Pažyć karalami. Kolki kaštujuć luksy ŭ krutych biełaruskich hatelach?
Pryhoža žyć nie zabaroniš. Ale maksimalny kamfort kaštuje doraha. Žurnalist vydańnia Tochka.by vyrašyŭ acanić supadzieńnie žadańnia i mahčymaściaŭ u pošukach luksavych numaroŭ samych zornych biełaruskich hatelaŭ.
Kali dabudoŭvaŭsia pieršy piacizorkavy hatel u Minsku, chadzili čutki, što luks u im na hod napierad apłaciŭ bujny rasijski pradprymalnik. Z tych časoŭ horad značna pryros fiešeniebielnymi hatelami, adpaviedna, źjavilisia vybar i kankurencyja.
U kožnym hateli, viadoma, možna znajści bolš dastupnyja pa hrošach varyjanty. Ale cikavyja mienavita samyja darahija, pierš za ŭsio ŭmovami, jakija možna atrymać.
Heta piać
U samym centry Minska znachodzicca «Prezident-hatel» (vuł. Kirava, 18). Dla reziervavańnia suhučnaha z nazvaj hatela numara treba aformić papiaredniuju zajaŭku z paznačeńniem imionaŭ haściej i krainy, jakuju jany pradstaŭlajuć.
Na sajcie cana za samy pradstaŭničy numar nie paznačanaja. Ale padčas pierapiski ŭ telehramie vyśvietliłasia, što noč u supierluksie budzie kaštavać 4872 rubloŭ.
Prezidencki numar raźmieščany na 11-m paviersie ź vidam na histaryčny centr Minska. Apartamienty ŭklučajuć try spalni z asobnymi vannymi pakojami, saŭnu z basiejnam i džakuzi, dušavuju kabinu z chromaterapijaj dla poŭnaha rełaksu.
Nie mienš efiektna vyhladaje prezidencki luks hatela «Piekin» (vuł. Čyrvonaarmiejskaja, 36). Raźmieščany jon na siomym paviersie. Mietraž pieravyšaje 300 «kvadrataŭ» i źmiaščaje vosiem (!) pakojaŭ, uklučajučy dźvie spalni i dva vannyja pakoi.
Zadavalnieńnie pieranačavać u samym darahim miescy «stalicy Kitaja» kaštuje 2050 dalaraŭ (6693,12 rubla). Praŭda, anłajn zabraniravać nie atrymajecca. Hety numar taksama možna zareziervavać tolki pa papiaredniaj zajaŭcy ź pieradapłataj. Adpaviednaja infarmacyja pryjšła pa pošcie ŭ adkaz na zapyt.
Na procilehłym baku ad praśpiekta Niezaležnaści, u hateli «Jeŭropa» (Internacyjanalnaja, 28),
samy raskošny numar abydziecca ŭ 4479,59 rubla za sutki. Druhi zachod na staronku braniravańnia pakazaŭ źnižku 34% (2959,55 rubla) — u pryvatnaści, na Stary Novy hod.
Prezidencki śjuit znachodzicca na šostym paviersie. 124 kv. m — heta try pakoi (spalnia i dźvie haścioŭni z kabinietam). Jość bałkon ź vidam na stary horad i ratušu.
Pa vulicy Lenina adsiul možna spuścicca da maładoha «piacizornika»: Double Tree by Hilton (pr. Pieramožcaŭ, 9).
Niadoŭhi pošuk daje infarmacyju, što prezidenckija apartamienty paciahnuć na 1387 dalaraŭ (4466,14 rubla) za sutki (cenaŭtvareńnie dynamičnaje, zaležyć ad abranaj daty, u hetym vypadku 13-14 studzienia).
Luks u 168 «kvadrataŭ» na 20-m paviersie vychodzić voknami na raku i Trajeckaje pradmieście. Jon składajecca z prastornaj haścioŭni, asobnaj stałovaj ź mini-kuchniaj, vannym pakojem, dadatkovaj haściavoj prybiralni i asobnaj spalni ź jašče adnym vannym pakojem. Numar raźličany na try asnoŭnyja spalnyja miescy i adno dadatkovaje (raskładny łožak).
