U Lidzie zrabili pratez biazdomnamu sabaku, jaki kaliści zastaŭsia biez zadniaj łapy
U Lidzie biazdomnamu sabaku ŭžyvili bijaničny pratez zamiest zadniaj łapy. Heta takaja druhaja apieracyja, jakuju praviali biełaruskija vieterynarnyja daktary. Pieršym praapieravanym byŭ kot Fila. Pratezavańnie, jak i ŭ pieršym vypadku, pravodziŭ lidski doktar Pavieł Žulpa, paviedamlaje «Lidskaja hazieta».
Biazdomnaha sabaku pa mianušcy Choŭp znajšli ŭ Homielskaj vobłaści i pieradali vałancioru z Navahrudka Volzie Šot. U sabaki była traŭmavanaja zadniaja levaja halonka — kostka prosta tyrčała vonki.
— Volha pryviezła sabaku ŭ Lidu, u našu vietkliniku, — uspaminaje Pavieł Žulpa. — Heta było roŭna hod tamu. Renthienaŭskaje abśledavańnie pakazała, što vierchniaja kostka cełaja, tamu kaniečnaść možna amputavać da pałovy, a ŭ budučyni pasprabavać pratezavańnie. Ułasna, mienavita z Choŭpa i ź jaho vypadku pačałasia vialikaja i ambicyjnaja prapracoŭka hetaha całkam novaha dla našaj krainy napramka.
Pa zamovie Paŭła Žulpy kaleha z Novasibirska Siarhiej Harškoŭ - adziny ŭ Rasii doktar, jaki pravodzić unikalnyja apieracyi pa pratezavańni žyvioł z amputavanymi łapami pry dapamozie 3D-pryntara — vyrabiŭ bijaničny pratez. Vyrab zrabili z spłavu tytanu i hidraksaapatytu. Važyć pratez usiaho niekalki hramaŭ. Jon indyvidualny — kankretna pad Choŭp, jaho masu, zamiery kostki.
Apieracyju Pavieł Žulpa pravodziŭ razam sa svaim kaleham z Hrodna Andrejem Jelisiejevym.
Apieracyja składanaja, jak i padrychtoŭka da jaje — analizy, renthienaŭski zdymak, ustalavali ŭnutryviennyja katetary. Uvieś praces zaniaŭ amal dźvie hadziny. A potym prykładna stolki ž doŭžyłasia apieracyja. Važna było pravilna praśvidravać kostku, ustavić u łapku impłanty i ušyć kulciu tak, kab potym nie było ŭskładnieńniaŭ, — i ŭsio atrymałasia.
— Kali navina ab zroblenym upieršyniu ŭ Biełarusi pratezavańni kaniečnaści katu ablacieła ŭsiu krainu, da nas pasypaŭsia škvał zvankoŭ - kalehi ź inšych haradoŭ cikavilisia, što dy jak. Heta važny momant, tak jak pašyraje miežy vieterynaryi ŭ cełym, u tym liku ŭ halinie traŭmatałohii, artapiedyi, indyvidualnaha płanavańnia apieracyi i šmat čaho inšaha. U dadatak na nas vyjšli chłopcy, jakija vyrablajuć miedycynskija indyvidualnyja pratezy dla ludziej u našaj krainie, prapanavali supracoŭnictva. Niadaŭna da nas pastupiŭ kocik z traŭmavanaj łapkaj. I kali raniej havorka išła b vyklučna ab amputacyi, to siońnia ja prapanavaŭ haspadaru pratezavańnie, tym samym palepšyŭšy jakaść žyćcia žyvioły. Tolki padumajcie: heta stała mahčyma ŭ našaj krainie, — emacyjna kaža vieterynar Pavieł Žulpa.
Pieršuju takuju svaju apieracyju lidski vieterynar i jaho hrodzienski kaleha praviali dva tydni tamu. Tady apieravali kata Filu. I tady taksama ŭsio prajšło paśpiachova.
Pakul Fila i Choŭp buduć abapiracca na silikonavyja nakaniečniki, ale ŭžo ŭ pracesie druk 3D-łapak, jakija buduć nahadvać sapraŭdnyja.
U Lidzie ŭpieršyniu ŭ krainie zrabili pratez katu, u jakoha była amputavanaja łapka
Łatuška pra 30 miljonaŭ jeŭra ad ES: Raniej za raźmierkavańnie adkazvaŭ Jahoraŭ. 33% išło na padtrymku rełakavanaha biznesu13
Kamientary