«Ja adčuła palohku». Žonka eks-kalinoŭca Vieramiejčyka prakamientavała źliŭ pierapiski Kabančuka
Žonka Vasila Vieramiejčyka Jaŭhienija prakamientavała ŭ efiry «Biełsatu» źliŭ pierapiski pradstaŭnika Abjadnanaha pierachodnaha kabinieta ŭ spravie nacyjanalnaj biaśpieki Vadzima Kabančuka i raspaviała, što siońnia viadoma pra jaje muža.
14.01.2025 / 11:14
Jaŭhienija Vieramiejčyk upeŭnienaja, što byłoje kiraŭnictva i Vadzim Kabančuk zrabili ŭsio, kab Vieramiejčyku zabaranili ŭjezd va Ukrainu. Paśla jamu admovili va ŭjeździe ŭ Litvu, i ŭ vyniku jon byŭ z Vjetnamu pieradadzieny ŭładam Biełarusi.
«Ja adčuła palohku, — kamientuje źliŭ Jaŭhienija. — Tamu što toje, što my z Vasilom viedali albo zdahadvalisia na 99 %, stała viadoma publična. I ŭ nas źjavilisia farmalnyja dokazy, na padstavie jakich my možam źviartacca da asobaŭ, datyčnych da taho, što ŭ Vasila źjaviłasia zabarona na znachodžańnie va Ukrainie».
Paśla taho, jak listavańnie Kabančuka źjaviłasia ŭ siecivie, jon nie źviazvaŭsia ź Jaŭhienijaj, raspaviadaje jana.
«Ja pakinuła jamu kamientar pad dopisam u Facebook, na što jon mnie adkazaŭ, što jon nie vielmi razumieje, čamu ciapier varta ŭzdymać hetaje pytańnie, što z taho, što my ciapier źnimiem hetuju zabaronu [na ŭjezd. — Zaŭv. red.] ci nie. Ja hetuju razmovu ź im nie praciahvała ŭ sacyjalnych sietkach i źviarnułasia da žurnalistaŭ, bo chacieła, kab moj kamientar pačuła jak maha bolš ludziej», — praciahvaje Jaŭhienija.
Jana ličyć, što Vieramiejčyk paciarpieŭ padčas unutranaha kanfliktu i padziełu ŭłady ŭ pałku Kalinoŭskaha.
«My ciapier bačym, što Vasila skarystali dziela dasiahnieńnia metaŭ inšych ludziej. My viedali, što ŭ pałku adbyvajecca niejki padzieł uładaŭ. Treba razumieć, što kiraŭnictva pałka ciapier inšaje. To-bok, my kažam pra 2022 hod i pra tych ludziej, jakija byli ŭ kiraŭnictvie na toj čas.
Hetyja ludzi chacieli zachavać manapoliju nad biełaruskim rucham va Ukrainie. Jany nie žadali prysłuchoŭvacca, dzialicca hetaj uładaj i rabili ŭsio mahčymaje, kab nie pakidać pobač z saboj ludziej, jakija pretendavali na kiravańnie, na toje, kab vykazvać svaje dumki. Vasil ułasna taki čałaviek», — praciahvaje Jaŭhienija.
Ci sapraŭdy kanflikt moh być źviazany z Vadzimam Prakopjevym, jana nie viedaje.
«Možna skazać, što ŭ stanie jon narmalnym»
Što da Litvy, to vypadak ź Vieramiejčykam nie adziny taki ŭ dačynieńni biełarusaŭ. Jahonaja žonka ličyć, što zabarona na ŭjezd u JEZ i znachodžańnie ŭ Litvie mahli być pryniataja nie tolki praz toje, što Vieramiejčyk byŭ aficeram u biełaruskim vojsku, a i praz zabaronu Ukrainy.
«Pahladzieli, što čałavieku zabaronieny ŭjezd va Ukrainu — značyć, niešta tam nie čysta», — kaža Jaŭhienija.
Što ciapier adbyvajecca z Vasilom, amal nie viadoma.
«Usio što my viedajem, — heta toje, što jon u SIZA KDB. Ad jaho dajšła para listoŭ. Možna skazać, što ŭ stanie jon narmalnym. Bolš my ničoha nie viedajem. Nijakich padrabiaznaściaŭ kryminalnaj spravy, ničoha», — kaža Jaŭhienija Vieramiejčyk.
