Hihancki aparat: ad KDB da Słužby achovy prezidenta

Słova «siłavik» pryjšło va ŭsie movy śvietu z Rasii 1990-ch. Mienavita tam, u toj pieryjad «paśla pieramien» ludzi sa zbrojaj, najvyšejšyja čynoŭniki, źviazanyja ź milicyjaj, armijaj, śpiecsłužbami, nabyli asablivy ŭpłyŭ.

Što tyčycca Biełarusi, to, naprykład, na dziaržaŭnym ahienctvie BIEŁTA pad teham «siłavyja struktury» možna adšukać naviny pra MUS, KDB, Ministerstva abarony, Śledčy kamitet, AAC, Radu biaśpieki, Kamitet sudovych ekśpiertyz, KDK, Pamiežny i Mytny kamitety, Hienieralnuju prakuraturu, Słužbu achovy prezidenta.

Śledam za Łukašenkam my taksama pravodzim znajomstva z ajčynnymi siłavymi viedamstvami. Prapanujem źviarnuć uvahu na niekatorych ich pradstaŭnikoŭ.

KDB

KDB maje reputacyju samaj mahutnaj śpiecsłužby. Pry hetym Łukašenka biaskonca tasavaŭ kiraŭnikoŭ Kamiteta, niaredka davaŭ publičny adłup im (Ściapanu Sucharenku, Vadzimu Zajcavu). Sa źjaŭleńniem AAC «čekisty» krychu stracili ŭpłyvovaści.

Mienavita KDB viadzie bolšaść palityč­nych spravaŭ. U turmie KDB znachodzilisia palitviaźni paśla Płoščy­-2010. Jak kazaŭ adzin ź siońniašnich namieśnikaŭ Leanid Dziad­koŭ, u zadačy Kamiteta ŭvachodzić u tym liku i baraćba z «niapravilnym kirunkam dumak».

Prapanujem źviarnuć uvahu: Aleh Čarnyšoŭ

Aleh Čarnyšoŭ. Kiraŭnik śpiecnaza KDB «Alfa». Fota BIEŁTA.

Kiraŭnik śpiecnaza KDB «Alfa». Ale heta zusim nie «byk-­kačok». Heta adzin z najmacniejšych intelektuałaŭ u siłavych viedamstvach krainy. Šmat hadoŭ jon zajmaŭsia prablemami teraryzmu, byŭ namieśnikam načalnika Instytuta nacyjanalnaj biaśpieki, kandydat jurydyčnych navuk.

Jak adznačaje Śviatłana Kalinkina, kiraŭniki «Alfy» mianiajucca značna radziej za staršyń KDB.

MUS

Samaje šmatlikaje siłavoje viedamstva Biełarusi. Milicyja sutyknułasia z prablemaj. Zarobki supracoŭnikam treba pavialičvać, ale niama čym. Tamu ŭ MUS pačynajucca vialikija skaračeńni. Ludziej stanie mienš, za hety košt płacić im buduć bolš. U strukturu MUS uvachodziać nie tolki opiery, ale i ŭnutranyja vojski (śpiecnazy), jakija i vykarystoŭvajucca ŭ «brudnaj spravie» razhonu akcyj pratestu i fizičnych represij suprać inšadumcaŭ.

Prapanujem źviarnuć uvahu: Juryj Karajeŭ

Juryj Karajeŭ. Namieśnik ministra, kamandzir unutranych vojskaŭ. Fota spec-by.ucoz.ru.

Namieśnik ministra, kamandzir unutranych vojskaŭ. Karajeŭ paśpieŭ pakamandavać jak minskim śpiecnazam, tak i ŭručanskim z častki 3214, jakoj raniej kiravaŭ Dźmitryj Paŭličenka. Viadoma, što ciesnaje znajomstva źviazvaje jaho z achoŭnikam prezidenta Andrejem Uciurynym i jašče adnym byłym śpiecnazaŭcam Juryjem Padabiedam. Darečy, Padabied paśla sychodu ź dziaržsłužby znajšoŭsia ŭ słužbie achovy kampanii «Trajpł», h.zn. multymiljaniera Juryja Čyža.

