Na hetym tydni vyjšli miemuary Brytni Śpirs. U ich śpiavačka padzialiłasia niekatorymi tajamnicami svajho pryvatnaha žyćcia. Raskazvajem pra samaje admietnaje.
Kniha Brytni Śpirs The Woman in Me («Žančyna ŭva mnie») pabačyła śviet 24 kastryčnika. Asobnyja ŭryŭki ź jaje źjavilisia napiaredadni.
U miemuarach śpiavačka padrabiazna raskazała pra dziacinstva, junackija pieražyvańni, karjeru, adnosiny i depresiju.
Brytni Śpirs pryznałasia, što ŭ jaje było ciažkaje dziacinstva. Jaje baćki pastajanna svarylisia, u baćki byli prablemy z ałkaholem, i budučaja śpiavačka «stała adčuvała strach».
Pavodle słoŭ Śpirs, da 13 hadoŭ jana ŭžo pačała pić, kuryć i jeździć biez pravoŭ. Pry hetym, kali joj udałosia z druhoj sproby trapić u śviet šou-biznesu, mieniedžary prymušali jaje padtrymlivać vobraz cnatlivaj dziaŭčyny.
U knizie Śpirs pryznałasia, što straciła cnatlivaść jašče ŭ 14 hadoŭ. Kachankam jaje staŭ na try hady starejšy chłopiec. Jak pryznajecca Brytni, maci jaje za hety ŭčynak pakarała.
U miemuarach zorka 2000-ch apisvaje svaje karotkija adnosiny z Kolinam Farełam, siabroŭstva z Madonnaj (jakaja, pa zajavie Śpirs, «praviała rytuał pa jaje dałučeńni da kabały») i Perys Chiłtan, a taksama šlub z Džejsanam Aleksanderam, jaki doŭžyŭsia ŭsiaho 55 hadzin.
Adnosiny z Džaścinam Tymbierlejkam
Ale najbolš šakavalnym stała pryznańnie śpiavački ŭ tym, što jana padčas adnosin z Džaścinam Tymbierlejkam zaciažaryła, adnak zrabiła abort, bo vykanaŭca ličyŭ, što jany aboje zanadta maładyja dla taho, kab stać baćkami.
Brytni Śpirs i Džaścin Tymbierlejk sustrakalisia z 1999 pa 2002 hod. Na momant pačatku adnosin abaim było pa 18 hadoŭ.
«Heta stała siurpryzam dla mianie, ale nie było trahiedyjaj. Ja vielmi kachała Džaścina. I zaŭsiody dumała, što adnojčy ŭ nas budzie sapraŭdnaja siamja. Ale Džaścina ciažarnaść nie ŭzradavała. Jon skazaŭ, što my nie hatovyja da dziciaci i zamaładyja dla maciarynstva i baćkoŭstva», — piša Brytni Śpirs u knizie.
Tymbierlejk, pa słovach Śpirs, nastajaŭ na tym, kab abort byŭ zrobleny doma.
«My vyrašyli, što mnie nielha iści ŭ špital, bo nichto nie pavinien byŭ viedać pra abort. Ciapier ja razumieju, jak heta było niapravilna <…> Ja chacieła pajści da doktara, ale mnie było vielmi strašna. Ja lažała na padłozie i dumała, što pamru».
«Kali b heta było tolki majo rašeńnie, ja b tak nie zrabiła. Ale Džaścin byŭ pierakanany, što nie choča być baćkam. Abort — heta samaje strašnaje, što ja pieražyła», — dadaje śpiavačka.
Akramia taho, Brytni zajaviła ŭ svaich miemuarach, što jana łaviła Tymbierlejka, jakomu tady było 19, na adnosinach ź inšaj znakamitaściu. Adnak jana nie nazyvaje žančynu, pra jakuju idzie havorka, adznačajučy, što choča zaścierahčy jaje ad chvalavańnia, tamu što taja maje siamju. Žurnalisty miarkujuć, što zahadkavaja žančyna — heta Nikol Epłtan (Nicole Appleton).
Pryčynaj razryvu dźviuch zorak stała pomsta — zdrada ŭžo samoj Brytni Śpirs. Publika tady abvinavaciła śpiavačku, a «były» napisaŭ pieśniu Cry Me a River, dzie pryznaŭsia, jak Brytni raźbiła jamu serca.
