Jak ačyścić usie ekrany ŭ vašym domie

Za apošnija hady technałohii vytvorčaści dyspłejaŭ prasunulisia daloka napierad. OLED- i LCD-ekrany jarčejšyja i chutčej reahujuć, ale ŭ niejki momant usie jany ŭsio roŭna padpadajuć pad uździejańnie pyłu i brudu. Isnuje mnostva ačyščalnych srodkaŭ, jakija śćviardžajuć, što jany mohuć prymusić vaš ekran znoŭ zichacieć, ale my vyjavili, što samy prosty sposab, nasamreč, lepšy.

Jak nielha čyścić ekrany

Zrazumieła, što samaje pieršaje i prostaje, što prychodzić u hałavu — heta kupić śpiecyjalnyja ačyščalniki dla ekranaŭ, jakija pradajucca ŭ kramach elektroniki. Ciapier isnuje šmat vidaŭ srodkaŭ, jakija vykarystoŭvajucca dla ačystki ekrana ad adbitkaŭ palcaŭ i tłustych plam.

Niekatoryja krynicy raspaviadajuć, što vy možacie zrabić rastvor z 50% vady i 50% izaprapiłavaha śpirtu, kali ŭ vas niama pad rukoj śpiecyjalnaha ačyščalnika. Adnak heta budzie nie lepšaj idejaj, bo srodki na asnovie śpirtu i amijaku mohuć paškodzić antyblikavaje pakryćcio ekrana. Tamu nie varta vykarystoŭvać ačyščalnik na asnovie śpirtu, naprykład, dla OLED-ekranaŭ. A paŭtornaje vykarystańnie hetych rečyvaŭ moža ŭvohule pryvieści da pamutnieńnia i niaroŭnaści pakryćcia.

Taksama paźbiahajcie vykarystańnia papiarovych ručnikoŭ, hubak ci anuč, jakija mohuć mieć abraziŭnuju pavierchniu, i inšych hrubych materyjałaŭ, što mohuć paškodzić pakryćcio ekrana. Možna vykarystoŭvać rukaŭ staroj, ale čystaj futbołki, ale vy atrymajecie lepšyja vyniki, vykarystoŭvajučy mikrafibru — hety materyjał najmiakčejšy i dobra pryciahvaje pył.

Narešcie, nikoli nie nanoście ačyščalnik prosta na ekran. Dla kahości heta vidavočna, ale lepš pra heta nahadać. Zamiest hetaha, nalicie krychu rastvoru na miakkuju tkaninu i akuratna pratrycie ekran. Nie davajcie vadkaści traplać unutr noŭtbuka, televizara ci smartfona i nikoli nie pracirajcie ekran mocna, bo heta moža paškodzić jaho. A paśla ačystki dyspłeju lepiej dać jamu vysachnuć pierad tym, jak znoŭ vykarystoŭvać pryładu.

Jak čyścić ekrany

Engaget śćviardžaje, što najlepšym srodkam ačystki dyspłejaŭ źjaŭlajecca dystylavanaja vada. Jana bolš dastupnaja za śpiecyjalnyja srodki dla ačystki, a taksama bolš univiersalnaja, pakolki jaje možna vykarystoŭvać na roznych pavierchniach. I samaje hałoŭnaje — jana nie pakinie nijakich śladoŭ na vašym ekranie. Vy možacie kupić dystylavanuju vadu ŭ aptecy, aŭtakramie ci na aŭtazapraŭcy, albo navat pryhatavać jaje samastojna ŭ chatnich umovach.

Sam praces ačystki dyspłeja vielmi prosty. Kali vy majecie spravu tolki z pyłam, vykarystoŭvajcie ścisnutaje pavietra abo pavietranadzimałku, albo źviarniciesia da suchoj čystaj anučy ź mikrafibry.

Dla bolš składanych zabrudžvańniaŭ namačycie anučku ź mikrafibry nievialikaj kolkaściu dystylavanaj vady, a zatym akuratna pratrycie dyspłej. Paśla taho, jak vy prajšlisia pa ŭsioj pavierchni, pieraviarnicie tkaninu i suchim bokam vydalicie ​​liški vilhaci. Na hetym etapie paźbiahajcie paliroŭki ekrana abo praźmiernaha cisku.

Voś i ŭsio. Ciapier u vas pavinien być čysty dyspłej. Vidavočna, što ačystka bolšaha ekrana zojmie bolš času, ale vy možacie vykarystoŭvać pryviedzienyja parady dla ŭsich typaŭ dyspłejaŭ, uklučajučy televizary, manitory i dyspłei smartfonaŭ.

• 29
• 0
• 2
• 2
• 9
• 5
• 4
• 0