Ministerstva abarony

Nikoli nie pretendavała na lidarstva siarod siłavikoŭ. U baraćbu za ŭpłyŭ i kantrol nad biźniesam nie ŭmiešvalisia ni daśviedčany Malcaŭ, ni były achoŭnik Łukašenki Žadobin. U biełaruskim vojsku jość asobnyja ŭzornyja častki, jakija mohuć nie sastupać NATAŭskim, adnak u bolšaści biełaruskaja armija zachavała tradycyi, a razam ź imi i zahany Savieckaj armii — spadziavańnie na «avoś», savieckuju etyku, pjanstva. Pry hetym hramadstva armiju lubić — armiju lubiać va ŭsich krainach śvietu.

Prapanujem źviarnuć uvahu: Aleh Dźvihaloŭ

Aleh Dźvihaloŭ. Namieśnik ministra, kamandujučy VPS Biełarusi. Fota mod.mil.by.

Namieśnik ministra, kamandujučy VPS Biełarusi. Jahonaja pasada krychu nahadvaje siadzieńnie na parachavoj bočcy. Jon užo čaćviorty kiraŭnik VPS za try hady. Ihara Azaronka pasadzili ŭ turmu, Siarhieja Lemiašeŭskaha zvolnili z farmuloŭkaj «za praviny, što dyskredytujuć zvańnie vajennasłužboŭca», Dźmitryja Pachmiełkina — za šviedski «miedźviedziroŭščyk». Što budzie z 48-hadovym uradžencam vyspy Vite Aleham Dźvihalovym?

Śledčy kamitet

Anałah amierykanskaha FBR. Raniej śledčyja pracavali pry Hienieralnaj prakuratury. U Śledčy kamitet sabrali sapraŭdy najlepšych prafiesijanałaŭ svajoj spravy. U palityčnych raspravach SK pakul siabie nie zaplamiŭ. Stanaŭleńnie kamiteta prachodziła pad kiraŭnictvam siońniašniaha staršyni KDB Valeryja Vakulčyka.

Prapanujem źviarnuć uvahu: Valancin Šajeŭ

Valancin Šajeŭ. Staršynia Śledčaha kamitetu.

Staršyni Śledčaha kamitetu jašče daloka da piensii, a heta značyć, što jon jašče moža pajści na pavyšeńnie. Zrabiŭ karjeru ŭ Viciebskaj i Homielskaj abłaściach ź ich vysokim uzroŭniem złačynnaści, a nie ŭ centralnym aparacie prakuratury. Kalehi charaktarazujuć jaho jak «dobrasumlennaha i starannaha supracoŭnika».

Apieratyŭna-analityčny centr

Samaja tajamničaja śpiecsłužba krainy. Vykazvałasia mierkavańnie, što stvarałasia pa inicyjatyvie Viktara Łukašenki jak supraćvaha KDB. «Čornaja sotniaj» hetaja arhanizacyja nie stała. Heta chutčej intelektualny centr.

Viadoma, što ŭ pramyja abaviazki AAC uvachodzić kantrol za internetam. Zrešty, represiŭnych krokaŭ u hetym kirunku zaŭvažana nie było. Pa słovach Łukašenki, u centry pracuje mienš za 100 čałaviek. Centr siadzić u niepasrednaj blizkaści da Administracyi prezidenta — u budynku byłoj Nacyjanalnaj biblijateki na Kirava.

Prapanujem źviarnuć uvahu: Uładzimir Rabavołaŭ

Uładzimir Rabavołaŭ. Namieśnik staršyni AAC. Fota BIEŁTA.

Mienavita vakoł jaho zaprašeńnia na kanfierencyju ABSIE ŭ Vienu złamali šmat dzidaŭ. Źviartaje ŭvahu toj fakt, što hety čałaviek adkryty dla kantaktaŭ navat ź niezaležnaj presaj. Što kantrastuje z kiraŭnikom AAC Siarhiejem Špiehunom, jaki zastajecca ŭ ciani.

Rada biaśpieki

Mienavita hetaja struktura kantraluje i kaardynuje dziejnaść usich pravaachoŭnych orhanaŭ, rychtuje analityčnyja zapiski na imia Łukašenki. Praz Radu biaśpieki prajšli klučavyja asoby ŭ atačeńni kiraŭnika krainy — Viktar Šejman, Urał Łatypaŭ, Hienadź Niavyhłas. Siońniašni dziaržsakratar Leanid Malcaŭ choć i źjaŭlajecca intelektualna mocnym, ale nie maje takoha ŭpłyvu, jak jahonyja papiaredniki.

Prapanujem źviarnuć uvahu: Viktar Łukašenka

Viktar Łukašenka. Člen Rady Biaśpieki.

