Łukašenka ŭžo «pravioŭ» vybary i raspačaŭ novuju «bratniuju intehracyju»

U Karakasie ŭ jaho vyskačyła: prylaču jašče i naleta! Piša ŭ svaim błohu na NN Alaksandr Kłaskoŭski.

18.03.2010 / 14:41

Łukašenka ŭžo «zładziŭ» vybary. U Karakasie ŭ jaho vyskačyła: prylaču jašče i naleta! Miž tym aficyjoz rapartuje: u Vieniesuele padpisany až 22 pahadnieńni. Kłandajk!

Va ŭsiakim razie, «čornaje zołata» adtul sapraŭdy moža akazacca na vahu zołata. Ekśpierty łamajuć hałavu, sprabujučy sprahnazavać chitryja łahistyčnyja schiemy. Kažuć: mo' budzie niejki varyjant svopu — karaciej, fizična taja bahataja na sieru syravina (pad jakuju, darečy, nie prystasavany našy NPZ) da Biełarusi najchutčej što nie dajedzie.

Ale ž sa śviežych navin vynikaje, što paviazuć mienavita fizična, tankierami ŭ Adesu (heta jašče mudrej, čym u Kłajpiedu!), adtul — na Mazyrski NPZ. Praŭda,

havorka ŭžo tolki ab probnaj partyi ŭ traŭni. Dalej ža, padajecca, viłami pa akijanskaj vadzie pisana. Tak što ŭ hetym siužecie pra naftu ad Čaviesa, badaj, sapraŭdy bolej pijaru, čym navaru.

I kali tak, to Maskvu ŭjeli. Tamtejšyja miedyi strelili fryvolnymi zahałoŭkami kštałtu «Łukašenka zdradziŭ Pucinu z Čaviesam». Niejkaja vyčvarenskaja intehracyjnaja reŭnaść.

Analityki zvažajuć taksama na toje, što ŭ stasunkach Minska z Karakasam jość łatentnaja śfiera. Łukašenka paabiacaŭ Čaviesu dapamahčy stvaryć sistemnuju abaronu.

Biełaruski VPK sapraŭdy zdolny toje-sioje prapanavać — ad prycełaŭ dla «kałašoŭ» da aŭtamatyzavanych sistem kiravańnia supraćpavietranaj abaronaj dy avijacyjaj.

Mahčyma, za toje buduć značnyja źnižki na naftu. Čavies hulaje cenami. Kubie čornaje zołata, ličy, zadarma daje. «Vyspa svabody» raźličvajecca chiba pasłuhami svaich daktaroŭ — barter!

Zrešty, tyja

zbrojnyja ŭhody, jak i lubyja inšyja z Čaviesam, nadta ž chistkija.

Tak, rasijski vajskovy ekśpiert Alaksandr Holc, raspaviadajučy «Radyjo Svaboda» pra zbrojny handal svajoj krainy ź Vieniesuełaj, pa-pieršaje, padkreśliŭ, što «płanov-to było hromad́je», ale ž «apietyty spadara Čaviesa trochi źmienšylisia ŭ źviazku z padzieńniem cenaŭ na naftu». Zvyš taho, kaža Holc, «kali my pradajem zbroju takim režymam, jak Čaviesaŭ, to zaŭždy majecca niebiaśpieka, što nijakich hrošaj nazad my nie atrymajem».

Pavodle ekśpierta, schiema zakupki nastupnaja: Čavies adrazu hrošaj nie daje, tamu «rasijski ŭrad z rasijskaha ž biudžetu kredytuje pradpryjemstvy, što vyrablajuć hetyja ŭzbrajeńni». I tolki paśla pastaŭki druhi bok raźličvajecca. «A pakolki my majem spravu, miakka kažučy, ź impulsiŭnym lideram, jaki prymaje niečakanyja rašeńni», to, robić vysnovu analityk, «kožny raz hetyja kantrakty vyhladajuć trochi sumnieŭnymi».

A ciapier ekstrapalujem hetyja vysnovy na hrandyjoznyja płany supracy našaj krainy z ekstravahantnym zaakijanskim partnioram pad znajomymi da bolu falšyva-patetyčnymi łozunhami braterstva.

Ci nie zakapajuć biełarusy svaje hrošy ŭ basiejnie Arynoka, budujučy tam zavody, hazapravody, ahraharadki? Laśniecca zaŭtra tamtejšy režym ci prosta naftavyja ceny sadźmucca — i asta ła vista, bebi! Što z hołaha voźmieš?

Tak što kali ŭ čarhovaj «elehantnaj pieramozie» Łukašenka sumnievaŭ nie maje, to płany novaj «bratniaj intehracyi» nadta ž pryvidnyja.

Alaksandr Kłaskoŭski.