Čamu biełaruskija banki na čverć zanižajuć kurs rasijskaha rubla? Tłumačyć ekanamist
Biełaruskija banki kuplajuć 100 rasijskich rubloŭ za 3 biełaruskija, a pradajuć za 4. Čamu taki istotny razryŭ pamiž kursam kupli i prodažu rasijskaj valuty?
Ekśpiert BEROC Anastasija Łuzhina nazyvaje takija miery vymušanymi, pakolki ŭ advarotnym vypadku Biełaruś mahła b sutyknucca z surjoznymi prablemami na valutnym rynku, kali b roźnica pamiž kursami kupli i prodažy rasijskaha rubla zastavałasia ŭ miežach 2-3 pracentaŭ.
Paŭstaŭ surjozny dysbałans pamiž popytam i prapanovaj
«Z pačatkam vajny Centrabank RF staŭ uvodzić žorstkija abmiežavańni na kuplu i źniaćcie valuty, niekatoryja ź jakich dziejničajuć i ciapier. U Biełarusi ž padobnych zachadaŭ nie było. U suviazi z hetym da nas stała jeździć usio bolš rasiejcaŭ, jakija hatovyja byli mianiać svaje rubli na valutu albo vydatkoŭvali ich unutry Biełarusi na adpačynak i pakupki. Akramia taho, z rasijskaha rynku stali sychodzić mnohija brendy, u suviazi z čym staŭ papularny šopinh u Biełarusi. Pa hetych pryčynach paŭstaŭ surjozny dysbałans pamiž popytam i prapanovaj na najaŭnuju rasijskuju valutu», — tłumačyć ekśpiert.
Vychodzić, što 25-pracentnaja roźnica pamiž kursam kupli i prodažu dazvalaje biełaruskim bankam źnizić nahruzku na valutnym rynku i pamienšyć dysbałans pamiž popytam i prapanovaj. Ale heta jašče nie kaža pra toje, što realny kurs rasijskaha rubla na cełuju čverć nižejšy, čym aficyjny.
«Ludziej u asnoŭnym cikavić kupla dalaraŭ abo jeŭra, tamu kali b pamiž kursami kupli i prodažu rasijskaha rubla była roźnica ŭ niekalki adsotkaŭ, to rasiejcy masava stali b jeździć pa valutu ŭ Biełaruś. Heta stvaryła b ciažkaści nie tolki bankam, jakija pavinny zabiaśpiečvać svaje abmiennyja punkty najaŭnaj valutaj, ale i mahło b destabilizavać situacyju na valutnym rynku krainy», — kaža ekanamist.
Akramia taho, ekśpiert pakazvaje na nizki popyt na najaŭnuju rasijskuju valutu siarod biełaruskaha nasielnictva. Zališniaja kolkaść najaŭnych rasijskich rubloŭ stvaraje niazručnaść biełaruskim bankam.
U Rasii dahetul isnujuć valutnyja abmiežavańni
Taksama varta nie zabyvać, što ŭ Rasii pa-raniejšamu dziejničajuć niekatoryja abmiežavańni na kuplu valuty i jaje pieravod u najaŭnyja. U dadatak da hetaha majecca dvaistaść kursaŭ. Kupić najaŭnuju valutu pa kursach Centrabanka niemahčyma. U Rasii roźnica pamiž aficyjnym kursam i tym, za jaki realna možna kupić najaŭnyja, składaje kala 10%. Aficyjny kurs dalara da rasijskaha rubla składaje 61,59 rubla, a ŭ abmieńnikach valutu možna kupić tolki pa kursie 66-67 rasijskich rubloŭ za dalar.
Akramia hetaha, u RF isnuje prablema z atrymańniem najaŭnaj valuty, jakaja zachoŭvajecca na rachunkach. Chutka i biez prablem abnajavić ich možna tolki ŭ nacyjanalnaj valucie pa aficyjnym kursie. A mianiać na dalary pryjdziecca pa kursie abmieńnikaŭ. Vychodzić, što čałaviek, u jakoha na valutnym rachunku zachoŭvajecca 10 tysiač jeŭra, najaŭnymi zmoža atrymać tolki kala 9 tysiač.
Banki imknucca skaracić prytok najaŭnych rasijskich rubloŭ
«Kali ž kazać pra bieznajaŭnyja rasijskija rubli, to tam situacyja vyhladaje inakš, pakolki raźlik za tyja ž enierhanośbity idzie ŭ rublach. Akramia taho ŭ nas vyrasła dola impartu rasijskich tavaraŭ, ale dla hetaha nie patrebnyja najaŭnyja. Heta jašče adna pryčyna, čamu našy banki hatovyja kuplać rasijskuju valutu pa takim zanižanym kursie. Zachoŭvańnie, transparciroŭka hrošaj — heta ŭsio lišnija vydatki dla finansavych instytutaŭ. Tamu banki takim čynam imknucca skaracić prytok najaŭnych rasijskich rubloŭ».
Jak doŭha moža praciahnucca takaja situacyja — skazać składana, adnak vidavočna, što pakul u Rasii buduć isnavać dvaistaść kursaŭ, abmiežavańni na kuplu i atrymańnie najaŭnaj valuty, a popyt na rasijskija rubli ŭ Biełarusi budzie šmatrazova nižejšym za prapanovu, u biełaruskich bankaŭ nie źjavicca ni žadańnia, ni mahčymaści skaracić deltu da 2-3%, jakuju my možam nazirać u dačynieńni da dalara, jeŭra i inšych valut.
Čytajcie taksama:
Łukašenka siońnia zajaviŭ, što ŭžo razmovy ab tatalnaj zamarozcy cen nie idzie
Čaho nie ŭličvaje Natalla Kačanava? Ekanamist Lvoŭski raspaviadaje, pra što nie dumajuć čynoŭniki, prymajučy papulisckija rašeńni
Papularny tyktokier z Rasii tusić u darahich restaranach Minska: «Byccam bamžu padali. Žarycie, na zdaroŭje»12
Kamientary