Namieśnik Karpienki pra list nastaŭnikaŭ: Usie vučni buduć atestavanyja. Kali za try čverci — to za try
Šerah biełaruskich nastaŭnikaŭ praz «Našu Nivu» źviarnulisia z adkrytym listom da ministra adukacyi Ihara Karpienki. Jany aburajucca detalami lista, razasłanaha jaho namieśnikam Alaksandram Kadłubajem.
Čytajcie: Nastaŭniki źviartajucca da ministra Karpienki: Pazbavić atestacyi dziaciej, jakija navučajucca doma — niepiedahahična i nie pa-čałaviečy
Praź nievialiki čas paśla publikacyi zvarota Kadłubaj sam adreahavaŭ na zvarot nastaŭnikaŭ i pramientavaŭ «Našaj Nivie» situacyju. Na jaho dumku, abo nastaŭniki jaho nie zrazumieli, abo jon ich.
«U hetym liście idzie spasyłka na mianie: maŭlaŭ, ja daŭ kamientar ci skłaŭ list da nastaŭnikaŭ pra toje, što nie buduć atestoŭvać tych dziaciej, jakich niama za partaj.
Ale nastaŭniki pavinny vykazać svaju pazicyju bolš łahična, kab było jasna, što ich aburaje i što my robim nie tak?
Dziaciej nie pazbavili mahčymaści atestavacca! Za hod im acenka budzie stajać, navat kali vučań nie byŭ ni na adnym zaniatku ŭ čaćviortaj čverci, pra heta kazałasia ŭžo nie adzin raz», — kaža Kadłubaj.
Što tady było ŭ tym liście?
«List pisaŭsia sa spasyłkaj na narmatyŭnyja akty, jakija na siońnia składzieny takim čynam: kali vučań jość u škole, jon moža atrymać acenku, kali niama — nie moža.
Ale heta ž nie kaža pra toje, što nie moža adbyvacca adukacyjny praces.
Kali Hanna Sieviaryniec zajmajecca sa svaimi vučniami, to chaj zajmajecca. Ministerstva adukacyi nie prapisvaje, jak jana pavinna heta rabić. Ale kali heta praź miesiendžary, inšyja prahramy, to jak pastavić acenku ŭ školny žurnał?
Kali padčas uroka ź dziciom niešta zdarycca, — nie daj Boža, pad mašynu trapić, — a ŭ žurnale budzie stajać acenka, a nie «enka», — to heta ciahnie dla škoły nastupstvy zhodna ź ciapierašnimi aktami. Voś pra što havaryłasia.
A što možna atestoŭvać navat pa vynikach adnoj čverci — dyk heta prapisana ŭ praviłach atestacyi.
[Za čaćviortuju čverć] staviacca litary N/A — «nieatestavany». Hadavaja acenka ličycca zhodna z raździełam 2, punkta 6 Praviłaŭ atestacyi — pa vynikach toj kolkaści čverciaŭ, za jakija školnik zasvoiŭ materyjał. Kali try čverci, to try».
«Adukacyjny praces praciahvajecca. Ja dumaju, paśla majskich vychodnych bolšaść školnikaŭ vierniecca za party», — padsumavaŭ Kadłubaj.
Bondarava abrynułasia na muziej Janki Kupały i mastaka Sušu14
Kamientary