Desant rasijskich čarnasociencaŭ vysadziŭsia ŭ Akademii navuk Biełarusi i BDU
Ź piatnicy pa niadzielu ŭ Minsku prachodziła kanfierencyja «Suśvietny ład — supraćvaha suśvietnamu panavańniu», arhanizavanaja prarasijskimi arhanizacyjami.
Ad Rasii jaje arhanizoŭvali «Mižnarodnaja słavianskaja akademija» i «Usiesłavianski sajuz». Ad Biełarusi arhanizataram stała «hramadskaje abjadnańnie «Ruś», jakoje isnuje ŭ ščylnym kantakcie z «Rassupracoŭnictvam».
Ciaham troch dzion udzielniki abmiarkoŭvali vypracavanuju imi na papiarednich čatyrnaccaci (taksama minskich) kanfierencyjach «Rodavuju ideałohiju Ładu», jakaja zaklikana «supraćstajać antyruskaj śpiecapieracyi Zachada».
Hety «Ład» praduhledžvaje stvareńnie «Rusi», kudy ŭvojduć Biełaruś i Rasija, a taksama «viartańnie va ŭłońnie Ruskaha śvietu Budučaj Rusi» Ukrainy.
U prajekcie hetaj «Rusi» arhanizatary kanfierencyi padkreślivajuć patrebu «adradzić Rodavuju Spradviečnuju Ruskuju Tradycyju na hlebie Viedyčnaj tradycyi (Viedaŭ)», a taksama bačać «adnym z hałoŭnych kirunkaŭ u palitycy, dla rodavaj samaidentyfikacyi i zachavańnia samabytnaści, pravavoje zabieśpiačeńnie dziejnaści słavian asabliva ruskaha narodu jak najbolš šmatlikaha subjektu Słavianskaha Śvietu».
Śpikierami kanfierencyi stali akademiki Akademii navuk RB i viadomyja ruskija šavinisty, jak, naprykład, Siarhiej Baburyn — arhanizatar «ruskich maršaŭ» i staršynia nacyjanalistyčnaj partyi «Rasijski ahulnanarodny sajuz». A taksama Aleh Płatonaŭ — rasijski publicyst impierskich pohladaŭ, redaktar haziety «Russkij viestnik».
Z vystupu hetaha Płatonava i pačaŭsia pieršy dzień kanfierencyi ŭ Nacyjanalnaj biblijatecy.
Nie maje sensu pierakazvać jahonyja słovy, chopić tolki pieraliku zahałoŭkaŭ jahonych knih, što pradavalisia tam ža, na ŭvachodzie.
«Pravasłaŭje suprać masonstva», «Tajemny suśvietny ŭrad», «Chałodnaja vajna suprać Rasii», «Sijonskija pratakoły ŭ palitycy», — voś što chvaluje Płatonava.
Na paličcy ź jahonymi knihami prapanoŭvali nabyć i hazietu «Russkij viestnik», dzie na pieršaj pałasie śćviardžajecca, što na vybarach prezidenta ZŠA pieramoža Pucin.
Pobač stajała i palica biełaruskich čarnasociencaŭ, dzie sastarełaja babula razdavała ŭlotki «Pravilno hovoriť — Biełoruśsija».
Słuchačoŭ sabrałasia čałaviek 70, pieravažna piensijanieraŭ.
Dźvie sivyja babuli navat uklučyli zapis na svaich starych kasietnych płejerach, kali Płatonava za trybunaj źmianiŭ Pavieł Tułajeŭ — «prafiesar» «Mižnarodnaha słavianskaha sajuza».
Jon nazvaŭ teoryju suśvietnaj zmovy navukaj, padkreśliŭšy, što heta nie antysiemityzm, a ŭsiebakovaje rasśledavańnie zakulisnych dziejańniaŭ.
