Voś jakija jutub-kanały raić mastactvaznaŭca Mikita Monič.
U novym vypusku na svaim kanale «Kala kultury» Mikita Monič raspačynaje novy cykł videa, pryśviečanych krynicam znajomstva ź biełaruskaj kulturaj i mastactvam. Jon adznačaje, što za apošnija niekalki hadoŭ u internecie na hetuju temu źjaviłasia šmat cikavaha. A za apošnija paŭtara dziesiacihodździa biełaruskaja ličbavaja prastora nazapasiła vialikuju kolkaść materyjałaŭ. Heta videa, skany knih, padkasty, artykuły, sajty.
Ale, jak adznačaje Mikita, isnuje prablema ź ich pošukam — jany drenna «huhlacca». «Časam znajści ich — toj jašče kvest. A hałoŭnaje, čałaviek nie viedaje, što jamu «zahuhlić», dzie i jak znajści patrebnaje».
Tamu Monič sprabuje vybudavać peŭny ałharytm dla tych, chto žadaje paznajomicca ź biełaruskaj kulturaj.
Svoj ahlad jon pačynaje adrazu sa svajho kanała, jaki składajecca ź dźviuch častak i ŭ samym ahulnym vyhladzie znajomić z varyjantami taho, što moža zacikavić u biełaruskim mastactvie: ad staražytnych sakralnych rośpisaŭ, ikanapisu i sarmackich partretaŭ da raznastajnych mastakoŭ XX stahodździa, jakija niejkim čynam byli datyčnyja da biełaruskaj kultury.
Druhaja častka videa składajecca z šerahu epizodaŭ, jakija tak ci inakš zakranajuć asobnyja mastackija fienomieny i roznyja prajavy našaj kulturnaj spadčyny. Na kanale jość videa pra dekaratyŭna-prykładnoje mastactva, malavanyja dyvany, słuckija pajasy, tvory z dreva, rośpisy cerkvaŭ i kaściołaŭ, sałomaplacieńnie.
Voś płejlist.
Mastactvaznaŭca zaŭvažaje, što kanałaŭ, pryśviečanych historyi mastactva i kultury našaj krainy ŭ adukacyjna-zajmalnym farmacie, u jutubie nie šmat. Adziny prykład, jaki jon zdoleŭ adšukać, heta prajekt
Vir.baj
Na žal, adznačaje ahladalnik, ich kanał bolš za hod nie abnaŭlajecca. Adnak na im znachodzicca vialikaja kolkaść lekcyj i materyjałaŭ pra paeziju i litaraturaznaŭstva, historyju mastactva i mastactvaznaŭstva.
Jość šerah prajektaŭ, jakija zakranajuć peŭny bok mastackaj spadčyny Biełarusi. Vialikaja ich kolkaść — piersanalizavanyja kanały.
Chadanovič
Heta kanał pra litaraturu. «Heta źmiastoŭnaść, paetyčnaść raspoviedu, pryhožaja biełaruskaja mova. Kali biełaruskaja litaratura niejkim čynam prajšła mima vas u škole, to hety kanał — dobry sposab heta kampiensavać. Jaho videa pa praciahłaści i rytmie bolš nahadvajuć lekcyi. Pry hetym aŭtar namahajecca raspaviadać dynamična. I navat časam žartuje», — adznačaje Monič.
ŠokinhKult
Mikita Monič zaŭvažaje, što aŭtar kanała Maksim Žbankoŭ jaho zavarožvaje pabudovaju svaich tekstaŭ. «Časam heta cikava, a časam nievierahodna razdražniaje. U peŭny momant ja nie mahu zrazumieć, ci patrebny ja aŭtaru ŭ jakaści hledača. Ci źviartajecca jon choć da kahości? Ci prosta łupić u suśviet, naŭprost vypramieńvaje ź siabie toje, što ŭnutry nie źmiaščajecca».
U lubym vypadku, na dumku Mikity, vypuski Žbankova — jaskravyja pierformansy i ich varta pabačyć.
Mikitu Moniču značna bolš zrazumiełaje toje, što robić muzyčny žurnalist, krytyk, piśmieńnik Alaksandr Čarnucha. Jaho jutub-kanał —
«Ministerstva siepultury»
Videa na hetym kanale, jak zaŭvažaje Monič, «ahladna-nastalhičnyja, a časam aktualna-krytyčnyja. To Alaksandr raspaviadaje, jak u Minsku kaliści adbyŭsia kancert hurta Cannibal Corpse, to krytykuje Cimu Biełaruskich, Maksa Karža ci Michałka. I atrymlivajecca ŭ jaho sapraŭdy cikava i varta ŭvahi».
Tradycyja / Belarusian Traditional Culture
Hety kanał, jak adznačaje Mikita, staŭ dla jaho sapraŭdnym adkryćciom apošnich tydniaŭ. Dziakujučy kanału, možna šmat daviedacca pra biełaruskija abrady, tradycyjnuju muzyku, ramiostvy, biełaruskija stroi i šmat pra što jašče.
Pry hetym, jak zaŭvažaje ahladalnik, absalutnaja bolšaść videa vielmi jakasna źniatyja i dobra zmantavanyja: «Treba mieć zvyčku bačyć pryhožaje, mieć natreniravanaje voka, kab pabačyć pryhažość staroha ručnika ci hlinianaha zbana, jaki źmieščany ŭ kryvych starych vitrynach z błahim aśviatleńniem u jakimści muziei».
Zusim niadaŭna na kanale pačaŭ vychodzić cykł videa majstrychi Alaksandry Matleŭskaj «Biełaruski tradycyjny stroj». Videa pabudavanyja jak adkazy na bazavyja pytańni.
