«My vyzvalim usio, nastroj bajavy». Biełaruski dobraachvotnik vajuje za Ukrainu

Źmicier Pałojka ŭ 2015 hodzie

«Ludzi hurtujucca vakoł svajho vojska i za svaju ziamlu»

Źmicier napisaŭ zajavu ŭ bataljon terytaryjalnaj abarony ŭ Danieckaj vobłaści ŭ kancy 2021 hoda, kali zamiežnyja vyviedki i ŚMI pačali masava paviedamlać ab planach Pucina pačać novy etap ahresii na Ukrainu.

Terytaryjalnuju abaronu jak asobny rod Uzbrojenych vojskaŭ Ukrainy stali stvarać u pačatku 2022-ha. Źmicier pačaŭ słužbu adnym ź pieršych — u studzieni, niepadalok ad pieršaj linii frontu kala časova akupavanych terytoryjaŭ.

«Pastajanna hučyć kamanda «pavietra», sprabujuć zapuskać rakiety, našy ich źbivajuć. U pieršy dzień, 24 lutaha, jany stralali pa aeradromie, ale strataŭ nie było. Usie žyvyja. U pryncypie ŭ nas spakajniej, čym u inšych rehijonach, dzie iduć niaspynnyja abstreły i vuličnyja bai. My čakajem i rychtujemsia ich sustreć», — kaža Źmicier.

Pavodle jaho, u terytaryjalnuju abaronu Danieckaj vobłaści zapisalisia vielmi šmat ludziej, a tyja, chto nie moža słužyć z roznych pryčynaŭ, aktyŭna dapamahajuć vojsku, čym mohuć — hatujuć ježu i kaktejli Mołatava, jakija va Ukrainie ciapier nazyvajuć «banderaŭskija smuzi».

«Dla haradskich umovaŭ boju naš bataljon maje ŭsio nieabchodnaje. Miascovaje nasielnictva taksama dapamahaje. Ludzi nahetulki zhurtavalisia! Usio jeduć i jeduć, niešta prapanujuć. Mianie heta ździviła, kali ščyra, bo kali zhadvać, jak usio było ŭ 2014 hodzie, to tady tut była zusim inšaja śviadomaść. Absalutna. Ciapier prychodziać ludzi, jakija słužyli ŭ savieckich vojskach i navat niekali nie byli suprać Rasii i Pucina, a ciapier kažuć — «A ź jakoha ražna Pucin da nas prypiorsia»? Takoha nachabstva jany nie čakali. Ludziej vielmi-vielmi šmat, nasamreč možna druhi bataljon źbirać».

«My prykryvajem tył pieršaj linii frontu»

Źmicier kaža, što jahony bataljon prykryvaje tył pieršaj linii frontu, jakaja adździalaje hetak zvanyja «narodnyja respubliki» ad Ukrainy. «Supraciŭnik sprabuje prarvacca praz charkaŭski kirunak, praź Izium. I my mienavita hetuju častku prykryvajem, kab nie zajšli da nas z tyłu».

«Pieršaja linija mocna trymajecca. Tam ludzi dobra padrychtavanyja za stolki hadoŭ. Jany navučylisia vajavać. Da taho ž tam jość akopy, blindažy, usio prastrelena i prystrelena, usie kvadraty całkam vyznačanyja. My hatovyja, nastroj bajavy, asabliva kali bačyš, u jakim demaralizavanym stanie znachodzicca supraciŭnik. U nas vialiki dośvied u bajavych dziejańniach», — raskazvaje biełaruski dobraachotnik.

«Musim tłumačyć, što biełarusy i Łukašenka — nie tojesnyja paniaćci»

Źmicier Pałojka śćviardžaje, što nie sutykaŭsia ŭ svaim asiarodździ z kiepskim staŭleńniem jak da biełarusa.

«Da mianie staviacca vydatna, bo ja patłumačyŭ usim, što biełarusy — heta biełarusy, a tyja, chto padtrymlivaje Łukašenku, — heta łukašysty. Usie razumiejuć, što sama biełaruskaja armija nie žadaje vajavać z ukraincami. Kali pačali paviedamlać, što nibyta biełaruskaja armija pierajšła miažu ź simvałam «O» na technicy, to takim čynam, ja liču, Rasija choča maksimalna zaciahnuć biełaruskija vojski ŭ hetuju vajnu», — patłumačyŭ Źmicier Pałojka.

