«Мы тыя нямногія, каму пашанцавала». Мігранты расказалі пра брутальнае падарожжа з Беларусі ў Еўропу
Журналісты The Moscow Times сачылі за падарожжам шасці сірыйскіх мужчын з Мінску ў Нідэрланды. Сірыйцы расказалі пра здзекі, дрыгву і голад.
У галандскім горадзе Будэлі, у цэнтры ўцекачоў, пабудаваным на месцы былога ваеннага лагера на поўдні Галандыі, групы бежанцаў катаюцца на роварах паміж спальнымі карпусамі. Стомленыя і разгубленыя, шасцёра сірыйскіх бежанцаў стаяць у чарзе ля кавярні, каб атрымаць сасіскі і бульбу-пюрэ.
«Мы так шмат перажылі за апошнія тыдні… Як быццам цэлае жыццё», — расказвае Валід, седзячы на двух’ярусным ложку ў невялічкім пакоі, у якім жыве ён і яшчэ чатыры чалавекі.
Хлопцы патрацілі ўсе свае ашчаджэнні на візы і квіткі да Мінска, а ўжо адтуль яны ўзялі таксі да Гродна.
Беларуская памежная служба не пракаментавала The Moscow Times гэтыя абвінавачванні ніяк.
Пасля трэцяй непаспяховай спробы, яны вырашылі адасобіцца ад групы і паспрабаваць перайсці мяжу ў іншым месцы, але ледзь не патанулі ў дрыгве, прабіраючыся туды.
«Яны глядзелі на мяне і вылівалі ваду ў зямлю», — расказвае самы малодшы ўдзельнік групы. І кажа, што да іх ставіліся хутчэй як да сабак, чым як да людзей.
Іх пасадзілі з 200 іншымі мігрантамі ў шчыльна набітыя людзьмі грузавікі і павезлі на поўдзень, да пустога пераходу ля Брэста.
«Было страшна і хаатычна», — кажа Валід.
«Мы вымушаныя былі ісці па людзях, гэта было чыста выжыванне. Я не хачу думаць пра тое, што там адбылося. Многія адсталі», — сказаў ён.
Калі Валід і яго сябры нарэшце змаглі прабрацца праз мяжу, яны пачулі стрэлы палякаў у паветра, але беглі і не спыняліся. У хаосе яны згубілі адно аднога, але зноў сустрэліся каля невялікай чыгуначнай станцыі.
Бяспечны дом
У Польшчы яны сустрэліся з сірыйскім кантрабандыстам, з якім скантактаваліся яшчэ з Беларусі. Ён іх і перавёз у бяспечны дом у Нямеччыне.
«Гэта як з прывідам мець справу», — кажа Валід, апісваючы кантрабандыста.
Яны правялі ноч у кватэры на ўсходзе Нямеччыны, а на наступны ранак кантрабандыст перавёз іх на захад да нямецкай мяжы з Нідэрландамі. Адтуль яны патрапілі ў галандскі горад Венло і там ужо першай справай накіраваліся ў паліцыю, каб пачаць працэс рэгістрацыі на атрыманне прытулку.
У іх добрыя шанцы застацца і атрымаць статус бежанца, кажа прадстаўніца Нідэрландскай рады па справах бежанцаў, бо ўлады ўсё яшчэ лічаць Сірыю небяспечнай краінай. Усё не так пазітыўна ў выпадку з іракскімі курдамі, якіх найбольш сярод мігрантаў, што ідуць праз Беларусь. Нідэрландскія ўлады лічаць іх краіну «бяспечнай».
Большасць мігрантаў, якія патрапляюць у ЕС, просяць прытулак у Нямеччыне — там федэральная паліцыя зафіксавала 10648 чалавек, якія нелегальна дабіраліся праз Беларусь.
«Мая віза скончылася, і мая сям’я больш не можа падтрымліваць мяне», — расказаў Афрон, 16-гадовы курд, які цяпер спіць на вуліцах Мінску і просіць ежу ў мінакоў. 10 лістапада Moscow Times паразмаўлялі з ім у Мінску — тады ён толькі быў прыляцеў са Стамбулу.
«Лукашэнку было б пляваць, каб мы памерлі ў тым лесе. Ён пра нас зусім не думаў. Усё гэта мы самі зрабілі», — сказаў Валід.
Каментары