Prakuratura paćvierdziła kryminalnuju spravu suprać žurnalista Dźmitryja Siemčanki: raspalvańnie varožaści
«Ustanoŭlena, što padazravany ŭ 2020-2022 hadach u roznych telehram-kanałach i čatach raźmiaściŭ publikacyi, nakiravanyja na farmiravańnie ŭ hramadskaści varožaści i nianaviści da supracoŭnikaŭ pravaachoŭnych orhanaŭ, vajennasłužačych i pradstaŭnikoŭ ułady», — havorycca ŭ paviedamleńni viedamstva.
Takim čynam u dačynieńni da žurnalista zaviali kryminalnuju spravu za raspalvańnie sacyjalnaj varožaści (č.1 art. 130 Kryminalnaha kodeksa Biełarusi), što praduhledžvaje da piaci hadoŭ pazbaŭleńnia voli.
«Z ulikam abstavinaŭ zroblenaha i asoby padazravanaha» u dačynieńni da jaho abranaja miera zaklučeńnia ŭ vyhladzie ŭtrymańnia pad vartaj.
Pieršapačatkova Dźmitryja Siemčanku zatrymali 15 vieraśnia nibyta za «reposty z ekstremisckich telehram-kanałaŭ». Pakolki siamja vychoŭvaje niepaŭnaletniaha syna, maci abyšłasia štrafam u pamiery 960 rubloŭ, a Dźmitryja aryštavali na 15 sutak — praŭda, užo z novaj farmuloŭkaj «za chulihanstva». Takoje rašeńnie 16 vieraśnia pryniała sudździa Frunzienskaha rajona Minska Julija Bliźniuk.
U vyznačany termin Dźmitryja Siemčanku na svabodu nie vypuścili — 30 vieraśnia ŭ Frunzienskim RUUS skłali novy pratakoł. Čarhovy sud pryznačyŭ fihurantu pakarańnie terminam 13 sutak administracyjnaha aryštu — hetym razam za «raspaŭsiud ekstremisckich materyjałaŭ». Adnak 13 kastryčnika, kali minaŭ čarhovy termin, doma Siemčanku znoŭ nie dačakalisia. I ciapier stała viadoma, što ŭsio vielmi surjozna.
Dźmitryj Siemčanka syšoŭ z telekanała ANT, dzie ŭznačalvaŭ puł žurnalistaŭ, jakija pracavali z Alaksandram Łukašenkam, paśla žorstkich razhonaŭ akcyj u žniŭni 2020 hoda. 10 vieraśnia taho ž hoda da jaho pryjšła milicyja. Na nastupny dzień jaho asudzili: vyśvietliłasia, žurnalist byŭ na pratesnym maršy 16 žniŭnia, jašče padčas pracy na dziaržkanale — za heta sud pryznačyŭ jamu 15 dzion aryštu.
Darečy, 29 vieraśnia ŭ kampaniju «Biełahra», dzie Dźmitryj Siemčanka pracavaŭ pres-sakratarom paśla sychodu ź dziaržaŭnaj słužby, pryjšli siłaviki, aryštavali dva dziasiatki śpiecyjalistaŭ ź liku kiraŭnictva i supracoŭnikaŭ. A nieŭzabavie zaviali kryminalnyja i administracyjnyja spravy za ŭdzieł u akcyjach pratestu 2020 hoda i padpiski na «destruktyŭnyja» internet-resursy. Ale z «Biełahra» sprava jaje byłoha pres-sakratara, mahčyma, nie źviazanaja.
Zdajuć u arendu katedž zahinułaha chakieista Cypłakova ŭ Drazdach. Voś interjery FOTY19
Kamientary