U Kurskaj vobłaści zahinuŭ pieršy afrykanski najomnik, jaki vajavaŭ na baku Rasii
Jon naradziŭsia ŭ CAR, a zahinuŭ pad Sudžaj.
15.01.2025 / 11:27
15 listapada ŭ bajach za viosku Navaivanaŭku ŭ Sudžanskim rajonie Kurskaj vobłaści zahinuŭ hramadzianin Centralnaafrykanskaj Respubliki (CAR) Deryk Nhamana, jak vynikaje z dakumientaŭ, ź jakimi aznajomilisia Radyjo Svaboda i «Sistema».
Zhodna z paviedamleńniem ab śmierci, 32-hadovy najomnik vajavaŭ u składzie šturmavoj roty 155-j asobnaj hvardziejskaj bryhady marskoj piachoty Cichaakijanskaha fłotu. Hetaja bryhada paniesła značnyja straty ŭ bajach za Kurskuju vobłaść.
Hibiel Deryka Nhamany taksama paćvierdziła krynica, blizkaja da kamandavańnia marpiechaŭ.
Pa ich infarmacyi, u Kurskaj vobłaści moža vajavać «davoli šmat» afrykancaŭ, ale dakładnaja kolkaść nieviadomaja.
Deryk Nhamana — pieršy hramadzianin CAR, čyja asoba była ŭstanoŭlena siarod zahinułych u Kurskaj vobłaści. Raniej jon słužyŭ u Centralnaafrykanskich uzbrojenych siłach (FACA) u zvańni kaprała. Na sajcie AAN jość zdymak Nhamany 2018 hoda, na jakim jon padčas sumiesnaha patrulavańnia horada Banhasu ź miratvorcami AAN.
U 2023 hodzie Nhamana źviartaŭsia da siabra siamji i dypłamata CAR u Maskvie Forčuna Uanhapou pa dapamohu ŭ pastupleńni ŭ rasijski ŭniviersitet, ale tady ŭ jaho nie było srodkaŭ dla pajezdki ŭ Rasiju. Pra heta sam Uanhapou paviedamiŭ u Facebook. Rola dypłamata ŭ vierboŭcy Deryka Nhamany na vajnu nieviadomaja.
Małodšy brat Nhamany śćviardžaje, što toj zaklučyŭ kantrakt z rasijskaj armijaj i adpraviŭsia vajavać va Ukrainu ŭ vieraśni 2024 hoda. Pavodle jaho słoŭ, Nhamana kazaŭ, što takim čynam spadziavaŭsia «zabiaśpiečyć svaich dziaciej» i «zrabić dla ich lepšuju budučyniu».
Pra viarboŭku «maładych afrykancaŭ» na vajnu va Ukrainie ŭletku 2024 hoda pisała vydańnie Bloomberg.