Starejšy syn kiraŭnika dziaržavy zaniaŭ druhoje miesca ŭ rejtynhu «NN» samych upłyvovych ludziej krainy. Jahony ŭpłyŭ vializny. Mienavita Viktar kiruje siłavikami.

Kamitet sudovych ekśpiertyz

Najmaładziejšaja siłavyja struktura. Utvoranaja tolki ŭ krasaviku sioleta. Hetaje viedamstva abjadnała ekśpiertaŭ padraździaleńniaŭ MUS, MNS, vojska, Miniusta. Adnoj z pryčyn stvareńnia kamiteta nazyvałasia ekanomija hrošaj. Bo ciapier srodki na ekśpiertyzy buduć iści tolki ŭ adno miesca. Dyj štat budzie istotna mienšym, čym va ŭsich strukturach razam. «Ježiednievnik» nazvaŭ kamitet sudovych ekśpiertyz jašče adnoj «vajenizavanaj» strukturaj.

Prapanujem źviarnuć uvahu: Andrej Švied

Andrej Švied. Staršynia Kamitetu śledčych ekśpiertyz. Fota Siarhieja Hudzilina.

Adzin z najbolš pierśpiektyŭnych śledčych. Niekali Łukašenka addavaŭ naležnaje jahonamu prafiesijanalizmu. Zornym časam Švieda stała rasśledavańnie spravy ab vybuchach u minskim mietro. U najvyšejšych ešałonach pracu paličyli ŭzornaj, choć u niezaležnych naziralnikaŭ zastavałasia šmat pytańniaŭ. Ciapier Švied uznačaliŭ novy kamitet.

Pamiežny kamitet

Alaksandr Łukašenka byŭ pamiežnikam, i z hetaj prostaj pryčyny ciapier pamiežniki ŭ favory. Ich davoli mnoha ŭ roznych inšych siłavych viedamstvach. Ni ŭ adnoj inšaj krainie jany nie majuć takoha prestyžu. Nu, pamiežniki i pamiežniki. «Idealny pamiežnik maksimalna padobny da kamienia, fizična i intelektualna», — pakieplivajuć ź ich kalehi-mytniki.

Prapanujem źviarnuć uvahu: Juryj Cierciel

Juryj Cierciel. Načalnik pahraničnaha śpiecnaza — ASAM. Kadr ź filma, pryśviečanaha padraździaleńniu.

Načalnik pahraničnaha śpiecnaza — ASAMa (Asobnaja słužba aktyŭnych mierapryjemstvaŭ). Juryj Cierciel nie śviecicca na ekranach, jaho tolki niadaŭna pakazali ŭ filmie, pryśviečanym 20-hodździu ASAMa. Z pasady načalnika ASAMa vychodzili Hienadź Niavyhłas i Ihar Račkoŭski. U ASAMie słužyli Viktar i Dźmitryj Łukašenka. Darečy, u KDB słužyć Ivan Cierciel, ci nie brat Juryja.

Mytny kamitet

Praz hetaje viedamstva płyvuć miljardy hrošaj. Usio prachodzić praz mytniu: i darahija enierhanośbity, i šmotki.

«Kali ty adpracavaŭ piać hadoŭ na mytni i nie zbudavaŭ sabie katedža, značyć, ty niejki nienarmalny», — žartavali ŭ Hrodnie i Breście, dzie mytnia doŭhi čas była załatym dnom, Eldarada, jakoje spakusiła i pryviało ŭ turmu nie adnu sotniu ludziej. Dachodziła da taho, što sumlennyja mytniki staralisia pierajści z aŭtamabilnych pierachodaŭ na čyhunačnyja. Tam było mienš šancaŭ sutyknucca ź intaresami karupcyjnych hrup.

Mytniki šmat razoŭ trapiali ŭ karupcyjnyja skandały. Prakuror Śviatłana Bajkova viała spravu suprać bresckich mytnikaŭ, a ŭ vyniku sama sieła ŭ turmu. Mytniki ŭ Breście byli šerymi schiemami ciesna źviazanyja z KDB.

Pa miery raźvićcia rynkavych adnosin ekspartna-impartnyja apieracyi stali lepš rehulavacca, stała mienš łaziejek, i ŭ apošnija hady kryminalnych spravaŭ na mytni taksama pamienieła.

Prapanujem źviarnuć uvahu: Alaksandr Špileŭski

Alaksandr Špileŭski. Staršynia Mytnaha kamiteta.