«Jašče 20 hadoŭ tamu z kanśpirałohaŭ śmiajalisia, maŭlaŭ, jany raskazvajuć kazki pra žydamasonaŭ, ale paśla padzieńnia Čechasłavakii i Juhasłavii, SSSR, sieryi łakalnych vojnaŭ pa inicyjatyvie NATA i Ukrainy, staŭleńnie da kanśpirołahaŭ źmianiłasia, — skazaŭ Tułajeŭ. — «Opus dei», «Čerap dy kostki», iluminaty, masony: tolki małaadukavanyja ludzi siońnia nie viedajuć, što heta takoje. Užo tysiač navukovych knih i artykułaŭ napisana na hetyja temy».
Śpikiera ŭvažliva słuchali akademiki NAN Biełarusi, jakija musili vystupać trochi paźniej.
Tułajeŭ pierajšoŭ da zmovy Ryma i Vizantyi i płanaŭ Chazarskaha kahanata na jeŭrazijskaje ŭładarstva.
U pramovie kanśpirołaha znajšłosia miesca i «žydoŭskaj jerasi».
Kranajučy temu Ukrainy, Tułajeŭ zaznačyŭ, što ŭsim revalucyjam papiaredničaje stvareńnie tajemnych supołak: «Voś revalucyja francuzskaja — tam daminavali iluminaty, a impieratryca Kaciaryna vystupała suprać masonaŭ. Napaleon — staŭleńnik Rotšyldaŭ. Rasijski anarchist Bakunin — iluminat ź misijaj padryvu impieryi».
Mała chto viedaje, praciahvaŭ jon, što dekabrysty taksama byli vychadcami sa zvyšzakanśpiravanych supołak, a suprać Marksa była arhanizavanaja antysiemickaja zmova.
Naprykancy pramovy Tułajeŭ prarekłamavaŭ šerah svaich kaleh, paraiŭšy prysutnym aznajomicca z daśledavańniami dziejnaści «suśvietnaha internacyjanału jerasi» i «tajemnaj žanočaj arhanizacyi».
Prafiesar reziumavaŭ, što jadrom supracivu ŭzhadanym tavarystvam musić stajać «Śviataja Ruś» i jaje śpiecsłužby.
Nastupnym kafiedru zaniaŭ Jaŭhien Babosaŭ, akademik Akademii navuk RB. Jon raskazvaŭ pra «budučy śvietaparadak».
«Adbyvajecca amierykanizacyja kulturnych suviaziaŭ i adryŭ nacyjanalnych ekanomik, uviadańnie suvierenitetaŭ i kultur, — dzialiŭsia svaim bačańniem budučyni prafiesar. — Musić być uličana, što NATA nabližajecca da miežaŭ Biełarusi i Rasii. Pierad amierykanskimi vojskami staić zadača być hatovymi vykanać luboje zadańnie ŭ lubym miescy Ziamli».
Babosaŭ zapeŭniŭ prysutnych, što, hledziačy z Bresckaj krepaści ŭ binokl, možna ŭbačyć na zachadzie vojski chutkaha reahavańnia NATA.
U toj ža čas akademik vykazaŭ upeŭnienaść, što «ŭsio idzie» da ŭviadzieńnia rasijskaha rubla ŭ jakaści suśvietnaj reziervovaj valuty.
Spadar Babosaŭ taksama skazaŭ, što Biełaruś — heta pamiežnaja terytoryja.
«Uvarvańnie adbudziecca z Zachadu. Niezdarma našyja hubiernatary prachodzili vučeńni terytaryjalnaj abarony. Takaja ž terytaryjalnaja abarona musić być i ŭ Rasii», — skazaŭ prafiesar pad kaniec i pryhadaŭ, jak na biełaruskaj miažy «niadaŭna zatrymali» 400 čałaviek «terarystyčnaj aryjentacyi» z Ukrainy.
Dalej havaryŭ Piatro Nikicienka, akademik Akademii navuk RB, doktar ekanamičnych navuk. Staŭšy la mikrafona, jon najpierš adznačyŭ, što papiarednija pramoŭcy vystupali vielmi cikava.
Paśla akademik pracytavaŭ Viernadskaha i pažaliŭsia, što heta ŭžo 15-ja kanfierencyja, a ich «ład» usio nijak nie pačnie dziejničać.
