Kadyraŭ prajhraŭ vajnu za Wildberries: rasijski sud pakinuŭ kampaniju za zasnavalnicaj
Kanflikt vakoł papularnaha markietplejsa ŭ vieraśni navat vyliŭsia ŭ pierastrełku ŭ centry Maskvy, a Kadyraŭ abviaščaŭ kreŭnuju pomstu deputatam i sienataru.
10.01.2025 / 15:03
Rasijski arbitražny sud pakinuŭ 99% kampanii Wildberries za zasnavalnicaj Taćcianaj Kim. Jaje były muž Uładzisłaŭ Bakalčuk prajhraŭ spravu i zastaŭsia pry svaim 1% kampanii.
Hučny biznes-kanflikt ciahnuŭsia ź leta 2024 hoda, kali Wildberries pačała źlićcio z apierataram vonkavaj rekłamy Russ Outdoor. Suprać źlićcia, uchvalenaha ŭ Kramli, vystupiŭ Uładzisłaŭ Bakalčuk, raspaviadaje «Možiem objaśniť».
Historyja pa časie supała z šlubarazvodnym pracesam Bakalčukoŭ. Eks-muž haspadyni nastojvaŭ, što dola vałodańnia Wildberries nie adlustroŭvała realnaha stanovišča spraŭ u kiraŭnictvie, usie klučavyja rašeńni prymaŭ mienavita Uładzisłaŭ, a ździełka z Russ Outdoor źviała ŭ jaho biznes. Dadaŭ emocyj i inšy fakt: Taćciana Kim syšła ad Bakalčuka da Levana Mirzajana — adnaho z dvuch bratoŭ, jakija kantralujuć Russ.
Bakalčuk paskardziŭsia svajmu zastupniku Ramzanu Kadyravu, jaki, pavodle infarmacyi rasijskich žurnalistaŭ, šmat hadoŭ «kryšavaŭ» Wildberries. Kadyraŭ pryniaŭ Bakalčuka, nazvaŭ uhodu «rejdarskim zachopam» i paabiacaŭ dapamahčy «zachavać siamju».
Kanflikt u vieraśni vyliŭsia ŭ pierastrełku ŭ ofisie kampanii ŭ centry Maskvy niedaloka ad Kramla. U pierastrełcy ŭdzielničali kadyraŭcy, jakija sutyknulisia z achovaj z uradžencaŭ Inhušecii i byli aryštavanyja SK. Kadyraŭ u adkaz abviaściŭ kroŭnuju pomstu dvum deputatam-adzinarosam Dziarždumy z kaŭkazskich respublik i sienataru Sulejmanu Kierymavu. Paźniej Kadyraŭ zajaviŭ, što kiraŭnik SK Bastrykin pavinien syści ŭ adstaŭku.
U śniežni ŭ Maskvie Kadyraŭ sustreŭsia z kiraŭnikom administracyi Pucina Antonam Vajno, jaki kuryravaŭ pytańnie Wildberries. Adnak sustrečy z Pucinym kiraŭnik Čačni nie ŭdastoiŭsia. Pry hetym «Novaja hazieta. Jeŭropa» sa spasyłkaj na krynicy paviedamlała, što Kadyraŭ nibyta damohsia «adstupnych».
Sud pastaviŭ kropku ŭ hetym kanflikcie. Hałoŭnym bienificyjaram abjadnanaj kampanii stanie Sulejman Kierymaŭ.