Nieftyda, Ema Avital, Daniel Džydena, Lebron. Jakija niezvyčajnyja i kreatyŭnyja imiony davali minčuki ŭ minułym hodzie
Adny minčanie nazyvali dziaciej samymi papularnymi imionami, inšyja vybrali bolš redkija. Samyja kreatyŭnyja imiony 2024 hoda zapisała karespandentka Minsk-Navinaŭ.
11.01.2025 / 14:06
Dla dakładnaści byli apytany niekalki rajonnych adździełaŭ ZAHS stalicy. Cikavy momant: navat top-5 samych papularnych imionaŭ adroźnivajecca ad rajona da rajona. Sofji, Hanny i Jevy ŭpeŭniena trymajucca ŭ trojcy lidaraŭ, a voś astatnija dva miescy z roznym pośpiecham dzielać Maryi, Vasilisy, Alisy i Ksienii.
Siarod mužčynskich imionaŭ u trojcy lidaraŭ Michaił, Mark i Cimafiej. Piaciorku zamykajuć Maksimy, Ramany, Maćviei, Alaksandry, Ivany. Arciomy, jakija šmat hadoŭ zajmali pieršaje miesca pa papularnaści, krychu zdali pazicyi.
— U našym rajonie imia Arciom u 2024 hodzie na siomym miescy, — udakładniła načalnica adździeła ZAHS Frunzienskaha rajona Natalla Radźkova. — Na pieršym miescy Raman, zatym Michaił, Mark, Cimafiej, Maksim, Alaksandr.
Što da samych redkich imionaŭ, to ŭ Frunzienskim rajonie heta Braam Azryel, Daniel Džydena, Kaj Dzijanis, Hierald, Dyłan, Danisłaŭ.
Siarod niezvyčajnych žanočych imionaŭ 2024 hoda — Mišel-Mary, Ema Avital, Ester, Nieftyda, Alijana, Jeŭsievija, Darafieja, Łuna, Macijona, Hintare, Słaviana, Radmiła.
Uvohule pa Minsku za 2024 hod zarehistravany dziaŭčynki ź imionami Afina, Akulina, Ajpiery, Viendzi, Ivanna, Kaja, Chłoja i chłopčyki Alvijan, Biendžamin, Vinsient, Damijan, Lebron, Marsiel, Redžep, Taras, Ełan.
Žurnalisty spytali, ci byli ŭ minułym hodzie vypadki, kali baćkam admaŭlali ŭ rehistracyi taho ci inšaha imia?
— U 2024 hodzie takich vypadkaŭ nie było, ale niekalki hadoŭ tamu žančyna chacieła nazvać dzicia imiem, jakoje składajecca z čatyroch słoŭ, — adkazała N. Radźkova. — My zrabili zapyt u Instytut movaznaŭstva i atrymali tłumačeńnie, što tak nielha: ułasnaje imia pavinna ŭtrymlivać nie bolš za dva słovy. Sumnievaŭ i pytańniaŭ nakont prystojnaści abo miłahučnaści nie ŭźnikała.
Miłahučnaść — paniaćcie adnosnaje: toje, što adnym zdajecca śmiešnym i viasiołym, inšym moža zdavacca abraźlivym abo sumnym. U adździełach ZAHS źviarajucca sa «Słoŭnikam asabovych ułasnych imionaŭ».
Byŭ taksama vypadak, kali baćka zarehistravaŭ dzicia, a maci praź niejki čas pryjšła znoŭ, kab źmianić imia.
— Zhodna z zakanadaŭstvam, imia dziciaci možna źmianić na praciahu hoda paśla rehistracyi naradžeńnia, — udakładniła N. Radźkova. — Pry ŭmovie, što ŭłasnaje imia było dadziena biez uliku pažadańniaŭ adnaho z baćkoŭ — u situacyi, kali zajavu na rehistracyju pa tych ci inšych pryčynach padaje muž ci starejšyja svajaki — babula abo dzied. Dla hetaha nieabchodnyja pašparty baćkoŭ, paśviedčańnie ab naradžeńni dziciaci i paćviardžeńnie, što maci nie była zajaŭnicaj — heta budzie paznačana ŭ akcie rehistracyi.
U adździele ZAHS Leninskaha rajona stalicy ŭspomnili padobny vypadak, ale ź niekatorymi adroźnieńniami.
— Baćka chacieŭ nazvać Alaksandram, a maci — Mikałajem, — raspaviała načalnica adździeła Halina Šemiet. — U takich vypadkach my dajom čas padumać, panazirać za małym i jaho reakcyjaj na abodva varyjanty. Jak praviła, na praciahu 1—3 miesiacaŭ baćki prychodziać da kansensusu. U bolšaści vypadkaŭ vybar zastajecca za maci — baćki sastupajuć. Ale ŭ tym kankretnym vypadku ŭ siamji ŭsio ž taki źjaviŭsia Alaksandr — praź niekalki hadoŭ.
Ci časta ludzi źmianiajuć imiony va ŭrosłym uzroście?
— Da radykalnaha pierajmienavańnia źviartajucca redka, — adkazała H. Šemiet. — I niejkich krytyčnych vypadkaŭ dakładna nie było. Jak praviła, unosiać minimalnyja praŭki nakštałt Alena/Alona.
Adnak adno «ja tak chaču» dla pierajmienavańnia (jak i źmieny proźvišča ci imia pa baćku) niedastatkova.
— Naprykład, u čałavieka jość psieŭdanim, jakim jon padpisvaje svaje tvory, navukovyja pracy i inšaje, — pryvodzić prykład H. Šemiet. — Siarod pavažlivych pryčyn taksama miłahučnaść ułasnaha imia, jaho ciažkoje vymaŭleńnie. Ale farmat «Zavuć Milena, a chaču być Mašaj» u hety śpis nie ŭvachodzić.