Narnijskija pryhody na krai śvietu
Trecija «Chroniki Narnii»
10.12.2010 / 18:56
Chroniki Narnii: Skaralnik zołku (The Chronicles of Narnia: The Voyage of the Dawn Treader)
ZŠA, 2010, kalarovy, 112 chv.
Režysior: Majkł Eptyd
Roli vykonvajuć: Džordžy Hienli, Skandar Kiejns, Bien Barns, Uił Paŭłter, Hery Suit, Tery Norys
Žanr: Fentezi pavodle knihi K.S.Ljuisa
Adznaka: 6 (z 10)
Edmund, Lusi i ichni stryječny brat Justas traplajuć u Narniju — na karabiel «Skaralnik zołku», jaki adpraŭlajecca na kraj kazačnaha śvietu. Hieroi musiać adšukać siem łordaŭ i spynić zialony tuman, što niščyć ludziej.
«Chroniki Narnii» Majkła Eptyda — trecija kazačnyja pryhody ŭ krainie, dzie pacuki i minataŭry bałbočuć, dzieci — karali i pryncesy, a dzivosy na kožnym kroku. Edmund i Lusi — nie ŭpieršyniu ŭ Narnii, zatoje ichni brat, źluka i škodnik — nie čakaŭ dla siabie pryhodaŭ. Jahonym vychavańniem zojmiecca maleńki pacuk ź vialikim sercam, usia kamanda karabla — i čaroŭnyja siły.
U filmie — niabačnyja karliki-adnastupy, padstupnyja handlary rabami, zły zialony tuman, załaty cmok (i pa sumiaščalnictvie — Justas na vychavańni). Pleščucca ŭ vodach najady, strašnaja marskaja źmiaja atakuje karabiel.
Majkł Eptyd — hodny ramieśnik, jaki fentezi nie psuje, ale i zavialikich čaraŭ u stužku nie dadaje. Zatoje chryścijanskija aluzii ŭ hetaj karcinie najbolš vidavočnyja. Kab pieramahčy zło — treba zmahacca ź im va ŭłasnych dušach. Zialony tuman — djabalskaje spakušeńnie. Nu, a leŭ Asłan sam prapanuje hierojam zdahadacca, kim jon jość u realnym žyćci.
Niepychlivaja, pryhožaja kazka dla ŭsioj siamji.