы былы прэзідэнт ЗША, які на працягу многіх гадоў сутыкаўся з шэрагам праблем са здароўем, быў шпіталізаваны ў панядзелак у Вашынгтоне пасля павышэння тэмпературы, паведамілі ў яго офісе, піша «Голас Амерыкі».
24.12.2024 / 07:41
Біл Клінтан. Фота: AP
«Прэзідэнт Клінтан быў шпіталізаваны сёння днём (у панядзелак) у медыцынскі цэнтр Джорджтаўнскага ўніверсітэта для правядзення абследавання і назірання пасля павышэння тэмпературы», — напісаў намеснік кіраўніка апарата 78-гадовага палітыка Анхель Урэнья ў сацыяльнай сетцы X, дадаўшы, што Клінтан «захоўвае бадзёры настрой».
Раней, у кастрычніку 2021 года, Клінтан правёў пяць начэй у бальніцы з-за заражэння крыві.
У 2004 годзе, ва ўзросце 58 гадоў, ён перанёс аперацыю па шунтаванні чатырох каранарных артэрый пасля таго, як дактары выявілі прыкметы шырокага сардэчна-сасудзістага захворвання. Праз шэсць гадоў яму былі пастаўленыя стэнты ў каранарнай артэрыі. Гэты выпадак са здароўем заахвоціў Клінтана змяніць лад жыцця, у тым ліку перайсці на вегетарыянскую дыету, і з тых часоў ён не раз публічна распавядаў пра сваё здароўе.
Апошні раз здароўе Клінтана прыцягвала ўвагу СМІ ў лістападзе 2022 года, калі ён здаў станоўчы тэст на Covid-19. Тады ён паведаміў, што сімптомы былі «слабымі» і ён быў «удзячны за вакцынацыю і бустарную дозу».
Клінтан, які займаў пасаду прэзідэнта два тэрміны з 1993 па 2001 год, з'яўляецца другім самым маладым з былых прэзідэнтаў ЗША пасля 63-гадовага Барака Абамы.
Ён нарадзіўся ўсяго на некалькі месяцаў пазней іншага былога прэзідэнта Джорджа Буша-малодшага і абранага прэзідэнта Дональда Трампа.
Нягледзячы на тое, што яго паспяховае прэзідэнцтва было азмрочана скандаламі, у апошнія два дзесяцігоддзі ён прысвяціў сябе дыпламатычным і гуманітарным справам, дасягнуўшы значных поспехаў у гэтых галінах.