Jak vyhladajuć tuneli CHAMASa — hłybinia da 50 mietraŭ, možna jeździć na aŭto FOTY
Historyja tunelaŭ pad siektaram Haza pačynajecca z 1980-ch hadoŭ. Spačatku jany vykarystoŭvalisia dla kantrabandy. Paźniej tuneli stali słužyć CHAMASu i inšym hrupoŭkam bajevikoŭ miescami vytvorčaści i zachavańnia zbroi, pieramiaščeńnia pad ziamloj, navučańnia bajevikoŭ, ździajśnieńnia napadaŭ, pieramiaščeńnia zakładnikaŭ i adychodu niezaŭvažanymi.
Hetuju sietku tunelaŭ u prastamoŭi nazyvajuć «mietro Hazy». Miarkujecca, što jana składajecca z prykładna 1300 tunelaŭ, a ich ahulnaja daŭžynia składaje, pa roznych acenkach, ad 400 da 500 kiłamietraŭ.
Pa słovach pradstaŭnikoŭ CACHAŁ, tuneli znachodziacca pad škołami i spartovymi centrami, miačeciami i balnicami na terytoryi ŭsiaho siektara Haza. Tak, u listapadzie 2022 hoda Ahienctva AAN dla dapamohi paleścinskim biežancam i arhanizacyi rabot (UNRWA) paviedamiła, što znajšła tunel pad pačatkovaj škołaj.
24 kastryčnika 2023 hoda CHAMAS vyzvaliŭ 85-hadovuju zakładnicu, jakaja raskazała, što ich viali dźvie-try hadziny pa syrych tunelach, pakul jany nie patrapili ŭ vialikuju zalu. Pa słovach žančyny, bajeviki padrychtavali čystyja pamiaškańni z matracami na ziamli, a zakładnikaŭ u padziamiellach rehularna naviedvali miedyki.
Niekalki dzion tamu izrailskija vajennyja abviaścili pra vyjaŭleńnie adnaho takoha tunela na poŭnačy siektara Haza. Jon maje niekalki adhalinavańniaŭ i raźviazak. Samaje bujnoje z vyjaŭlenych maje daŭžyniu kala čatyroch kiłamietraŭ i na niekatorych učastkach idzie pad ziamlu na hłybiniu da 50 mietraŭ. Tunel dastatkova šyroki, kab unutry mahli prajechać transpartnyja srodki.
Jak śćviardžajecca, z tunela možna było patrapić u ofisy i apartamienty palityčnaha i vajskovaha kiraŭnictva CHAMAS. Aproč zvyčajnych schodaŭ, dla praniknieńnia ŭ padziemnuju sistemu vykarystoŭvalisia lifty.
Tunel maje taksama linii vodapravoda, elektryčnaści i suviazi. «Takim čynam, terarysty CHAMAS mieli mahčymaść jak źbiehčy, tak i zastavacca ŭ svaich schovankach na praciahu dastatkova doŭhaha pieryjadu», — cytuje interniet-vydańnie Spiegel paviedamleńnie CACHAŁ.
Čytajcie jašče:
CHAMAS adchiliŭ prapanovu Izraila ab pieramirji ŭ abmien na vyzvaleńnie zakładnikaŭ
WSJ śćviardžaje, što Izrail płanuje zatapić tuneli CHAMAS marskoj vadoj. Ci realna heta?
Kamientary
NN absłuhoŭvaje vajennuju prapahandu čužoj krainy, jakaja padtrymlivaje i vyznaje Łukašenka, i było jakoj ŭsio roŭna było navat na źbićcio svajho hramadzianina 9 žniŭnia.