Piać faktaŭ pra Andreja Uciuryna, jaki 7 hadoŭ kiravaŭ słužbaj achovy Łukašenki

U śpisie samych upłyvovych biełarusaŭ, jaki «Naša Niva» składała letaś, načalnik słužby achovy prezidenta Andrej Uciuryn zaniaŭ 8-je miesca — uśled za Makiejem i Čyžom, ale vyšej za ŭsich vice-premjeraŭ i hubiernataraŭ.

Niekatoryja z apytanych nami ekśpiertaŭ nie razhladali Uciuryna ŭsurjoz, ale tyja, chto mieŭ dačynieńnie da vyšejšych ešałonaŭ ułady, byli adzinadušnyja: upłyŭ byłoha ciełaachoŭnika nasamreč vialiki.

Svaim ukazam ad 11 vieraśnia 2014 Alaksandr Łukašenka adsunuŭ Uciuryna dalej ad svajho cieła, ale padniaŭ jaho pa karjernaj leśvicy. Ciapier Uciuryn — namieśnik Dziaržaŭnaha sakratara Rady biaśpieki.

Spadčynny siłavik

U aficyjnaj bijahrafii paznačana, što Andrej Uciuryn naradziŭsia ŭ Pienzie ŭ 1971 hodzie i skončyŭ Sarataŭskaje vyšejšaje vajskovaje vučylišča MUS Rasii. 

Jahony baćka Alaksandr Uciuryn u 1977—1986 uznačalvaŭ u Biełarusi vajskovuju častku 3214, a pierad tym jon jakraz słužyŭ u Pienzie.

Na adnym miescy

U słužbie biaśpieki Łukašenki Uciuryn źjaviŭsia jašče ŭ 1995 hodzie i niaspynna praciahvaŭ pracavać da siońnia.

Takaja stabilnaść pracy siarod biełaruskaha kiraŭnictva ŭłaściva chiba što rabotnikam Ministerstva finansaŭ.

Da pasady kiraŭnika ciełaachoŭnik dasłužyŭsia ŭ 2007 hodzie.

Pavialičyć

Jon kiravaŭ niemałym kalektyvam. Jašče dziesiać hadoŭ tamu kolkaść rabotnikaŭ słužby biaśpieki składała kala 700 čałaviek.

Dziakujučy łabiravańniu Uciuryna, byŭ pryniaty zakon «Ab dziaržaŭnaj achovie», jaki faktyčna ŭraŭnavažvaŭ słužbu achovy prezidenta z KDB.

Viedamstva Uciuryna atrymała zakonnaje prava pravodzić apieratyŭna-vyšukovuju dziejnaść i stvarać padraździaleńni śpiecyjalnaha naznačeńnia.

Paśla žorstkaha razhonu Płoščy-2010 istotna pašyryŭsia pieralik nievyjaznych biełaruskich čynoŭnikaŭ. Pad №9, uśled za Viktaram Łukašenkam, Uładzimiram Makiejem i Leanidam Malcavym, byŭ uklučany «načalnik słužby biaśpieki prezidenta Andrej Ciuryn». Navat u taki važny śpis trapiła abdrukoŭka — razmova, viadoma ž, išła pra Uciuryna.

Pjerśpiektyŭnaja pasada

Načalnik słužby biaśpieki Łukašenki — pierśpiektyŭnaja pasada dla dalejšaha rostu. Chto byli papiaredniki Uciuryna i kim jany stali paśla?

Juryj Barodzič achoŭvaŭ kiraŭnika krainy ŭ 1995—1998 hadach. Jašče padčas słužby jon uznačalvaŭ fiederacyju chakieja Biełarusi. Paśla adstaŭki jon byŭ aficyjnym pradstaŭnikom KDB Biełarusi pry FSB Rasii, a na radzimie ŭznačaliŭ spartyŭnaje abjadnańnie «Dynama». Ciapier Barodziča nazyvajuć adnoj z asnoŭnych kandydatur na pasadu ministra sporta i turyzma.

Biaśpiekaj Łukašenki kiravali i Uładzimir Navumaŭ (1999—2000), jaki staŭ ministram unutranych spraŭ, i Leanid Jeryn (2000). Apošniaha praź miesiac słužby pieraviali na pasadu staršyni KDB. Hienadź Niavyhłas (2000—2001) staŭ daradcam Łukašenki pa nacyjanalnaj biaśpiecy, Jaŭhien Dviarnicki (2001—2003) — namieśnikam ministra ŭnutranych spraŭ.

Narešcie, Juryj Žadobin paśla słužby hałoŭnym ciełaachoŭnikam (2003—2007) pabyŭ staršynioj KDB, a ciapier źjaŭlajecca ministram abarony.

Admietna, što Uciuryn pratrymaŭsia na pasadzie daŭžej za ŭsich papiarednikaŭ.

Z rajona Nacyjanalnaj biblijateki ŭ novyja «Drazdy»

U kancy 2011 hoda Andrej Uciuryn atrymaŭ ziamielny nadzieł u Viaśnincy, tak zvanych «Drazdach-2».

Jahonymi susiedziami stali kiraŭnik Biełkaapsajuza Valeryj Ivanoŭ i mastak Uładzimir Zinkievič. A praz darohu žyvuć prapahandysty Hienadź Davydźka i Juryj Kazijatka.

Pracy na ŭčastku Uciuryna iduć niachutka, kanca budoŭli nie vidać.

A voś svaje staryja apartamienty ciełaachoŭnik Łukašenki sioleta pierapisaŭ na syna. 21-hadovy Anton Uciuryn ciapier paŭnavartasny haspadar čatyrochpakajoŭki ahulnaj płoščaj bolš za 165 m2.

Pavialičyć

Vokny doma pa vulicy Jaźminavaj vychodziać na Ślapianskuju vodnuju sistemu i Nacyjanalnuju biblijateku. Darečy, hety kvartał elitnych damoŭ zabudoŭvała kampanija «Tapas», pośpiechi jakoj źviazvajuć z asobaj napadajučaha prezidenckaj chakiejnaj kamandy Paŭła Biełaha.

Pavialičyć

Syn — budučy dypłamat

Sam Uciuryn — siłavik jak minimum u druhim pakaleńni, a voś karjeru synu abraŭ inšuju.

Pavialičyć

Jak i dzieci mnohich inšych biełaruskich čynoŭnikaŭ, Anton pastupiŭ na fakultet mižnarodnych adnosinaŭ BDU.

Staronki ŭ sacyjalnych sietkach jon viadzie ŭ zakrytym režymie, tolki pakinuŭ epihraf da svajho tvitera: «Jura, my vsie proje*ali».

Pavialičyć

* * *

Andrej Uciuryn

Naradziŭsia ŭ 1971 u Pienzie. U 1992 skončyŭ Sarataŭskaje vyšejšaje vajskovaje kamandnaje vučylišča MUS Rasii, a ŭ 2002 hodzie — Akademiju MUS Biełarusi. U 1995-2014 — u Słužbie achovy Łukašenki, kiraŭnik Słužby achovy ŭ 2007-2014. Uznaharodžany ordenami «Za biezdakornuju słužbu» i «Za słužbu Radzimie».

U 2014 staŭ namieśnikam Dziaržaŭnaha sakratara Rady Biaśpieki.

• 0
• 0
• 0
• 0
• 0
• 0
• 0
• 0