«Davajcie nie vinavacić Amieryku, Siryju i Ukrainu, — zaklikaŭ Nikicienka, — žyvicie svaim rozumam, bo słavianie nikoli im nie žyli».
«Nie vydumlajcie, knižki treba čytać!» — u momant adreahavaŭ Tułajeŭ.
«Kolki b my ni kazali chałva, u rocie saładziej nie stanie, — paryravaŭ akademik, — treba raspracavać miechanizm, jak u Šviejcaryi, kab ludzi naradžalisia i ŭ ich byŭ fond. Jašče daŭno kazałasia, što dla dobraj ekanomiki pryhonny musić atrymlivać dobry zarobak, a ŭ nas siońnia dahetul zarobak — vydatki vytvorčaści».
Dalej akademik pačaŭ raskazvać pra «naaśfiernuju ekanomiku Ładu», dzie budzie spałučacca harmonija čałavieka i kosmasu.
Praz chvilinu za trybunaj užo stajaŭ Pavieł Vadapjanaŭ — člen-karespandent Akademii navuk Biełarusi, fiłosaf.
U svajoj pramovie jon raskryvaŭ słuchačam pryčyny hłabalnaj niestabilnaści.
Pavodle prafiesara, Zachodniaja Jeŭropa — u amierykanskim pałonie, a pytańnie pošuku inicyjataraŭ kanfliktaŭ u Afhanstanie, Siryi i Livii — rytaryčnaje. Pakrytykavaŭ Vadapjanaŭ i tych, chto vinavacić Rasiju ŭ vyklikańni ziemlatrusaŭ.
Vadapjanava ŭvažliva słuchali dzieviać maładych ludziej — heta aśpiranty, jakich pryvałok z saboju ich navukovy kiraŭnik.
«Jeŭropa siońnia ŭ ahonii. «Treba admianiać zabaronu na incest», — kažuć žančyny ŭ skandynaŭskich parłamientach. A hiej-šluby? — aburaŭsia fiłosaf Vadapjanaŭ. — Bolšaść ziemlaŭ Jeŭropy parušanaja. Niekranutaja tolki Rasija i Kanada. A ŭ Rasii jość usio! Tamu staić meta avałodać resursami Rasii, zadušyć jaje. A dla hetaha treba abrynuć ceny na pryrodnyja nośbity, stvaryć duchoŭny kryzis», — kazaŭ Vadapjanaŭ.
Potym da mikrafona zaprasili jašče adnaho člena-karespandenta NAN RB, doktara miedycynskich navuk Uładzimira Rastoŭcava.
Jon uklučyŭ prezientacyju i pačaŭ praz hrafiki tłumačyć prysutnym svaje teoryi, dadajučy kamientaryi.
«Našy słaviana-aryjskija prodki viedali tolki adnu epidemiju — epidemiju zdaroŭja, abumoŭlenuju ŭstojami maralnaści», — pačaŭ doktar. Vielmi chutka vyśvietliłasia, što ŭsie sproby raschistać dušeŭny i fizičny stan słavian iduć z Zachadu.
Rastoŭcaŭ navat prydumaŭ dla hetaha terminałohiju i «vykryŭ» mietady, jakimi karystajucca vorahi Rusi.
«My musim pryznać, što niejtralizacyja linhvistyčnych dyviersij — adna z hałoŭnych spraŭ dla zachavańnia słavianskaj nacyi. Što takoje linhvistyčnyja dyviersii? Heta dyviersii suprać rodu, nadańnie peŭnym terminam nieŭłaściŭnych ci niehatyŭnych značeńniaŭ», — skazaŭ prafiesar i patłumačyŭ.
Maŭlaŭ, kali słovu «libieralizm» nadajecca stanoŭčaja afarboŭka, a «cnatlivaści» — pahardlivaja, to heta i jość linhvistyčnaja dyviersija.
Dzie b maci była habrejkaj
Taksama dyviersija, kali słovy «duša» i «telehonija» usprymajucca z paniavierkaj, bo, pavodle hetaha prafiesara, — telehonija i duša — navukova dakazanyja źjavy. Toje ž datyčyć słovaŭ «reinkarnacyja» dy inš.
