«Abmianiali nacystaŭ na kuma», «nasrali na hałavu». U rasijskich pablikach hnieŭ i razhublenaść
Učora stała viadoma pra vyzvaleńnie 215 ukrainskich pałonnych, u tym liku 108 abaroncaŭ «Azoŭstali». Siarod ich — hałoŭnyja kamandziry «Azova». Navina stała nahodaj dla radaści va Ukrainie i sapraŭdnym šokam dla rasijskich šavinistaŭ. Tym bolš, što azoŭcaŭ pamianiali na kuma Pucina, hramadzianina Ukrainy, aliharcha Miedźviedčuka. Pahladzieli, što ŭ Rasii i Ukrainie kazali pra mahčymy abmien azoŭcaŭ raniej i jak reahujuć ciapier.
Što adbyłosia
Sierada 21 vieraśnia pačałasia z «małanki» — abjaŭleńnia ŭ Rasii mabilizacyi, što stała pieršym šokam dla rasijan, jakim uvieś čas kazali, što va Ukrainie «ŭsio idzie pa płanie».
Skončyŭsia dzień taksama topavaj navinoj: vyzvalenyja 215 ukraincaŭ, rasijanam pa abmienie pieradali Miedźviedčuka. Jak paviedamiŭ kiraŭnik Ofisa prezidenta Ukrainy Andrej Jarmak, 108 z 215 ukrainskich vajskoŭcaŭ — abaroncy «Azoŭstali».
«My abmianiali 200 našych hierojaŭ na Miedźviedčuka, jaki ŭžo daŭ usie mahčymyja pakazańni śledstvu. A 5 hierojaŭ — kamandziraŭ «Azoŭstali» — na 55 rasijskich pałonnych, jakija nie majuć dla nas nijakaj cikavaści», — paviedamiŭ kiraŭnik Ofisa prezidenta Ukrainy Andrej Jarmak.
U lik abmianianych patrapili hałoŭnyja kamandziry «Azova» — Dzianis Prakapienka «Radys», Śviatasłaŭ Pałamar «Kalina» i Siarhiej Vałynski «Vałyna».
Čytajcie taksama: Futbolny fanat biez vajskovaj adukacyi. Chto taki Dzianis Prakapienka, jaki kamanduje hieraičnaj abaronaj Maryupala
Bolš za toje, Rasija adpuściła 10 vajennapałonnych — hramadzian roznych krain, u tym liku traich asudžanych na śmierć «sudom DNR» — brytancaŭ Šona Pinera, Ejdena Aślina i marakanca Saaduna Brahima.
Heta stała hałoŭnaj navinoj va ŭkrainskich ŚMI. Rasijskija dziaržaŭnyja ŚMI pra abmien amal paŭsutak prosta maŭčali.
Jak raniej kamientavali mahčymy abmien azoŭcaŭ?
Vyzvaleńnie pałonnych azoŭcaŭ było adnoj z hałoŭnych met dla ŭkrainskich uładaŭ. Ukrainskija ŭłady skupa paviedamlali, što robiać usio dla vyzvaleńnia.
Rasijskaja ž prapahanda ŭvieś čas nahniatała isteryju vakoł azoŭcaŭ.
Jašče ŭ mai kiraŭnik samaabvieščanaj respubliki «DNR» Dzianis Pušylin zajaviŭ, što ŭsie ŭkrainskija vajskoŭcy, jakija zdalisia ŭ pałon na zavodzie «Azoŭstal» u Maryupali, znachodziacca na terytoryi «DNR», dzie ich addaduć pad trybunał. Pavodle rasijskich ŚMI, u pałon zdalisia kala 2500 čałaviek.
Kijeŭ adrazu zajaviŭ, što «azoŭcy» buduć abmienienyja na rasijskich pałonnych, a trybunał nad kadravymi vajskoŭcami USU — niezakonny.
A voś Leanid Słucki, staršynia kamiteta Dziarždumy pa mižnarodnych spravach i kiraŭnik frakcyi ŁDPR, udzielnik na toj čas pieramoŭnaha pracesu, paabiacaŭ, što ŭ Maskvie vyvučać mahčymaść abmienu na «azoŭcaŭ» zatrymanaha raniej Viktara Miedźviedčuka.
Ale słovy Słuckaha patanuli ŭ abureńni.
Śpikier Dziarždumy Viačasłaŭ Vałodzin zajaviŭ, što ŭziatych u pałon «vajennych złačyncaŭ» nielha abmieńvać, ich nieabchodna sudzić. «Nacysckija złačyncy nie pavinny padlahać abmienu. Heta vajennyja złačyncy, my pavinny rabić usio dla taho, kab jany paŭstali pierad sudom», — skazaŭ Vałodzin.
Na hetym ža nastojvali prapahandysty, u tym liku Uładzimir Sałaŭjoŭ.
«Vyjści takimi rok-zorkami, kab ich ciapier pamianiali na niejkaha Mieviedčuka? Ukrainskaha hramadzianina… Kali zaraz my pačniom hulacca z hetaj chvoraj temaj, narod nam hetaha nie daruje», — nahniataŭ Sałaŭjoŭ.
Pradstaŭnik Kramla Dźmitryj Piaskoŭ taksama vykazaŭ sumnieńnie nakont mahčymaści abmienu ŭkrainskaha palityka Viktara Miedźviedčuka na vajskoŭcaŭ bataljona «Azoŭ».
