Čampijanat pa chakieju 2014 hoda budzie kašmarnym snom dla Łukašenki

Biełaruskaja apazicyja abaviazanaja vykarystać čampijanat dla biesprecedentnaj kampanii pa pašyreńniu infarmacyi pra situacyju ŭ Biełarusi

06.06.2012 / 19:57

Zusim chutka pačniecca čarhovy čampijanat Jeŭropy pa futbole, jaki hetym razam projdzie ŭ Polščy i Ŭkrainie.

Aŭtarytetny niamiecki časopis Spiegel niekalki numaroŭ zapar razvažaŭ na temu, ci nie varta było b bajkatavać čampijanat z-za parušeńniaŭ pravoŭ čałavieka va Ŭkrainie. U kožnym ci amal kožnym vypusku — pa vialikim artykule pra raźvićcio situacyi ź Julijaj Tymašenka, pra kłan prezidenta Janukovyča, pra Femen.

Dabralisia, ułasna, i da zbornaj Niamieččyny pa futbole. U interviju ŭ adnym z travieńskich numaroŭ kapitan nacyjanalnaj kamandy Filip Lam nastupnym čynam adkazaŭ na pytańnie žurnalista pra toje, ci paciśnie jon ruku prezydentu Janukovyču, kali raptam toj vyjdzie na pole: «Nad hetym mnie treba było b mocna padumać.

Maje pohlady na demakratyju i pravy čałavieka, na takija pytańni, jak svaboda słova ci asabistaja svaboda, nie adlustroŭvajucca ŭ siońniašniaj situacyi va Ŭkrainie.

Kali ja baču, jak abychodziacca ź Julijaj Tymašenka, heta nijak nie spałučajecca z maimi ŭjaŭleńniami pra demakratyju».

I heta jany pra Ŭkrainu, ź jaje svabodnaj presaj, apazicyjaj u parłamiencie, amal dziasiatkam kankurentnych vybaraŭ, praviedzienych za apošnija dva dziesiacihodździa, i Aranžavaj revalucyjaj.

Na pytańnie, ci možna adździalić sport ad palityki, futbalist adkazaŭ: «Hetyja rečy ŭzajemaźviazanyja, ich nie raździalić.

My, hulcy nacyjanalnaj zbornaj, pradstaŭlajem Niamieččynu, i my vystupajem za demakratyčnaje hramadstva, za takija kaštoŭnaści, jak sumlennaść i ciarpimaść, za intehracyju».

Jak tut nie zadumacca pra 2014 hod i čampijanat śvietu pa chakiei ŭ Biełarusi.

Čampijanat pa chakiei 2014 hoda dla Łukašenki — heta toje ž samaje, što Alimpijskija hulni 1980 hodu ŭ Maskvie dla KPSS ci Alimpijskija hulni 1936 hodu ŭ Bierlinie dla Hitlera:

demanstracyja svajmu nasielnictvu, zamiežnikam, i hałoŭnaje — samomu sabie svajoj vieličy i svajoj pieravahi nad prahniłymi vorahami. Jon maje stacca asabistym palityčna-prapahandysckim mierapryjemstvam dla zadavalnieńnia ŭłasnaha samalubstva tyrana-amatara chakieju.

Heta aznačaje, što

biełaruskaja apazicyja u adkaz abaviazanaja vykarystać čampijanat dla biesprecedentnaj kampanii infarmacyjnaha cisku na dyktatarski režym i dla pašyreńnia infarmacyi pra situacyju ŭ Biełarusi ŭ śviecie.

Z adnaho boku, było b, kaniečnie, davoli efiektna, kali b Łukašenka byŭ hučna i pryludna pazbaŭleny hetaha jahonaha piersanalnaha śviata i "padarunka samomu sabie". Ale padajecca, što našmat bolšy prastor dla pryciahnieńnia ŭvahi da prablemaŭ z pravami čałavieka i zakonnaściu ŭ Biełarusi daje mienavita praviadzieńnie čampijanata, a nie jaho admiena.

Čym bližej čampijanat, tym bolš budzie sam pa sabie narastać intares da biełaruskaj temy. Treba prosta siadłać hetuju chvalu, vykarystoŭvać infarmacyjnuju nahodu.

Viadučyja chakiejnyja zbornyja mahli b abvieścić bajkot čampijanatu-2014, jak u 1980 hodzie krainy Zachada bajkatavali Alimpijskija hulni ŭ Maskvie z-za ŭvodu vojskaŭ u Aŭhanistan. I heta było b dobra.

A možna abyścisia i biez bajkotu:

efiekt budzie kudy macniej, kali chakieisty zbornaj Čechii ci ZŠA vyjduć na lod z bieł-čyrvona-biełymi stužkami i buduć razdavać interviju kštałtu taho, jakoje daŭ Filip Lam časopisu Spiegel

I kali Łukašenka ŭsio jašče budzie prezidentam Biełarusi ŭ 2014 hodzie, tady čampijanat pa chakieju moža dla jaho pieratvarycca z «tryjumfu voli» ŭ kašmarny son.

Aleś Čajčyc