Na niekatoraj addalenaści ad centra znachodzicca Marriott (pr. Pieramožcaŭ, 20). Tut hałoŭny numar upišacca ŭ 1699 dalaraŭ (5446,15 rubla). I heta taksama stała viadoma pa vynikach pierapiski. Zabraniravać jaho niepasredna na sajcie nie atrymajecca.
Numar płoščaj 260 kv. m praduhledžvaje čatyry asnoŭnyja spalnyja miescy i źmiaščaje haścioŭniu (zonu adpačynku), asobnuju stałovuju, kanfierenc-zału, harderobnuju i dźvie spalni.
Dva apošnija hateli ŭvachodziać u suśvietna viadomyja hatelnyja sietki. Vierahodna, košt luksaŭ vyznačajecca ŭ tym liku cenavaj palitykaj brendaŭ.
Taksama treba mieć na ŭvazie, što pastajalcy prezidenckich luksaŭ čaściakom mohuć naviedvać łaŭnž-zony, trenažornyja zały i spa, jakija jość pry hatelach.
Numary Puhačovaj i Maradony
U abłasnych centrach ź piacizorkavymi hatelami ŭsio składana. Tamu ŭ pošukach najlepšych numaroŭ žurnalist pajšoŭ pa śladach znakamitaściaŭ.
Viciebsk sa «Słavianskim bazaram» pabačyŭ niamała padziej i viadomych asob. Ała Puhačova spyniałasia ŭ miascovym hateli «Erydan». U jaje ŭsiaho try zorki, ale budynak źjaŭlajecca pomnikam architektury XIX stahodździa.
U apisańni da dvuch luksaŭ havorycca, što heta vialiki dvuchpakajovy numar z dvuma asobnymi łožkami ŭ spalni. Akramia fotak acanić stupień kamfortu dazvalaje 3D-vizualizacyja.
Načleh tut abydziecca ŭsiaho ŭ 180 rubloŭ.
U Breście maksimalna epatažnym u apošnija hady byŭ pryjezd Dyjeha Maradony, kali miascovaje futbolnaje «Dynama» dobra šumieła mahutnym pijaram. Znakamitaha arhiencinca pasialili ŭ čatyrochzorkavy «Ermitaž».
Samy darahi numar Apartment kaštuje 990 rubloŭ, ale kožnyja nastupnyja sutki abyducca ŭ dva razy tańniej.
Dva luksy intehravanyja na vierchnich pavierchach budynka i składajucca z dvuch uzroŭniaŭ. Na pieršym raźmieščana kamfortna ŭładkavanaja haścioŭnia, na druhim — prastornaja spalnia z razynačkaj: elehantny vanny pakoj z bronzavymi elemientami ŭ centry pamiaškańnia. Jak u kino. Taksama ŭ numarach jość saŭna. A z voknaŭ i z avalnaha bałkona adkryvajecca pryhožy vid na haradskija piejzažy.
Samy tanny luks
I na desiert — samy ŭnikalny luks u Minsku, jaki moža dazvolić sabie kožny. Pakoj z padvyšanaj kamfortnaściu (luks 1) prapanuje haścinica «Univiersiteckaja» (vuł. Hołubieva, 26, korp. 2).
Usiaho za 37 dalaraŭ na sutki pastajalec na čas stanie haspadarom 38 «kvadrataŭ» z haścioŭniaj, spalniaj i vannym pakojem.
Z adpaviednaj canie mebli tut značacca vialiki dvuchspalny łožak, raskładnaja kanapa i jomistaja šafa. A z kamfortnych drobiaziaŭ — posud, čystaja (!) paścielnaja bializna i ručniki.
Darečy, kali paličyć košt numara na miesiac (30 dzion), atrymajecca 1110 rubloŭ, ci 345 dalaraŭ — dobraja alternatyva dla tych, chto doŭha nie moža znajści prydatnuju dvuchpakajoŭku.
Čytajcie taksama:
Crowne Plaza Minsk zakryŭsia. Što adbyłosia i jaki sihnał atrymaŭ hatelny biznes
U minskich hatelach na navahodnija śviaty ŭžo zareziervavali pieravažnuju bolšaść numaroŭ
Jak vyhladaje numar biełaruskaj haścinicy za 7 rubloŭ na sutki
Zdajuć u arendu katedž zahinułaha chakieista Cypłakova ŭ Drazdach. Voś interjery FOTY19
Kamientary