«Linhvistyčnyja dyviersii pryvodziać da źniščeńnia maralnych ustojaŭ, što viadzie da hienietyčnaj dysharmaničnaści», — takoj vysnovaj padkreśliŭ svaje dumki člen-karespandent NAN RB i pierajšoŭ da hienetyki.
«Dzieci ad źmiašanych šlubaŭ — biazrodnyja, pryrečanyja na biazrodnuju śmierć», — abaznačyŭ jašče adnu pahrozu Rusi Rastoŭcaŭ. «Taksama niebiaśpiečna dvajnoje baćkoŭstva, kali maci viedała inšych mužčyn da pieršych rodaŭ. Takim čynam, dzicia ŭvasablaje ŭ sabie hieny ŭsich pałavych partnioraŭ žančyny», —
prafiesar ahučyŭ staruju i raźviančanuju stahodździe tamu teoryju telehonii.
Hety akademik taksama pryznaŭsia, što nikoli nie bačyŭ talenavitych dziaciej ad źmiašanych šlubaŭ, dzie b maci była habrejkaj.
Ale voś kali słavianka, maŭlaŭ, to tut u adoranaści dziciaci sumniavacca nie vypadaje — niezdarma ž navat słynnyja jeŭrapiejskija i azijackija arystakratyčnyja rody brali sabie ŭ žonki słavianak, kab jany naradžali dla ŭładaroŭ spadkajomcaŭ trona, bo tamtejšyja žančyny ŭžo nie mahli dać hodny prypłod.
«Usie akreślenyja mnoju pahrozy viaduć da dysharmaničnaści raźvićcia, što viadzie da anamalij», — sypaŭ navukovymi terminami Rastoŭcaŭ.
Tut ža jaho spytali, ci źjaŭlajecca biazrodnym Puškin, pradziedam jakoha byŭ afrykaniec.
«Jahonyja baćki — kuzeny. Jašče hreki kazali, što šluby pamiž kuzenami — harmanizujučyja», — znajšoŭ što adkazać doktar miedycynskich navuk.
Naprykancy Rastoŭcaŭ adyšoŭ ad temy miedycyny i skazaŭ, što sam jon — ruski, i jaho vielmi chvaluje hałoŭnaja meta Rusi — intehracyja ŭsich słavianskich narodaŭ.
Potym vystupiŭ Valeryj Zadziarej, hość z Maskvy.
Asnoŭnaja dumka Zadziareja palahała ŭ tym, što prysutnyja navukoŭcy musiać vypracavać cyvilizacyjny prajekt Rusi, jaki budzie pradstaŭlać słavianskuju ideałohiju i pryvablivać inšych. Jak uzor jon pryvioŭ chalifat u musulmanaŭ, sacyjalizm z kitajskim tvaram dla kitajcaŭ i jeŭrapiejski kapitalizm.
U prahramie było jašče šmat lekcyj: «Ruski śviet», «Ruski Ład», «Baraćba z ekspansijaj Zachadu», «Vopyt praŭleńnia Ivana Žachlivaha ŭ sučasnych umovach», «Ruskaja cyvilizacyja jak padmurak biełaruskaha šlachu raźvićcia» dy inš.
U prahramie była zapłanavanaja i sustreča Aleha Płatonava sa studentami BDU, jon raskazvaŭ im pra masonaŭ u subotu.
Sustreča z čytačami ŭ hetaha impierca prajšła ŭ niadzielu ŭ minskim pravasłaŭnym Pakroŭskim chramie kala Drazdoŭ.
Ale dalej za ŭsio pajšli ŭ Akademii Navuk, arhanizavaŭšy ŭ piatnicu sustreču ź Siarhiejem Baburynym prosta ŭ aktavaj zale prezidyuma.
Arhanizatar «ruskich maršaŭ», łabist DNR i ŁNR, «hanarovy hramadzianin» Abchazii i ardenanosiec Prydniastroŭja čytaŭ biełaruskim akademikam lekcyju na temu «jeŭrazijskaj intehracyi».
