Выбарчых участкаў за мяжой падчас рэферэндуму не будзе. Мала людзей, каранавірус, «тэрарыстычныя пагрозы»…
Выбарчых участкаў за мяжой падчас правядзення канстытуцыйнага рэферэндуму ствараць не плануецца, паведаміў прэс-сакратар МЗС Анатоль Глаз. Бо, маўляў, немагчыма гэта правесці бяспечна з-за каранавіруса і «тэрарыстычнай пагрозы». А таксама на консульскім уліку мала людзей.
«На сённяшні дзень больш за траціну замежных устаноў не ўтваралі ўчасткі па прычыне нязначнай колькасці грамадзян, якія знаходзяцца на консульскім уліку» — сказаў Анатоль Глаз.
У Літве і Латвіі «з прычыны дзеянняў беларускіх суседзяў» нібыта няма дастатковай колькасці персаналу, каб забяспечваць працу ўчастка. Многія амбасады і консульствы нібыта прынялі рашэнне не падвяргаць рызыцы здароўе супрацоўнікаў і тых, хто галасуе, у сувязі з рэзкім змяненнем эпідэміялагічнай абстаноўкі ў краінах знаходжання.
Да таго ж «падчас папярэдняй выбарчай кампаніі на адрас членаў выбаркамаў і работнікаў замежных устаноў паступалі шматлікія пагрозы, рабіліся правакацыі і акцыі хуліганскага і экстрэмісцкага характару. Было б вельмі наіўна меркаваць, што кіраўнікі нашых замежных устаноў заплюшчаць вочы на абуральныя факты зусім нядбайнага стаўлення шэрагу краін ЕЗ да сваіх абавязкаў у забеспячэнні бяспекі дыпламатычных прадстаўніцтваў», — адзначыў Анатоль Глаз.
Пры гэтым, на думку МЗС: «Усё гэта ніякім чынам не перашкаджае канстытуцыйнаму праву грамадзян Беларусі прыняць удзел у маючым адбыцца рэферэндуме. Традыцыйна доля тых, хто галасуе за мяжой-менш за 1%».
Тыя ж, хто часова знаходзіцца за мяжой, запрашаюцца для галасавання ў Беларусь.
Пасля апошніх прэзідэнцкіх выбараў за мяжу з’ехалі дзясяткі, а па некаторых звестках, і сотні тысяч беларусаў.
Нагадаем, як на замежных участках галасавалі падчас прэзідэнцкіх выбараў 2020 года.
У многіх пасольствах і консульствах Беларусі за мяжой галасы тады палічылі сумленна. Так, у Нью-Ёрку Святлана Ціханоўская па афіцыйных звестках атрымала 93,2%, у Мюнхене — 91,7%, у Тэль-Авіве — 91,5%, у Лондане — 80,1%, у Рыме — 79,7%, у Стакгольме — 75,6%. Але варта адзначыць, што экзіт-полы, якія праводзілі беларусы замежжа, давалі ёй нават 95% галасоў.
На ўчастках у Расіі Ціханоўская прайграла, але неістотна: у Санкт-Пецярбургу Ціханоўская набрала 45,8%, а Лукашэнка - 51,1%. Прыкладна тое ж самае было і ў Маскве. Пры гэтым там у асноўны дзень галасавання сотні людзей не змаглі прагаласаваць — участкі працавалі вельмі марудна.
Папулярны тыктокер з Расіі тусіць у дарагіх рэстаранах Мінска: «Быццам бамжу падалі. Жарыце, на здароўе»19
Каментары