«Narešcie hetaha vyradka ŭziali». U čat-ruletcy źjaviŭsia jašče adzin stukač, pa čyich navodkach zatrymlivajuć ludziej
Mazyrski pravakatar Juryj Komar — nie adziny, chto vyłoŭlivaje ŭ čat-ruletcy niełajalnych režymu. Jaho kaleha — były milicyjant, jaki prychodzić u jutub u miedalach. Raskazvajem, što viadoma pra jaho asobu.
Minčuku Iharu Kaniušyku 56 hadoŭ. Mužčyna biespracoŭny, bo maje druhuju hrupu invalidnaści. Viadoma, što jon prachodziŭ słužbu ŭ Afhanistanie ŭ 344-m asobnym bataljonie aeradromna-techničnaha zabieśpiačeńnia.
Pra vajskovuju karjeru Kaniušyka ničoha nie viadoma. U sacyjalnych sietkach mužčyny jość niekalki fota z uznaharodami. Akramia pamiatnych miedaloŭ za vajnu ŭ Afhanistanie, tam jość nahrudny znak «Hvardyja» i kopija ordena Čyrvonaj Zorki.
Paśla demabilizacyi Ihar Kaniušyk uładkavaŭsia ŭ milicyju. Nieviadoma, da jakoha zvańnia jon dasłužyŭsia, ale ŭ 1997 hodzie byŭ zvolnieny za parušeńnie pracoŭnaj dyscypliny. Paźniej atrymaŭ druhuju niepracoŭnuju hrupu invalidnaści.
Mužčyna davoli aktyŭny ŭ internecie, a taksama lubić hulać u kampjutarnyja hulni. Razam z žonkaj (nieviadoma, ci jany aficyjna ŭ šlubie) haduje syna.
Admietna, što ŭ 2011 hodzie jaho zatrymlivali za ŭdzieł u «maŭklivaj» akcyi pratestu 3 lipienia. Tady ŭ intervju Rasijskaj słužbie navinaŭ jon kazaŭ:
«Ja sprabuju źmianić svajo žyćcio, žyćcio ludziej, jakija žyvuć pobač, jakija zmohuć volna chadzić pa horadzie, jakich nie buduć chapać prosta tak z natoŭpu. Ja chaču pakazać, što jość niezadavolenyja ludzi, nie ŭsim dobra žyviecca… U mianie piensija trochi bolšaja za 100 dalaraŭ.
Ja pryjšoŭ u Dzień Niezaležnaści respubliki, apranuŭ svoj kiciel ź miedalami. Ja słužyŭ u Afhanistanie. Ja prosta stajaŭ, mianie ŭziali, zaviali ŭ aŭtobus, zavieźli ŭ RUUS. Ja siadzieŭ u aŭtobusie 5 hadzin. Heta narmalnaja kraina?
Ja hatovy addać svaju piensiju [za dabrabyt svajoj krainy]. Ja invalid druhoj hrupy. Kab tolki być niezaležnym!»
Ale, vidać, pohlady mužčyny z časam kruta pieramianilisia. Jahonyja sacsietki z 2014 hoda — heta skarbnica «vatnaj» prapahandy z proćmaj hieorhijeŭskich stužak i padpiskami na roznyja prarasijskija resursy.
A ŭ 2018 hodzie mužčynu pryznali vinavatym u tym, što jon vykraŭ z kamiery zachoŭvańnia ŭ «Jeŭraopcie» kala Kuncaŭščyny (u byłoj kramie «Talin») rečy nieviadomaj žančyny na 160 rubloŭ. Pa danych «Čornaj mapy Biełarusi», spačatku na jaho zaviali kryminalnuju spravu, ale paźniej pierakvalifikavali ŭ administracyjnuju.
U publičnym poli Ihar Kaniušyk źjaviŭsia ŭ 2021 hodzie. Tady jon stvaryŭ jutub-kanał «Dzied Baradzied», u jakim pravakavaŭ ludziej u čat-ruletcy na roznyja vykazvańni i vykładaŭ heta ŭ sieciva. Praŭda, videa nikoli nie byli nadta papularnymi, a jahonyja kanały pieryjadyčna vydalalisia. Mužčyna nie adčajvaŭsia i stvaraŭ novyja. Litary «z» u apošniaj viersii kanała zamianiŭ na simvały rasijskaj vajennaj prapahandy Z.
Tolki za apošnija čatyry miesiacy Kaniušyk vykłaŭ na svoj jutub-kanał kala 20 videa z pravakacyjami.
U svaich sacsietkach i telehram-kanale mužčyna hłumicca ź śmierci biełaruskich dobraachvotnikaŭ i radujecca kožnamu zatrymańniu.
Viadoma, što ź jaho padačy byŭ zatrymany 23-hadovy Raman Safonaŭ ź Viciebska. Videa z chłopcam na kanale Kaniušyka vyjšła 1 śniežnia. Na im jon vyhladaje niećviarozym i ŭ kancy razmovy kaža pravakataru, što jon byccam «bajec Azova» i «budzie spać ź jahonaj dačkoj». Paśla hetaha da chłopca pryjšoŭ HUBAZiK.
Admietnaja reakcyja samoha Kaniušyka na zatrymańnie i ździek z čałavieka ŭ sacsietkach.
Pravakatary Kaniušyk i słavuty Juryj Komar znajomyja pamiž saboj, pryčym Kaniušyk pačaŭ zajmacca hetym navat raniej. Komar časta dziakuje tavaryšu za «dapamohu ŭ mantažy» i pijaryć jahony kanał.
«Naša Niva» sprabavała źviazacca ź Iharam Kaniušykam, ale jon praihnaravaŭ naš zapyt na kamientar.
«Naša Niva» — bastyjon biełaruščyny
PADTRYMAĆ
Kamientary
Za afhan stoiło pokajaťsia tk eto tožie priestuplenije (hienocyd mirnych) čto siejčas tvorit mordor v Ukrainie.
Słovom eto suŝiestvo produkt sovka i tipičnyj vatnik.