Tyktok u zachapleńni ad pracavitaści hetaha biełarusa: dva hady jon biŭsia nad tym, kab vyvieści idealnuju «sałodkuju bulbu»
Źmicier jašče ŭ 2021 hodzie zadumaŭsia pra toje, kab samomu pačać vyroščvać batat, bo byŭ niezadavoleny cenami i maleńkim vybaram u kramach.
10.01.2025 / 16:55
Ciaham dvuch hadoŭ jon raźbiraŭsia ŭ mietodycy i niuansach vyroščvańnia hetaj harodniny ŭ Biełarusi, i tolki ciapier dasiahnuŭ žadanych vynikaŭ — mužčyna vyraściŭ takuju kolkaść batatu, što jaho moža pakaštavać kožny achvotny. Na vybar prapanujecca ažno 10 sartoŭ!
U kamientarach pad jaho historyjaj u tyktoku, jakuju pahladzieła amal 700 tysiač čałaviek, ludzi zachaplajucca pracavitaściu biełarusa.
«Pavažaju metanakiravanaść takich ludziej — łajk», «Jakija vy małajcy, biełarusy!», «Vy zasłuhoŭvajecie pavahi, heta ciažkaja praca!», «Takija ludzi — honar našaj krainy!».
Vyjści na stabilny ŭradžaj Źmitru sapraŭdy dałosia niaprosta. Batat vielmi lubić ciapło, ziamla dla jaho pavinna być prahretaja minimum da 15-20 hradusaŭ. I zusim nie kožny sort uvohule pryžyŭsia b u Biełarusi. Usiaho ich, pa słovach mužčyny, u śviecie isnuje kala 700 vidaŭ, i tyja, što praraśli ŭ baćkoŭskaj vioscy ŭ Stolinskim rajonie, Źmicier vynajšaŭ šlacham ekśpierymientaŭ.
Pa svaich jakaściach batat bolš karysny za zvyčajnuju bulbu: u im mienš kałoryj i bolš vitaminaŭ i klatčatki. Niekatoryja biełarusy ŭ kamientarach adznačyli, što tolki dziakujučy fiermieru daviedalisia pra taki kłubniapłod i ciapier z zadavalnieńniem pakaštujuć.
Źmicier i jaho ŭradžaj. Fota: sacsietki Źmitra
Adno z aktualnych pytańniaŭ, jakoje zadali Źmitru, tyčyłasia taho, ci mahčyma z batatu pryhatavać draniki. Na što jon adkazaŭ śćviardžalna: «Jašče i jakija smačnyja!» Fiermier paabiacaŭ dzialicca karysnymi receptami ŭ siabie ŭ tyktoku. Pry hetym batat spakojna možna jeści syrym.
Błohiery pažyli va ŭsich pałacach i zamkach Biełarusi i skłali svoj rejtynh z cenami
Biełaruska zapisała tyktok pra viartańnie syna sa škoły — i sabrała 7 miljonaŭ prahladaŭ