«Padzieja značnaja, — pačaŭ prezientacyju darahoha hościa pieršy namieśnik staršyni Prezidyuma NAN Biełarusi Siarhiej Čyžyk. — Simvalična, što my sustrakajemsia ŭ Prezidyumie NAN, heta naš štab».
Paśla hetaha Baburyn prezientavaŭ svoj časopis «Słavianie» i pačaŭ uručać dypłomy prafiesaraŭ psieŭdanavukovaj «Słavianskaj akademii», jakaja pa dakumientach źjaŭlajecca hramadskim abjadnańniem, — jon tam staršynia.
Chto atrymaŭ dypłomy ad impierca?
Heta byli biełaruskija aŭtary sajta «Zapadrus»: Zielankoŭski, Hronski, Biendzin, Šaŭčenka.
Ale byli i niečakanaści – dypłom «Słavianskaj akademii» atrymaŭ ministr achovy zdaroŭja Vasil Žarko, jahony namieśnik Dźmitryj Pinievič i były hienprakuror Ryhor Vasilevič, jakoha Łukašenka adpraviŭ u adstaŭku ŭ 2011 hodzie.
Skončyŭšy z dypłomami, Baburyn pačaŭ poŭnuju hnievu pramovu, dzie palivaŭ brudam Harbačova, praročyŭ jamu Hiejenu Ahniavuju i zaklikaŭ sudzić ludziej, vinavatych u razvale SSSR.
Havoračy pra h.zv. «Jeŭrazijski sajuz», Baburyn z žalem adznačyŭ, što nie choča, kab jon paŭtaryŭ los biełaruska-rasijskaj intehracyi.
«Hramadzianstva Sajuznaj dziaržavy jašče nie maje nichto», — z horačču reziumavaŭ Baburyn, pačulisia spačuvajučyja hałasy z zały.
Potym Baburyn pačaŭ staruju pieśniu rasijskaj prapahandy pra duchoŭny kryzis u Jeŭropie i kult adnapołaha kachańnia.
«Maksimum praz adnoje pakaleńnie my ŭbačym, jak padochnuć hiei, a zastanucca dobraradžajučyja žančyny, jakija buduć havaryć nie pa-jeŭrapiejsku, a pa-turecku i pa-kurdsku», — kazaŭ rasijski hość z trybuny NAN RB.
Dalej jon uziaŭsia raskazvać pra «Treci Rym» i jaho biełaruskija i ŭkrainskija askiepki.
Ułasna da navuki Baburyn pierajšoŭ praz 40 chvilin svajoj pramovy, trochi pakrytykavaŭ sistemu vyšejšaj adukacyi ŭ Rasii i znoŭ pačaŭ pra palityku.
«Nas prymušali pakajacca za Katyń, za stalinskija represii. Burbulis nios akalesicu, što treba ŭsie stalinskija zavajovy addać. Što treba Vybarh i Kalininhrad addać. I, na žal, hetyja pracesy nie pajšli ŭ minułaje. Budziem zdychlakami, znojducca palityki, jakija addaduć i Kuryły, usio addaduć za kredyty», — pałochaŭ biełaruskich navukoŭcaŭ Baburyn, a potym pa nieviadomaj pryčynie pačaŭ raskazvać im pra los ich danieckich kaleh.
«Kali ja pryjazdžaju ŭ Danieck, a ja tam prafiesar, mnie ludzi, prafiesary, zadajuć pytańni. Maŭlaŭ, da siabie vy nas nie ŭziali, niezaležnaści nie pryznali. Što, budziecie nazad zapichvać va Ukrainu? I ja im kažu, što my nie dapuścim zdrady, budziem vas abaraniać i dapamahać uvieś čas», — skazaŭ Baburyn akademikam NAN Biełarusi.
Jašče kolki chvilinaŭ paśla kanca pramovy da Baburyna było nie padyści — kala jaho taŭklisia tyja, chto pryjšoŭ u zału Prezidyuma Nacyjanalnaj Akademii navuk Biełarusi.
Kamientary