Staršynia kamiteta. Skončyŭ Vyšejšuju škołu KDB. Niamnoha zastałosia čynoŭnikaŭ, jakija b zajmali svaju pasadu niaźmienna na praciahu apošnich 12 hadoŭ. Špileŭskamu ani ŭ znak skandały i zvalnieńni. Jon užo, darečy, dasiahnuŭ piensijnaha ŭzrostu, ale takich ludziej prosta tak nie śpisvajuć.

Hienieralnaja prakuratura

Mahčymaści hetaj struktury ŭpłyvać na chod kryminalnych spravaŭ źmienšanyja. Heta ŭdaryła pa karumpavanych prakurorach. Spačatku častku abaviazkaŭ zabrali MUS i KDB. Jašče bolšy ŭdar pa prakuratury byŭ naniesieny stvareńniem Śledčaha kamiteta, jaki zabraŭ asnoŭnyja spravy.

Prapanujem źviarnuć uvahu: Alaksiej Stuk

Alaksiej Stuk. Namieśnik hienieralnaha prakurora. Fota Siarhieja Hudzilina.

Byŭ prakuroram na pracesie Dźmitryja Kanavałava i Uładzisłava Kavalova. Niekalki razoŭ zaplamiŭ siabie vypisvańniem ordaraŭ na pieratrusy ŭ inšadumcaŭ i ŭ ofisach niezaležnych ŚMI. Namieśnik hienieralnaha prakurora.

Kamitet dziaržkantrolu

Paśla taho, jak da KDK dałučyŭsia Departamient finansavych rasśledavańniaŭ, kamitet faktyčna pieraŭtvaryŭsia ŭ asobnuju śpiecsłužbu. Jahonaja rola bolšaja, čym była ŭ Kamiteta narodnaha kantrolu ŭ saviecki čas. Finansavaja milicyja zatrymlivała mnohich čynoŭnikaŭ i biźniesmienaŭ. Heta struktura, jakoj realna bajacca.

Prapanujem źviarnuć uvahu: Ihar Maršałaŭ

Ihar Maršałaŭ. Namieśnik dyrektara Departamienta finansavych rasśledavańniaŭ. Fota kgk.gov.by.

41-hadovy namieśnik dyrektara Departamienta finansavych rasśledavańniaŭ. Pałkoŭnik finansavaj milicyi. Ziamlak Łukašenki. Šmat hadoŭ adpracavaŭ u Homielskaj vobłaści. Letaś byŭ pieraviedzieny ŭ Minsk. Darečy, kresła dyrektara Departamienta na siońnia pustuje, Maršałaŭ adzin z hałoŭnych pretendentaŭ, kab jaho zaniać.

Słužba achovy prezidenta

Z abaviazkami hetaj struktury ŭsio absalutna zrazumieła ŭžo z nazvy. Viadoma, što jana padzialajecca na prosta achovu (sočyć za abjektami, dzie znachodzicca kiraŭnik krainy) i asabistuju achovu. Bolš prestyžnym ličycca być u asabistaj achovie.

Dakładnych ličbaŭ ab štacie słužby achovy Łukašenki niama, adnak kolkaść ciełaachoŭnikaŭ, jakija pieramiaščajucca śledam za kiraŭnikom dziaržavy, vializnaja. A jość ža jašče słužby, jakich nie bačna. Mahčyma, Słužba achovy dubluje i ŭzajemakantraluje inšyja śpiecsłužby. U svaich vystupach Łukašenka nie raz nazyvaŭ Słužbu achovy krynicaj infarmacyi pa tych ci inšych temach. Štab­kvatera Słužby achovy mieścicca ŭ niakidkim, ale jomistym budynku byłoha Štaba hramadzianskaj abarony na vulicy Babrujskaj, kala vakzała.

Prapanujem źviarnuć uvahu: Andrej Uciuryn

Andrej Uciuryn. Načalnik Słužby achovy prezidenta.

Jon zaŭsiody na ludziach siadzić pobač ź Viktaram Łukašenkam. Naradziŭsia ŭ Pienzie, ale hadavaŭsia ŭ Biełarusi. Jahony baćka byŭ kiraŭnikom vajskovaj čaści śpiecnaza 3214. Słužba achovy — dobry płacdarm dla najvyšejšych pryznačeńniaŭ. Prykłady Barodziča i Žadobina heta paćviardžajuć.

• 0
• 0
• 0
• 0
• 0
• 0