Adnosiny z Semam Ashary
Znajšłosia ŭ knizie miesca i dla treciaha muža śpiavački — Sema Ashary (Sam Asghari). Brytni sustrakałasia ź im z 2016 hoda. U 2022-m jany zhulali raskošnaje viasielle, na jakim prysutničała šmat zorak. Adnak praz 14 miesiacaŭ (u žniŭni hetaha hoda) ich siamiejnaje žyćcio razvaliłasia. Niahledziačy na heta, Śpirs nazyvaje Ashary «padarunkam ad Boha» i piša:
«Ja vysoka caniu toje, nakolki jon stabilny. Mnie padabajecca, što jon navat nie pje. Ja adrazu zrazumieła, što chaču, kab jon byŭ u maim žyćci. Chimija, jakaja ŭźnikła pamiž nami ŭ samym pačatku, była varjackaj. My nie mahli adarvacca adno ad adnaho. Ja pavažaju jaho za toje, što jon uvieś čas trenirujecca, za toje, što jon dobry čałaviek, za toje, što jon zdarovy, za toje, što jon kłapocicca pra mianie i dapamahaje mnie navučycca kłapacicca pra jaho. Jon tak natchniaje, i ja jamu ŭdziačnaja».
Brytni taksama padziakavała 29-hadovamu bodzibiłdaru za dapamohu ŭ baraćbie za źniaćcie apieki nad joj. Zorka raspaviała, jak jon «ściskaŭ» jaje ruku ŭ znak padtrymki padčas sudovaha pasiadžeńnia ŭ červieni 2021 hoda.
Śpirs nie piša pra svoj razryŭ z Ashary, bo addała rukapis u druk da rasstańnia.
Adnosiny z baćkam
Značnaja častka aŭtabijahrafii pryśviečanaja napružanym adnosinam Brytni z baćkam.
«Moj baćka razburyŭ jadro majho isnavańnia, maju ŭpeŭnienaść i navat majo seksualnaje žyćcio», — adznačaje śpiavačka.
U pačatku 2008 hoda žyćcio Brytni pierajšło poŭnaściu ŭ ruki baćki.
«Prosta znaj, što ciapier tut kamanduju ja, a ty siadziš u kreśle i słuchaješ, što ja tabie kažu. Ciapier ja — Brytni Śpirs», — pieradaje śpiavačka słovy baćki.
Brytni zaŭvažaje, što «achviaravała svajoj svabodaj» dziela synoŭ. Jana piša, što pahadziłasia na apiakunstva baćki nad joj, kab u jaje byŭ šaniec bačycca sa svaimi dziećmi — Šonam Prestanam (2005 hoda naradžeńnia) i Džejdenam (2006 hoda naradžeńnia).
«Ja stała robatam, pryčym svajho rodu dziciem-robatam <…> Samaje ahidnaje, što moj baćka pastaviŭ žučok prasłuchoŭvańnia ŭ maim ułasnym domie! Voś taki byŭ jaho płan kantrolu za mnoju, — piša śpiavačka.
— Prajšło 13 hadoŭ, i ja adčuvaju siabie svaim ža cieniem. Ciapier ja ŭspaminaju časy, kali moj baćka i jaho saŭdzielniki kantralavali majo cieła i maje hrošy, i tady mnie stanovicca błaha… Ja nie zasłuhoŭvaju taho, što sa mnoj zrabiła maja siamja».
Reakcyja na knihu
Navina ab vychadzie knihi źjavilisia jašče ŭ pačatku hetaha hoda. I ŭžo tady heta spadabałasia nie ŭsim. Baćka adrazu zajaviŭ, što nie źbirajecca čytać miemuary dački. Pra heta napisała vydańnie TMZ sa spasyłkaj na insajdara.
Sem Ashary nie prajaviŭ nijakaha chvalavańnia pierad vychadam knihi, bo čytaŭ jaje raniej.
«Ja vielmi hanarusia joju. Viedajecie, jana prykłała da hetaha šmat namahańniaŭ. I vielmi ciažka joj było, tamu ja sapraŭdy zachaplajusia», — pryvodzić Daily Mail słovy Sema sa spasyłkaj na TMZ.
A voś Džaścin Tymbierlejk byŭ uzrušany ščyraściu Brytni ab zdradach i padpolnym aborcie. Heta stvaryła napružanaść u jaho šlubie z Džesikaj Bił, ź jakoj u Džaścina dvoje synoŭ. Pa słovach znajomych, jakija pryvodzić The Sun, hetaja kniha pahruziła «ŭsiu siamju ŭ chaos».
Akramia taho, reakcyja pieršych čytačoŭ frahmientaŭ knihi paŭpłyvała i na samu Brytni. Jak piša The Sun, śpiavačka zakryła svaju staronku ŭ Instagram.
Čytajcie jašče:
Dačka Kurta Kabiejna vyjšła zamuž za syna Toni Choŭka
«Ja ledź nie straciła prytomnaści». Robi Uiljams pryśviaciŭ pieśniu 4-hadovaj dačce biełaruski
«Vialiki absalutna čałaviek». Kola Łukašenka raskazaŭ, što dla jaho baćka i ŭ čym jahonaja apazicyjnaść5
Kamientary