«Pierahorniem staronku roznahałośsiaŭ». Što abiacaje Łukašenka ŭ svajoj pieradvybarčaj prahramie
Na 31-m hodzie praŭleńnia Alaksandr Łukašenka apublikavaŭ čarhovuju pieradvybarčuju prahramu. Jon havoryć, što ŭ 1994 hodzie krainie było praściej, čym ciapier, abiacaje nakiravać svaje namahańni na adnaŭleńnie dyjałohu z Zachadam, a taksama na naviadzieńnie mastoŭ unutry hramadstva. Biełaruś ža, azirnuŭšysia na vybary 2020 hoda, nazyvaje «krainaj, u jakoj chočacca žyć», «krainaj dla naroda».
14.01.2025 / 15:30
Mocna adfatašopleny partret Alaksandra Łukašenki, jakim supravadzili pieradvybarčuju prahramu
Łukašenka, padvodziačy vyniki minułych hadoŭ, kaža, što «my vyjšli bolš mocnymi z takich vyprabavańniaŭ, jak pandemija, biesprecedentnyja sankcyi, sproby raschistać nas znutry».
Ale ciapier — novyja vykliki: «Kali ŭ 1994-m była zadača advieści narod ad sacyjalna-ekanamičnaha krachu, dyk ciapier treba ŭtrymać śviet ad fatalnaj biezdani vajny». Łukašenka dadaje, što nielha dapuścić, kab biełarusy pamirali maładymi za čužyja intaresy. A hałoŭnuju zadaču bačyć u tym, kab zachavać Biełaruś «ustojlivaj i niezaležnaj».
Kab źbierahčy krainu, pavodle Łukašenki, patrebnaja mocnaja ŭłada. «Rola Prezidenta prymać stratehična vyvieranyja rašeńni», — piša jon.
Dla biaśpieki i niezaležnaści krainy nieabchodnaja mocnaja ekanomika. Dla hetaha «patrebny novyja technałohii, kankurentazdolnyja vytvorčaści, vysokaja jakaść, nulavaja biurakratyja i kančatkovaje vykaranieńnie karupcyi», — znoŭ źviartajecca kandydat da svajho tezisu pra karupcyju, jaki niekali i zrabiŭ jaho znakamitym.
Taksama Łukašenka abiacaje rehijonam — raŭnamiernaje raźvićcio; Uzbrojenym siłam — vytvorčaść pieradavoha ŭzbrajeńnia; sielskaj haspadarcy — vysokatechnałahičnaść i prestyžnaść; usim — debiurakratyzacyju, kožnamu — «usie nieabchodnyja ŭmovy dla taho, kab raźniavolić inicyjatyvu, dapamahčy vybudavać svoj žyćciovy šlach i samarealizavacca».
Uzamien Łukašenka patrabuje zhurtavanaści hramadstva i manalitnaści nacyi.
«Biełaruskaje hramadstva pavinna być adzinym. Z kim nie atrymlivajecca havaryć na adnoj movie, budziem naładžvać masty dla ŭzajemarazumieńnia. Dyjałoh, a nie raskoł; pošuk šlachoŭ da vybudoŭvańnia adnosin. Na sumlennych pryncypach pierahorniem staronku roznahałośsiaŭ», — abiacaje jon.
Łukašenka ŭ svajoj prahramie raskazvaje vybarcu, što ŭ krainu ŭžo viarnułasia hramadska-palityčnaja aktyŭnaść. «Sfarmiravanyja novyja kanały hramadska-palityčnaj aktyŭnaści, pierš za ŭsio Usiebiełaruski narodny schod, zabiaśpiečvajuć udzieł kožnaha ŭ pryniaćci dziaržaŭnych rašeńniaŭ, vykazvańni mierkavańnia», — kaža kandydat.
Łukašenka abiacaje «prahmatyčnuju źniešniuju palityku z akcentam na handlova-ekanamičnyja adnosiny».
Akramia praciahnieńnia kursu na pahłybleńnie stratehičnaha partniorstva z Rasijskaj Fiederacyjaj i Kitajskaj Narodnaj Respublikaj, jon abiacaje nakiravać «svaje namahańni na adnaŭleńnie dyjałohu z Zachadam i narmalizacyju adnosin z susiedziami, pierarvanych nie pa našaj vinie i nie pa našaj inicyjatyvie».
«Biełaruś dziaržava dla naroda, kraina, u jakoj chočacca žyć», — śćviardžaje Łukašenka.
«U asnovie ŭłady zaŭsiody była vola naroda, jaho patreby i hłybinnaja padtrymka», — zajaŭlaje jon.
«Pryvabnyja ŭmovy žyćcia hramadzian pavinny stać vizitnaj kartkaj Biełarusi», — dadaje jon.
I abviaščaje svaje abiacańni ŭ sacyjalnaj śfiery:
- zachavajem niaźmiennymi pryncypy sacyjalnaj palityki ŭ adukacyi i miedycynie, padtrymku maciarynstva, dziacinstva, pažyłych ludziej i ludziej z abmiežavanymi mahčymaściami;
- u najbližejšyja piać hadoŭ udaskanalim transpartnuju strukturu, jakuju majem, — vybudujem pramyja darožnyja źviazki «abłasny centr — rajonny centr — ahraharadok», adnovim bujnyja masty, palepšym stan asnoŭnych aŭtamabilnych arteryj krainy. Da kanca budučaj piacihodki pałova ŭsiaho darožnaha fondu budzie abnoŭlena i rekanstrujavana;
- zrobim žyllo dastupnym — zapuścim maštabnuju prahramu budaŭnictva arendnaha žylla ź pierśpiektyvaj jaho vykupu na pryvabnych umovach, zachavajem dziaržpadtrymku pry budaŭnictvie žylla dla šmatdzietnych siemjaŭ, dziaciej-sirot i inšych uraźlivych katehoryj hramadzian, jakim niama kamu dapamahčy;
- na ŭsioj terytoryi krainy pavysim jakaść mabilnaj suviazi i chutkaść internetu, najpierš za košt aktyŭnaha ŭkaranieńnia technałohii 5G.