Treba pryznać pamyłku, kab dapamahčy Vieramiejčyku
Jaŭhienija padkreślivaje, što vielmi choča źviarnucca da Abjadnanaha pierachodnaha kabinietu, dzie ciapier Kabančuk, taksama da kiraŭnictva pałka Kalinoŭskaha i da samoha Kabančuka.
«Ja spadziajusia, što nas abjadnoŭvaje žadańnie bačyć volnuju Biełaruś, dzie buduć prajaŭlać pašanu da zakonaŭ i pravoŭ čałavieka, — kaža im Jaŭhienija. — Kali heta tak, to my musim nie zabyvać, što adna z najhałoŭniejšych kaštoŭnaściaŭ, što lažyć u asnovie kancepcyi pravoŭ čałavieka, — heta čałaviečaja hodnaść. I my musim pavažać čałaviečuju hodnaść, hodnaść Vasila.
My musim pryznavać jaho samadastatkovym čałaviekam i nie vykarystoŭvać u dasiahnieńni metaŭ inšych ludziej. My bačym, što zabarona na ŭjezd va Ukrainu stała vynikam nie niejkich asabistych učynkaŭ Vasila. A heta vynik padziełu ŭłady, žadańnia zachavać manapoliju na biełaruski ruch va Ukrainie. I ciapier my musim zrabić usio mahčymaje, kab ačyścić imia Vasila».
Kali ŭ kahości jość niejkija dokazy suprać Vieramiejčyka, to varta pakazać ich adkryta, padkreślivaje jahonaja žonka.
«Kali my imkniomsia ŭsie razam da Biełarusi, dzie budzie panavać prava, to, kali ŭ nas jość niejkija abvinavačvańni, heta ŭsio musić adbyvacca vielmi prazrysta. My nie karystajemsia svaimi suviaziami ŭ emihracyi, z SBU i inšaje. Kali ŭ vas jość niejkija abvinavačvańni, pakažycie ich, kali nie — pryznajcie, što vy zrabili pamyłku. I zrabicie ŭsio ad vas zaležnaje, kab hetu pamyłku vypravić».
Jana padkreślivaje, što ciapier idzie vialikaja i ciažkaja praca, skiravanaja na vyzvaleńnie jaje muža. Dziela hetaha treba ŭzajemadziejničać z roznymi arhanizacyjami i krainami, a zabarona na ŭjezd va Ukrainu vyklikaje ŭ ich šmat pytańniaŭ.
«Tamu, kab praciahvać hetuju spravu, kab kiejs z Vasilom vyhladaŭ bolš zrazumieła dla inšych arhanizacyjaŭ i krainaŭ, my musim skazać, što tak, zabarona była, ale heta była pamyłkovaja zabarona, i jana była źniataja. Dla nas [siamji Vasila] heta vielmi važna z usich pieraličanych punktaŭ hledžańnia», — padvodzić rysu Jaŭhienija.
Kabančuk admaŭlaje datyčnaść da spravy
Vadzim Kabančuk u razmovie z «Biełsatam» adznačaje, što ŭžo tłumačyŭ u sacsietkach, što nie maje dačynieńnia da zabarony na ŭjezd Vasila Vieramiejčyka va Ukrainu.
«Mnie było b dziŭna, kali b chtości ź biełarusaŭ mieŭ da hetaha dačynieńnie. Heta prerahatyva ŭkrainskich słužbaŭ», — kaža Kabančuk.
Što da padrabiaznaściaŭ źlivu i mahčymaj suviazi Vieramiejčyka z Prakopjevym, Kabančuk dadaŭ, što razmovy ŭ pytańniach biaśpieki išli nie tolki pra Vasila.
«Heta rabočy praces. Prosta vyrvali z kantekstu frazu proźvišča Vieramiejčyka i pryšyli da spravy pra zabaronu na jahony ŭjezd. Nakolki ja pamiataju, jon tady ŭspłyŭ uskosna, bo źjaviłasia dadatkovaja infarmacyja pra suviazi ludziej, jakija nas cikavili. I ŭ heta pole trapiŭ Vieramiejčyk», — adznačaje Kabančuk.
Jon dadaje, što nie viedaje, čamu Vasilu mahli zabaranić pryjazdžać va Ukrainu.
Biełaruskaha dobraachvotnika Vasila Vieramiejčyka zatrymali 13 listapada 2024 hoda ŭ Chanoi.
«Ničoha krytyčnaha tam nie zachoŭvaŭ». Kabančuk prakamientavaŭ uzłom svajho akaŭnta ŭ telehramie