Найгоршы спосаб захоўвання бананаў. Вось чаму яны так хутка чарнеюць
Бананы пачынаюць цямнець яшчэ да таго, як вы паспяваеце іх з’есці? Звярніце ўвагу на суседства з іншай садавіной.
12.01.2025 / 16:34
Фота: GGGLS / Wikimedia Commons.
Чаму бананы цямнеюць?
Як тлумачыць польскі партал Pysznosci.pl, бананы выдзяляюць этылен — газ, які паскарае працэс іх паспявання. Пад уздзеяннем этылену адбываецца распад хларафіла, што прыводзіць да змянення колеру скуркі з жоўтага на карычневы ці чорны. Гэта асабліва актуальна ў цёплых і вільготных умовах.
Калі бананы захоўваюцца побач з іншай садавінай, напрыклад, яблыкамі, якія таксама выдзяляюць этылен, працэс цямнення паскараецца. Дарэчы, калі захоўваць бананы ў халадзільніку, іх мякаць будзе даўжэй заставацца свежай, але скурка пацямнее хутчэй.
Захоўванне бананаў разам з яблыкамі — гэта даволі распаўсюджаная памылка. Фота: Hans Braxmeier / Wikimedia Commons
Дык як захоўваць бананы?
Вось некалькі простых правілаў, якія падоўжаць свежасць і прывабны выгляд вашых бананаў:
- Адмяжуйце іх ад іншай садавіны. Пакідайце бананы ў асобным месцы, далей ад яблыкаў, груш ці іншых «этыленавых суседзяў».
- Выбірайце сухое і прахалоднае месца, але не кладзіце ў халадзільнік, калі хочаце захаваць жоўты колер скуркі.
- Абматайце харчовай плёнкай месца злучэння бананаў у гронцы — гэта паменшыць выдзяленне этылену і запаволіць паспяванне.
- Падвесьце бананы. Калі ёсць магчымасць зачапіць іх за нешта, каб яны звісалі, гэта выдатна. Скурка бананаў не будзе дакранацца да паверхняў, і яны даўжэй захаваюць прывабны выгляд.
Напрыканцы варта нагадаць, што бананы — не толькі смачныя, але і вельмі карысныя. Яны багатыя на натуральныя цукры (глюкозу, фруктозу, сахарозу) і вугляводы, таму хутка насычаюць арганізм энергіяй, што робіць іх выдатным перакусам для актыўных людзей.
Венесуэльскі дашкольнік з апетытам есць банан. І правільна робіць: бананы сярод іншага спрыяюць выпрацоўцы «гармону шчасця». Фота: Bobjgalindo / Wikimedia Commons
Акрамя таго, бананы багатыя каліем, які падтрымлівае здароўе сардэчна-сасудзістай сістэмы, а таксама ўтрымліваюць трыптафан — амінакіслату, якая спрыяе выпрацоўцы «гармону шчасця» — сератаніну.