Pavodle jaho, Łukašenka asabista pradastaviŭ rasijskim vojskam terytoryju Biełarusi dla bajavych dziejańniaŭ suprać Ukrainy.

«Ale heta nijak nie stykujecca z tym, ci biełarusy chočuć vajavać. Biełarusy nie napadajuć, tamu nie treba pisać pra biełarusaŭ, treba pisać mienavita pra łukašystaŭ, jak jość. Hetaksama jak adroźnivajucca Kadyraŭ i čačency. Razumiejecie? Čačency buduć vajavać za Ukrainu, a kadyraŭcy — za Rasiju. Maje znajomyja razumiejuć, što ŭ Biełarusi šmat ludziej suprać režymu i suprać Rasii».

«Partyzanskaja vajna ŭ Biełarusi dapamahła b Ukrainie»

Źmicier Pałojka pierakanany, što biełaruskija vajskoŭcy nie pahodziacca iści na vajnu va Ukrainu. U advarotnym vypadku jon raić biełarusam składać zbroju na terytoryi Ukrainy biez adzinaha strełu i zdavacca ŭ pałon.

«Siudy mohuć nakiravać prezidencki połk z Marjinaj Horki, ale ŭ suviazi z tym, što ŭ ich bajavoha dośviedu niama, a tolki dośvied razhonu demanstracyjaŭ, to ja dumaju, što jany tut doŭha nie pratrymajucca. A kali ŭžo sapraŭdy tak adbudziecca, što biełarusaŭ, desantnikaŭ ci inšyja vojski buduć zakidvać va Ukrainu, to niachaj jany nie saromiejucca, zachoplivajuć svaich kamandziraŭ i zdajucca ŭkraincam. Ich nichto nie budzie čapać, bo ŭsie va Ukrainie ŭsprymajuć biełaruski narod jak braterski. I navat kali patrebny budzie prytułak, usie jaho atrymajuć».

Biełarus kaža, što ciaham hetaj vajny ŭkrainskaja armija pakazała svaju moc. «Tamu nie pavinna być sumnievaŭ u tym, što ŭkrainskaja armija moža nk tolki ŭtrymlivać svaje pazicyi, a jašče i vyzvalać svaje terytoryi», — pierakanany jon.

«A kali biełaruski narod zmoža adkryć partyzanskuju vajnu, heta budzie nadzvyčajnaja dapamoha Ukrainie», — padkreśliŭ jon.

«Ja nie vieru pałonnym rasiejcam. Jany viedali, što jeduć na vajnu»

Źmicier Pałojka taksama ździŭleny tym, jak rasiejcy, zachoplenyja ŭ pałon ukrainskim vojskam, hublajuć «vajskovy stryžań» i pačynajuć raskazvać na dopytach, što nie viedali, kudy ich nakiroŭvajuć, u adzin hołas śćviardžajučy, što «byli na vučeńniach».

«Ja hetamu nie vieru, i nichto nie vieryć. My ŭsie razumiejem, što im tak zahadali kazać u vypadku pałonu. Jak heta było i ŭ 2014 hodzie, kali jany «zabłukali» ŭ Danieckaj i Łuhanskaj abłaściach. Usie jechali na vajnu, była mocnaja prapahanda suprać Ukrainy, i ŭsie ŭsio razumieli. Bolš za toje, u internecie i sacyjalnych sietkach šmat ź ich pisali, što jeduć va Ukrainu — zabivać ukraincaŭ i zachoplivać Ukrainu. Prapahanda im pramyła rozum. Jany śviadoma jechali zabivać. Jany ž stralajuć, a nie prosta zajechali, ahledzielisia, nie zrazumieli, dzie znachodziacca, i zdalisia. Asabliva artylerysty ci tyja, jakija bjuć z załpavych sistemaŭ pa žyłych rajonach. Jak paśla hetaha možna skazać, što jany byli na vučeńniach? Jany usio rabili śviadoma», — pierakanany Źmicier Pałojka.

• 0
• 0
• 0
• 0
• 0
• 0
• 0
• 0