Jon adznačyŭ, što Miedźviadčuk — ukrainski hramadzianin, jaki nie maje dačynieńnia da RF i nie źjaŭlajecca vajskoŭcam. «Tamu Miedźviadčuk i nacyjanalisty, jakija zdalisia ŭ pałon u Maryupali, — heta dźvie roznyja katehoryi asob, i ŭ hetaj situacyi naŭrad ci možna abmiarkoŭvać niejkija abmieny», — skazaŭ jon.
Alenaŭka
29 lipienia ŭ Alenaŭcy na Danbasie zdaryłasia trahiedyja. 53 ukrainskija pałonnyja zahinuli pry vybuchu ŭ baraku za 10 km ad linii frontu. Pry hetym nie zahinuŭ nivodzin kanvair. Ukraincy zajavili, što ŭdar insceniravała Rasija i što mieła miesca adno z samych strašnych vajennych złačynstvaŭ za ŭvieś čas vajny.
U čakańni «trybunała»
Na pačatku žniŭnia Dzianis Pušylin zajaviŭ, što samaabvieščanaja «DNR» rychtujecca pravieści «trybunał» nad ukrainskimi vajennapałonnymi ŭ Maryupali. «Trybunał niepaźbiežny, i adzin ź pieršych trybunałaŭ budzie ŭ Maryupali», — zajaviŭ Pušylin.
Mer Maryupala Vadzim Bojčanka zajaviŭ, što rasijanie mohuć pravieści sud nad ukrainskimi vajennapałonnymi ŭ Dzień niezaležnaści Ukrainy, 24 žniŭnia, što na scenie miascovaj fiłarmonii ŭžo pastavili turemnyja kletki, i mabyć, tam «trybunał» i projdzie.
Byli apublikavanyja foty kletak, jakija ŭražvali hruntoŭnaściu kanstrukcyi.
Uładzimir Zialenski adkazaŭ na heta koratka. Jon zajaviŭ, što «trybunał» nad ukrainskimi vajennapałonnymi «adreža Rasiju ad pieramovaŭ».
«Kali hetaje ahidnaje sudzilišča adbudziecca, kali našych ludziej u parušeńnie ŭsich damoŭlenaściej, usich mižnarodnych pravił zaviaduć u hetyja dekaracyi, budzie ździek, heta stanie toj linijaj, paśla jakoj lubyja pieramovy niemahčymyja. Rasija sama siabie adreža ad pieramovaŭ», — zajaviŭ 22 žniŭnia Zialenski.
Pušylin adrazu adkazaŭ, što zajavy Zialenskaha nie sarvuć praviadzieńnie «trybunała» ŭ Maryupali.
Śpikier rasijskaj Dziarždumy Vałodzin 23 žniŭnia taksama zrabiŭ zajavu, što «chutka adbudziecca trybunał nad nacystami». «Pierad im pavinny paŭstać vajennyja złačyncy, jakija zabivali, hvałtavali, źniščali i trymali ŭ strachu mirnaje nasielnictva Danbasa.
Važna, kab sudovaje pasiedžańnie było publičnym. Usie jaho čakajuć», — napisaŭ jon u telehramie.
«Trybunał» u žniŭni nie adbyŭsia.
U vieraśni źjaviłasia jašče adna znakavaja navina nakont abmienu, pra jakuju raniej u publičnaj prastory nie kazali. Zialenski zajaviŭ, što padtrymaje ideju adnaŭleńnia ekspartu rasijskaha amijaku praz Ukrainu ŭ vypadku, kali Maskva viernie ŭkrainskich vajennapałonnych.
U Kramli hetuju prapanovu Zialenskaha adchilili. «Chiba ludzi i amijak — heta adno i toje ž?», — zajaviŭ pres-sakratar Pucina Dźmitryj Piaskoŭ TASS.
Zdavałasia, pieramovy zajšli ŭ tupik.
I voś 21 vieraśnia niečakanaja naviny — vyzvaleńnie pałonnych.
Jak adreahavali pabliki?
Abureńnie — hałoŭnaje pačućcio, jakoje panuje ŭ rasijskich šavinistyčnych pablikach. I, zrazumieła, zusim inšaje — u ich praciŭnikaŭ. Voś davoli typovyja kamientaryi.
Nu i Iharu Hirkinu (Strałkovu) sapsavali jaho asabistaje śviata — dzień abviaščeńnia mabilizacyi.
«Heta horš, čym złačynstva… i horš, čym pamyłka. Heta — nieprachodnaje hłupstva. Abo — adkrytaje škodnictva. Zrabić heta chacia b za paru dzion da ŭkaza prezidenta da mabilizacyi, vidać, nielha było….
Viedajecie, jak heta vyhladaje? A tak: vyjšli da naroda, zaklikali «pastajać za ziamlu ruskuju», a potym… a potym tym, chto adhuknuŭsia, nasrali prosta na hałavu. Adkryta, hłumliva, sa śmiaškami i prymaŭkami.
Nijak inakš asabista ja takuju «miratvorčaść» u dzień abviaščeńnia mabilizacyi ŭsprymać nie mahu», — napisaŭ jon.
Mabilizacyja niepaźbiežnaja i ŭ Biełarusi? Tłumačać śpiecyjalisty
Apublikavany prajekt źmienaŭ u zakon ab hramadzianstvie. Jaho płanujuć pazbaŭlać tych, kaho nie mohuć pasadzić. A pra VNŽ abaviažuć paviedamlać u orhany
«Tadžyki vyjšli pieramožcami, ale heta nie kanflikt stalic». Uschodaznaŭca patłumačyŭ pryčyny i nastupstvy sutyknieńnia Tadžykistana i Kyrhyzstana
«Vialiki absalutna čałaviek». Kola Łukašenka raskazaŭ, što dla jaho baćka i ŭ čym jahonaja apazicyjnaść22
Kamientary