«Dla Biełarusi — tolki charčy i leki». Zachodnija kampanii admaŭlajucca pracavać z aficyjnym Minskam

«Našy dumki na baku paciarpiełych ad vajny ŭkraincaŭ»

«Lidskaje piva» — adzin z najstarejšych biełaruskich brovaraŭ. U 2008 hodzie 51% akcyj pradpryjemstva vykupiła finskaja kampanija OLVI, heta kaštavała finam 16 miljonaŭ dalaraŭ. Praz hod OLVI daviała svaju dolu ŭ biełaruskaj kampanii da bolš jak 87%. Brend paśpiachova raźvivaŭsia, adnak 5 sakavika 2022 hoda finy paviedamili pra namier pakinuć Biełaruś, niahledziačy na toje, što «Lidskaje piva» prynosić piatuju častku prybytkaŭ kampanii.

«Situacyja va Ukrainie nadzvyčaj surjoznaja, i našy dumki na baku paciarpiełych ad vajny ŭkraincaŭ. My rašuča asudžajem napad na Ukrainu. My imkniomsia pracavać u adpaviednaści z kaštoŭnaściami Olvi, i heta adzinaje razumnaje rašeńnie dla zabieśpiačeńnia doŭhaterminovaj i adkaznaj dziejnaści», — skazaŭ Penci Chakarajnen, staršynia praŭleńnia Olvi.

 Što budzie z «Lidskim pivam» dalej i kudy pojduć 840 supracoŭnikaŭ pradpryjemstva, pakul nieviadoma. Finy praciahvajuć płacić im zarobak da momantu poŭnaha zakryćcia.

 «Sa škadavańniem infarmujem vas»

Šviedskaja karparacyja IKIEA paviedamiła pra namier pakinuć Rasiju i Biełaruś amal adrazu paśla pačatku vajny va Ukrainie. U Rasii hety krok moža pakinuć biez pracy dziasiatki tysiač čałaviek — supiermarkiety karparacyi jość u kožnym bolš-mienš vialikim horadzie. U Biełarusi ich niama, adnak rašeńnie šviedaŭ usio adno adabjecca na biełaruskich vytvorcach, jakija supracoŭničali ź IKIEA. Prynamsi adna fabryka ŭžo paviedamiła, što z 6 sakavika idzie ŭ vymušany prastoj.

 «Sa škadavańniem infarmujem vas ab časovym prypynieńni pracy ZTAA «Mebiełajn» u suviazi z šeraham pryčyn, a mienavita: prypynieńniem pastavak šeraham zamiežnych pastaŭščykoŭ syraviny i materyjałaŭ, zapasnych i kamplektnych častak, prypynieńniem zbytu na adras IKEA ŭ poŭnym abjomie», — havorycca ŭ paviedamleńni kiraŭnictva mahiloŭskaj fabryki «Mebiełajn». Kampanija była adkrytaja ŭ svabodnaj ekanamičnaj zonie «Mahiloŭ» u 2013 hodzie, tam pracavała 860 čałaviek.

Akramia «Mebiełajna», u Biełarusi IKEA ščylna supracoŭničała z cełym šeraham vytvorcaŭ i fabryk, u tym liku dziaržaŭnych. Siarod ich dziaržaŭny «Minski meblevy centr» z Maładziečna, mahiloŭski vytvorca tekstylu «Mahateks», minski hadzińnikavy zavod «Łuč» i inšyja.

 Booking.com i Airbnb

Abodva servisy reziervavańnia žytła adnačasova pakinuli rynki Biełarusi i Rasii. Pry pošuku žytła ŭ haradach Biełarusi abodva jany nie vydajuć nivodnaha varyjanta raźmiaščeńnia.

Hiendyrektar Booking Hlen Fohiel u sacsietcy LinkedIn paviedamiŭ, što dziejnaść płatformy ŭ abiedźviuch krainach prypynienaja z pryčyny «rostu składanaściaŭ viadzieńnia biznesu ŭ rehijonie» i zaklikaŭ abjadnoŭvać namahańni dla dasiahnieńnia miru.

Suzasnavalnik i hiendyrektar Airbnb Brajan Česki ŭ svaim tviter-akaŭncie paćvierdziŭ «prypynieńnie ŭsich apieracyj» u Rasii i Biełarusi. U servisie paviedamili, što hatovyja apłacić pražyvańnie ŭ krainach Jeŭrasajuza dla sta tysiač uciekačoŭ z terytoryi Ukrainy. Biełarusam, jakija zdavali žyllo z dapamohaj zhadanych servisaŭ, pryjšli paviedamleńni ad kampanij pra toje, što im nieŭzabavie rastłumačać situacyju.

 «Dla Biełarusi tolki charčy i leki»

Dackaja transpartna-łahistyčnaja kampanija Maersk, čyje kantejniery jašče možna ŭbačyć u biełaruskich łahistyčnych centrach i na pradpryjemstvach, zajaviła ab spynieńni pieravozak hruzaŭ u Biełaruś 4 sakavika.

 «U dalejšym dla Biełarusi paśla šyrokaj pravierki buduć prymacca tolki zakazy na pradukty charčavańnia, leki i humanitarnyja tavary (akramia tavaraŭ dvajnoha pryznačeńnia), — havorycca ŭ zajavie kampanii. — Hetaje vyklučeńnie pavinna padkreślić, što Maersk zasiarodžvajecca na sacyjalnaj adkaznaści i prykładaje namahańni dla padtrymki hramadstva, niahledziačy na ŭskładnieńni i niapeŭnaść u ciapierašnim łancuhu pastavak».

Razam z datčanami ab sychodzie ź biełaruskaha rynku paviedamili DHL i FedEx.

Śpis zachodnich kampanij, jakija zajaŭlajuć pra namier pakinuć Biełaruś z ułasnaha žadańnia, štodnia pavialičvajecca.

 Pavodle infarmacyi «Svabody», nieŭzabavie takuju zajavu moža zrabić šviejcarskaja Stadler, jakaja maje zavod dla vytvorčaści ciahnikoŭ la Fanipala. Kolkaść nievialikich IT-kampanij, jakija spyniajuć supracoŭnictva ź biełaruskimi rezidentami, taksama raście z kožnym dniom.

• 0
• 0
• 0
• 0
• 0
• 0
• 0
• 0