У «Юнівесце-М» Тарнаўскага працуе Ганна Лукашэнка

дапоўнена

Мільянер спансаруе Прэзідэнцкі спартыўны клуб, а ягонай намесніцай па маркетынгу працуе жонка Дзмітрыя Лукашэнкі.

23.03.2012 / 14:58

Наступнымі бізнэсоўцамі, супраць якіх былі ўведзеныя санкцыі, пасля Уладзіміра Пефціева сталі Анатоль Тарнаўскі і Юрый Чыж. Пра апошняга з іх беларускае грамадства ведае добра, але хто такі Тарнаўскі?

Тарнаўскі трэці злева.

61-гадовы пенсіянер, кавалер Крыжа Ефрасінні Полацкай Анатоль Тарнаўскі нарадзіўся ў Данецку. Яго сувязі з Беларуссю пачаліся з транзіту расійскай нафты. Ён быў віцэ-прэзідэнтам расійскай «Слаўнафты» па сувязях з СНД. Як адзначалі расійскія СМІ, Тарнаўскі спрабаваў прасунуць кампанію на ўкраінскі рынак нафтапрадуктаў. З сыходам з «Слаўнафты» ён пачаў больш плённа працаваць з Беларуссю. Кампанія «Юнівест-М» была зарэгістраваная ў 2001 годзе. Цяпер праца ў нашай краіне працягваецца шмат у чым за кошт плённага супрацоўніцтва з Дзмітрыем Лукашэнкам, сынам кіраўніка дзяржавы.

Дарэчы,

намесніцай па маркетынгу генеральнага дырэктара «Юнівест-М» працуе жонка Дзмітрыя, Ганна Лукашэнка.

Спіс партнёраў Прэзідэнцкага спартыўнага клуба кажа сам за сябе — «Трайпл», Беларуская калійная кампанія, Белтэлерадыёкампанія, «БТ Тэлекамунікацыі» Пефціева (супраць якой санкцыі былі ўведзеныя раней)…

І сярод іх «Юнівест-М». Кампанія — адзін з найбуйнейшых недзяржаўных экспарцёраў нафтапрадуктаў, нароўне з «Трайплам».

Тарнаўскаму дазволілі заняцца ў Беларусі нерухомасцю, і ён імкліва ўварваўся на рынак. Цяпер «Юнівест-М» сканчвае забудоўваць квартал на месцы турмы на вуліцы Кальварыйскай. Гэта адна з нешматлікіх будоўляў, якія падчас крызісу не спыняліся. Апроч таго,

за МКАД Тарнаўскі стварае элітны квартал «Нотынгем», з першым у краіне гольф-клубам

У рэгіёнах «Юнівест-М» мае трохзоркавы гатэль «СлавінаСпорт» (Жлобін), а таксама збіраецца будаваць забаўляльны цэнтр «Экватар» у Брэсце. У якасці сацыяльнай нагрузкі — сядзіба Ваньковічаў у Мінску.

Як і Чыж, Тарнаўскі мае ва ўласнасці рэстараны — прадстаўнічы «Бела Роза» і недарагую сетку піцэрый «Ліманчэла».

Ягор Марціновіч