Расійскія дыпламаты ў Аргенціне былі заспеты п'янымі і хаваліся ў машынах ад паліцыі і прэсы. Гэта трапіла ў жывы эфір
Кіраўніку мясцовага «Рускага дому» і яшчэ аднаму супрацоўніку расійскага пасольства ў Аргенціне не пашанцавала. Абодва ехалі п'янымі ў сваіх аўто і амаль адначасова на адной і той жа вуліцы нарваліся на паліцыю і прэсу, якія ў той момант ладзілі ў жывым эфіры паказальныя рэйды супраць п'яных кіроўцаў. Дыпламаты адмовіліся здаваць алкатэсты і заперліся ў машынах на вачах у мільёнаў гледачоў. Гісторыя на гэтым не скончылася.
26.12.2024 / 19:33
Расійскі дыпламат Сяргей Балдзін (зверху) і адзін з кіраўнікоў «Рускага дому» ў Аргенціне Цімур Саламацін (знізу) былі заспеты за п'яным ваджэннем на адной з вуліц аргенцінскай сталіцы Буэнас-Айрэс. Кадры з жывых эфіраў аргенцінскіх медыя
Два супрацоўнікі расійскага пасольства ў Аргенціне па чарзе адмовіліся выходзіць з аўтамабіляў на патрабаванне мясцовай паліцыі і праходзіць тэст на алкаголь. Адзін дыпламат, настойліва адмаўляючыся ад алкатэсту, прасядзеў у замкнёнай машыне каля гадзіны, другі — тры гадзіны, паведамляюць аргенцінскія выданні Clarin і Pagina 12.
Паліцыя ў аргенцінскай сталіцы Буэнас-Айрэс сумесна з журналістамі шэрагу мясцовых тэлеканалаў з мільённымі аўдыторыямі традыцыйна пасля каляднай ночы праводзяць прафілактычныя і паказальныя рэйды з мэтай выявіць і публічна прысароміць п'яных кіроўцаў.
Як адзначаюць медыя, проста ў разгар такіх рэйдаў на наступную раніцу пасля каталіцкага Раства на адной і той жа вуліцы з розніцай у дзве гадзіны апынуліся два аўтамабілі з расійскімі дыпнумарамі, чые кіроўцы дэманстравалі прыкметы п'янага ваджэння, за што былі спынены паліцыянтамі.
Першы з іх — расійскі дыпламат Сяргей Балдзін — у адказ на патрабаванне выйсці з машыны і прайсці алкатэст сказаў, «што яму трэба патэлефанаваць», падняў акно і перастаў размаўляць з паліцыяй, прасядзеўшы ў зачыненым аўтамабілі каля трох гадзін. Але і зрушыць машыну з месца ён таксама не змог, бо паліцыя заблакавала яе з двух бакоў.
Пакуль паліцыя і прэса здымалі на камеры забарыкадаванага Балдзіна, на той жа вуліцы праз дзве гадзіны апынуўся ўжо Цімур Саламацін — адзін з кіраўнікоў мясцовага «Рускага дому» — які таксама падаваў выгляд п'янага кіроўцы. Ён пагадзіўся паказаць паліцыянтам свае дакументы, але адмовіўся пакідаць машыну і праходзіць тэст на алкаголь, прасядзеўшы ў аўто каля гадзіны, адзначаюць аргенцінскія медыя.
Сяргей Балдзін падчас паліцэйскага рэйду супраць п'яных кіроўцаў. Фота: Luciano Thieberger / Clarin
Цімур Саламацін у атачэнні аргенцінскай паліцыі і прэсы. Фота: Maxi Failla / Clarin
Неўзабаве прыбылі федэральныя паліцыянты, а таксама некалькі мужчын у белых кашулях, якія прадставіліся супрацоўнікамі расійскага пасольства ў Буэнас-Айрэс. На набліжэнне прэсы яны рэагавалі агрэсіўна, распавялі аргенцінскія медыя.
Мужчыны падышлі да аўтамабіляў з забарыкадаванымі кіроўцамі і ў выніку змаглі дамовіцца з федэральнымі паліцыянтамі аб іх вызваленні, паставіўшы абодва аўтамабілі на стаянку расійскага пасольства. Вызваленыя дыпламаты паабяцалі паліцыі здаць алкатэст ужо на тэрыторыі дыппрадстаўніцтва. Ці здалі яны яго ў выніку — журналістам невядома, адзначаюць мясцовыя тэлеканалы.
Пазней, як распавядаюць аргенцінскія медыя, з будынка пасольства выйшаў яшчэ адзін прадстаўнік расійскай дыпмісіі, які заявіў журналістам, што забарыкадаваныя кіроўцы «паступілі правільна, бо, згодна з Венскай канвенцыяй, дыпламатаў нельга затрымліваць і аглядаць». Ён адзначыў, што тое, што адбылося, трэба разглядаць як «сур'ёзнае парушэнне міжнароднага права».
Аргенцінскія афіцыйныя асобы ў адказ патлумачылі журналістам і расійскаму боку, што менавіта паліцыянты дзейнічалі правільна, паколькі, згодна з артыкулам 41 той жа Венскай канвенцыі, дыпламаты абавязаны выконваць законы той краіны, у якой знаходзяцца.
Аргенцінскі цуд. Як Мілей утаймаваў інфляцыю менш чым за год
На якіх умовах беларусы могуць атрымаць грамадзянства Іспаніі, Партугаліі, Германіі і іншых краін