U Kijevie padčas rasijskaha abstrełu na Novy hod zahinuŭ viadomy niejrabijołah — razam z žonkaj i katom
Ranicaj 1 studzienia rasijskija vojski atakavali Kijeŭ udarnymi bieśpiłotnikami. Padčas hetaj ataki zahinuli muž i žonka — ukrainskija navukoŭcy Ihar Zima i Alesia Sakur.
02.01.2025 / 23:22
Ihar Zima. Fota: facebook.com/aleksei.bobrovnikov
Siamiejnaja para zahinuła razam z katom «prosta ŭ siabie doma ŭ łožku», paviedamiła ŭ sacsietkach ich znajomaja.
Navukoŭcy žyli ŭ stalincy ź viežaj nasuprać budynka Nacyjanalnaha banka.
Dom, u jakim žyli navukoŭcy Ihar Zima i Alesia Sakur
«Amal usio svajo žyćcio siamja addała navucy, šmat hadoŭ pracujučy ŭ Instytucie bijałohii i miedycyny Kijeŭskaha nacyjanalnaha ŭniviersiteta imia Tarasa Šaŭčenki», — raskazaŭ pra ich ministr adukacyi i navuki Aksen Lisavy.
Ihar Zima byŭ vybitnym niejrabijołaham. Jon vykładaŭ u Instytucie bijałohii i miedycyny Kijeŭskaha nacyjanalnaha ŭniviersiteta imia Tarasa Šaŭčenki i pracavaŭ u pryvatnym miedycynskim centry, jaki zajmajecca dyjahnostykaj i lačeńniem spadarožnych zachvorvańniaŭ u ludziej z aŭtyzmam i inšymi asablivaściami raźvićcia, piša Hromadske.
Jaho navukovy staž składaje bolš za 40 hadoŭ. Siarod jaho navukovych intaresaŭ — daśledavańnie miechanizmaŭ kahnityŭnaj dziejnaści mozhu čałavieka, emocyj, uvahi i sistem pryniaćcia rašeńniaŭ, elektrafizijałohija niejrasietak, niejrapsichałohija i h. d.
Alesia Sakur była doktaram bijałahičnych navuk, jak i muž.