Na «Słaŭkalii» pracujuć acenščyki majomaści, chodziać čutki ab prodažy «Urałkaliju». Što adbyvajecca?
Zachodnija sankcyi pastavili pad pytańnie ambitny prajekt budaŭnictva Niežynskaha horna-ŭzbahačalnaha kambinata. «Słaŭkalij», kampanija rasijskaha miljardera Huceryjeva, uzvodziła jaho na kredytnyja srodki Kitaja pad harantyju biełaruskaha ŭrada.
Budaŭnictva kambinata finansavaŭ Bank raźvićcia Kitaja. Kredytnyja linii byli zamarožanyja, paśla taho jak Michaił Huceryjeŭ trapiŭ u sankcyjny śpis, u suviazi z parušeńniami pravoŭ čałavieka ŭ Biełarusi. Heta zdaryłasia ŭ červieni minułaha hoda. I ŭžo ŭ červieni na placoŭcy spynilisia raboty.
Krynicy: U Huceryjeva vialikija prablemy — kitajcy zamarozili 580 miljonaŭ dalaraŭ na budaŭnictva Niežynskaha kambinata
Raniej subpadradčyki raskazali «Našaj Nivie», što administracyja pierastała płacić pa rachunkach i zaklikała pracavać u doŭh, što stała sihnałam da zhortvańnia.
Što na placoŭcy Niežynskaha HUK adbyvajecca ciapier?
«Budoŭla staić, mnohija vykanaŭcy ŭ sudach sa «Słaŭkalijem». Nabytaje abstalavańnie pakrysie psujecca, bo kansiervacyja nie zroblena i nie apłočana, — raskazaŭ adzin z subpadradčykaŭ. — Jeŭrapiejskija kampanii admaŭlajucca pracavać z kampanijaj, navat kali b znajšlisia hrošy — sankcyi».
«Spačatku było adčuvańnie, što praz paŭzu kitajcaŭ stanie niemahčymym dalejšaje budaŭnictva i raźvićcio prajekta, ale situacyja takaja, što i vykanany front rabot nie mohuć zakryć [apłacić]», — dadaje subpadradčyk.
Syn Huceryjeva, jaki trapiŭ pad zachodnija sankcyi, syšoŭ z kiraŭnictva naftapierapracoŭčaj kampanii
«Ëść niejkaja mituśnia aliharchaŭ, niejkija miždziaržaŭnyja kredyty i dziaržaŭnyja abaviazki — usio vielmi składana. A jość realny bok: prostyja padradčyki, budaŭniki i pastaŭščyki abstalavańnia, jakija rabili rabotu, a ciapier nie mohuć atrymać svaje hrošy za techniku i pasłuhi», — adznačaje supracoŭnik biełaruskaj budaŭničaj kampanii.
Jak stała viadoma «Našaj Nivie», ciapier zamiest rabočych na budaŭničaj placoŭcy pracujuć acenščyki majomaści ad bankaŭ.
«Viadziecca vialikaja rabota pa acency majomaści. Takoje byvaje pierad uhodami pa prodažy. Ale tam strach: hihanckija daŭhi, finansavyja pierakosy», — kaža nam abaznanaja krynica.
«Pradavać «Słaŭkalij» Huceryjeva padšturchoŭvajuć banki i kitajcy, — ličyć jašče adzin dziejač, jaki sočyć za pytańniem. — U jaho, u pryncypie, prablem z bankami «vyšie kryši»! A adziny realny pakupnik «Słaŭkalija» ciapier — «Urałkalij». Tamu što «Biełaruśkaliju» paśla sankcyj treba dumać, jak vyžyvać samomu. Nie da pašyreńnia i nie da pahłynańnia «Słaŭkalija», choć raniej takija płany i byli».
Razam z hetym, krynicy «Našaj Nivy» ličać, što farsiravać praces nichto nie budzie.
«Uličvajučy sankcyjnyja ryzyki i poŭnyja tumanu pierśpiektyvy što pa «Słaŭkalii», što pa Łukašenku, što pa Biełarusi, ruskija naŭrad ci buduć śpiašacca.
Tut, imavierna, nie stolki «Urałkalij» choča kupić hetaje dabro, kolki «Słaŭkalij» choča niejak raźviazać hety vuzieł», — ličyć naš surazmoŭca.
«Urałkalij» vyrašyŭ pahłybicca ŭ hetaje pytańnie i ŭvajści ŭ pieramovy, vyvučyć usio, padpisać niejkija ramkavyja pahadnieńni, moža być, zrabić jakuju-niebudź hučnuju zajavu, kab stajać pieršymi ŭ čarzie na aktyŭ, kali situacyja stanie bolš-mienš prahnazavanaj», — reziumuje ekśpiert.
Nahadajem, raspracoŭka Niežynskaha radovišča — ambicyjny prajekt Michaiła Huceryjeva, rasijskaha milijardera, nabližanaha da Alaksandra Łukašenki. Jašče ŭ 2011-m dziaržaŭnyja ŚMI spravazdačylisia, što «rasijski miljarder układzie ŭ ekanomiku respubliki 1,5 miljarda dalaraŭ dla raspracoŭki Niežynskaha radovišča kaliju pad Lubańniu».
Pa fakcie Huceryjeŭ uziaŭ u kitajcaŭ kredyt na 1,4 miljarda dalaraŭ na budaŭnictva horna-ŭzbahačalnaha kambinata pad harantyi biełaruskaha ŭrada.
Svaich hrošaj u Niežynskaje radovišča Huceryjeŭ, pa roznych acenkach, ukłaŭ ad 250 da 600 miljonaŭ dalaraŭ.
Kamientary