Мінскія кантралёры затрымалі ў 2024 годзе больш за 100 тысяч безбілетнікаў
Заведзена шэсць крымінальных спраў за напад на кантралёраў.
14.01.2025 / 08:29
За 2024 год у сталіцы больш за 100 тыс. безбілетных пасажыраў грамадскага транспарту атрымалі штрафы агульнай сумай больш за тры мільёны рублёў. Пра гэта Мінск-Навінам паведаміла прэс-сакратар «Мінсктранса» Алена Грамыка.
Па яе словах, далёка не ўсе пасажыры рэагавалі на адміністрацыйныя пратаколы адэкватна: за напады на кантралёраў заведзена шэсць крымінальных спраў паводле ч. 1 арт. 366 КК (гвалт альбо пагроза гвалтам у дачыненні да службовай асобы, якая выконвае службовыя абавязкі).
Пры гэтым кантралёры дакладна выконвалі сваю працу — згодна з заканадаўствам, безбілетны пасажыр не можа быць пакараны толькі папярэджаннем, ён абавязаны заплаціць штраф — ад 0,5 да 1 базавай велічыні. Цяпер гэта складае 21—42 рублі, прычым суму можна аплаціць як на месцы, так і пазней праз АРІП — на працягу месяца з дня выпіскі штрафу.
Як адзначыла Алена Грамыка, адказнасць за безбілетны праезд у гарадскім грамадскім транспарце наступае з 16 гадоў.
Прадстаўнік «Мінсктранса» таксама растлумачыла, ці абавязаны безбілетны пасажыр пасля атрымання штрафу пакінуць салон.
Па яе словах, гэтая працэдура не вызваляе ад аплаты праезду. І калі безбілетнік адмаўляецца аплачваць праезд, то кантралёр мае поўнае права запатрабаваць выйсці з транспартнага сродку на найбліжэйшым прыпынку.