Kanał «Kultura» biełaruskaha radyjo
Mikita zhadvaje, što ŭ svoj čas padpracoŭvaŭ na hetym radyjo. «Heta vydatnaje miesca, jakoje mahło b być značna bolšym, čym radyjo, jakoje hraje ŭ majsterniach mastakoŭ stałaha ŭzrostu i kulturnych supracoŭnikaŭ», — zaŭvažaje Monič.
Jak by tam ni było, ale jutub-kanał u radyjostancyi vialiki. Na im jość vialikaja kolkaść prahram, što vychodzili ŭ apošnija hady. Jany pra roznyja aśpiekty kultury — muzyku, teatr, abrady, tradycyjnyja stroi i inšaje.
Jakaść materyjału, jak zaŭvažaje Monič, zaležyć ad asoby lektara. U bolšaści videa niama nijakich mantažnych dadatkaŭ. Heta radyjofarmat. Ale, tym nie mienš, upeŭnieny Mikita, kolkaść i raznastajnaść videa takaja, što znajści niešta cikavaje dla siabie zmoža kožny.
Siarod jutub-kanałaŭ jość tyja, dzie možna paznajomicca z sučasnymi tvorcami.
Nie čorny kvadrat
Heta prajekt intervju z mastakami, mieniedžarami kultury, muzykantami. «Trochi zanudna, ale časam cikava», — adznačaje ahladalnik. Prajekt małady, isnuje niekalki miesiacaŭ.
Razmova z tvorčym čałaviekam u jakaści asnovy videasiužeta znachodzicca i ŭ aŭtaraŭ kanała
SAMi
Ale ŭ ich inšy farmat. «U ich hieroi roznych kreatyŭnych prafiesij razmaŭlajuć sam-nasam. Atrymlivajecca niepasredna, vielmi emacyjna. Ale časam nie vielmi źmiastoŭna», — dzielicca ŭražańniami Monič.
Kniha Biełarusi
Kanał Nacyjanalnaj biblijateki Biełarusi. Na im šmat videa. Jość zapisy kanfierencyj i lekcyj. Usie temy źviazanyja ź biełaruskaj knižnaj kulturaj.
«Temy vielmi cikavyja. Lektary časam śmiarotna nudnyja. Ale jość i vydatnyja. Uvohule, Nacyjanalnaja biblijateka zdoleła stvaryć najlepšuju krynicu pra staražytnyja knihi na Biełarusi ŭ jutubie», — adznačaje Monič.
Inšy farmat spažyvańnia jutuba źviazany nie z padpiskaj na kanały, a z zachavańniem płej-listoŭ. Siarod ich Mikita Monič raić źviarnuć uvahu na
Kanał «Kulturnaja ranica»
Jaho viadzie supracoŭnica Nacyjanalnaj biblijateki Taćciana Sapieha.
U svajoj prahramie Taćciana kožny tydzień razmaŭlaje z roznymi praktykami ci daśledčykami biełaruskaj kultury. «U nabory hierojaŭ i ŭ stylistycy samich prahram zaŭvažna, što vychodziać jany na katalickim «Radyjo Maryja», — zaŭvažaje Monič.
Płej-listy kanała «Biełaruś 3»
Na hetym kanale, jak adznačaje ahladalnik, nazapašana šmat karysnaha.
U płej-liście pra architekturu sabrana niekalki dziasiatkaŭ prahram, jakija pryśviečanyja sakralnym i hramadzianskim pomnikam Biełarusi. «I heta klova», — zaŭvažaje ahladalnik.
Jašče bolš cikavy, na pohlad Moniča, płej-list «Arthistoryi», stvorany kanałam razam z Nacyjanalnym mastackim muziejem. U im navukovyja supracoŭniki (treba dadać, što ŭ bolšaści ŭžo byłyja) raspaviadajuć pra roznyja ekspanaty z kalekcyi.
Mikita Monič adznačaje, što adnoj z najbolš cikavych prahram kanała była «Žyvaja spadčyna».
Mikita źviartaje ŭvahu, što ciapier u płej-liście kala troch dziasiatkaŭ epizodaŭ. «Ale jašče ŭ 2022 hodzie hetych epizodaŭ było značna bolš. Kudy ž jany źnikli? Źnikli jany tamu, što da leta 2020 hoda aŭtaram i tvaram hetaj prahramy była Kaciaryna Vadanosava. Pryhažunia, mastačka, śpiavačka, rekanstruktarka, nastaŭnica. I ciapier, z punktu hledžańnia biełaruskaj dziaržavy, — vorah».
Monič taksama źviartaje ŭvahu na toje, što raniej prahrama nazyvałasia «Žyvaja kultura», a ciapier — «Žyvaja spadčyna». «U hetym jość peŭnaja ironija i paezija. Ale škada vialikaj kolkaści jakasna zroblenych videa», — zaŭvažaje ahladalnik.
Jon adznačaje, što Kaciaryna Vadanosava praciahvaje zdymać videakantent, ale ŭžo bolš histaryčnaha kštałtu. Videa možna znajści na kanale «Budźma Biełarusami!». Płej-list nazyvajecca
Tryzub i Pahonia
Čytajcie jašče:
Ab prezumpcyi pryjemnaści, pierajeździe ŭ Madryd i asabistaj baraćbie z botami. Vialikaja razmova ź Mikitam Moničam
Jany malavali Biełaruś. Mikita Monič skłaŭ panteon biełaruskich mastakoŭ
Kamientary