Ministr Martynaŭ pra vieniesuelskuju naftu: šmat zvonu!..

Kiraŭnik biełaruskaj dypłamatyi daŭ bliskučy adłup skieptykam što da čornaha zołata z-za akijana. Piša ŭ svaim błohu na NN Alaksandr Kłaskoŭski.

26.03.2010 / 15:04

Kiraŭnik biełaruskaj dypłamatyi daŭ bliskučy adłup skieptykam što da vieniesuelskaj nafty. U efiry ANT jon zaznačyŭ, što vakoł hetaha prajekta «šmat zvonu, darujcie za vyraz, u srodkach masavaj infarmacyi».

Zdavałasia: nu zaraz zreža niejkimi mahutnymi łahistyčnymi vykładkami! Adrazu raty pazačyniaje krytykanam.

Adnak dalej prahučała, što adlehłaść, košt frachtu i h.d. — «heta ŭsio jašče adkrytyja pytańni».

«Mienavita tamu aryjencirovačna ŭ mai budzie praviedziena pieršaja probnaja, praŭda, dastatkova bujnaja pastaŭka vieniesuelskaj nafty na našy naftapierapracoŭčyja pradpryjemstvy», — patłumačyŭ ministr.

I voś vam zabojčaje reziume na hruncie viadomaha vyrazu pra šampanskaje: «Jość peŭnaja ryzyka, a chto nie ryzykuje, toj nie zdabyvaje naftu».

Tym samym

ministr tolki paćvierdziŭ, što z prajekta tak i šuhaje pijaraŭskaja piena, jak z taho šampanskaha ŭ rukach honščyka-tryumfatara.

Ale ž adna reč — ryzykant na «Formule-1», i zusim inšaja — kali ładzicca absalutna nie praličanaja avantura mižnarodnaha maštabu.

Padajecca, što zvyšzadača tut — pakazać pad vybary narodu i viertykali, što biełaruski pravadyr nie straciŭ jakaści cudatvorca. Niekali jon kazaŭ: ja daŭ vam doždž! Zaraz možna skazać: ja daŭ vam naftu!

Raniej Łukašenka trymaŭ aŭtarytet tym, što damaŭlaŭsia pra dabroty ŭ Maskvie. Zaraz pakazvaje, što moža damovicca choć z Čaviesam, choć z čortam.

Na dumku palitołaha Valera Karbaleviča, probnaj partyjaj zaakijanskaha čornaha zołata ŭsio moža i skončycca. Paśla vybaraŭ hetu maniłaŭščynu cicha pachavajuć.

Ale ž darahoje jaječka da Vialikadnia. Tak što chaj plaskaje ŭ ładki davierlivy elektarat dy skryhoča zubami Maskva.

Alaksandr Kłaskoŭski