Zirnicie, što budujuć na miescy staroha lampavaha Červieńskaha rynku
Pieršaja sproba budaŭnictva była niaŭdałaj.
Budaŭnictva znachodzicca na miescy staroha Červieńskaha rynku, jaki raźmiaščaŭsia, kali chto zabyŭ, na rahu vulic Majakoŭskaha i Aranskaj, piša Blizko.by.
Rekanstrujavać stary rynak zadumali jašče ŭ 2003 hodzie siłami «Biełpramprajekta», potym źjavilisia iranskija inviestary, i ŭ 2008-m staršynia praŭleńnia Biełkaapsajuza Uładzimir Kulašoŭ źlotaŭ u Iran dla padpisańnia inviestycyjnaj damovy. Potym znoŭ usio prypyniłasia na niekalki hadoŭ, i tolki roŭna dziesiać hadoŭ tamu, u samym pačatku 2013-ha, Červieński rynak na starym miescy začyniŭsia i pierajechaŭ na novaje miesca — da choładakambinata № 2.
A kampanija «Dzidas Internešnł hrup» paabiacała pabudavać na miescy rynku siamipaviarchovy handlovy centr z ekspłuatavanym dacham.
Ale potym niekalki hadoŭ znoŭ ničoha nie adbyvałasia, i ŭ 2015-m Minharvykankam raźvitaŭsia i z hetym iranskim inviestaram. Zatym novyja inviestary i zabudoŭščyki jašče niekalki razoŭ źmianiali adzin adnaho, i budoŭla to išła badziora, to mlava. Prajekt, viadoma, taksama źmianiŭsia: zamiest 7-paviarchovika z «zialonym» dacham budzie 3-paviarchovy budynak sa zvyčajnym dacham, na jakim nijakich kustoŭ-dreŭ-travy i łavačak.
«Vysoki zamak», subpadradčyk polskaha hienpadradčyka Trasko-Inwest, zbankrutavaŭ, jaho miesca zaniała bresckaja kampanija «Ałvora-Bieł», a zakazčyk zastaŭsia raniejšym: kampanija «Silvierkapitał». Usie raboty abiacali zaviaršyć da 31 śniežnia hetaha hoda.
Žurnalisty pryjšli da budučaha centra za dziesiać dzion da abiacanaj daty i pahladzieli, što tam i jak. Adrazu spojler: vonkava jon vyhladaŭ bolš hatovym, čym «Mahnit Minska» na ŭschodzie.
Prynamsi, z boku hałoŭnaha fasadu ŭžo amal usiudy hatovyja tratuary i parkoŭki, rabočyja źmiatajuć piasok ź plitki. Ale štabieli plitak taksama lažać tut ža — vidavočna, brukavać bakavyja terytoryi.
Tut budzie prymieniena vielmi cikavaje i chitraje azdableńnie. Na ścieny fasadu macujucca roznakalarovyja mietaličnyja švielery. Pryčym jany nie prosta mietaličnyja, a z ščylnaj, huściejšaj pierfaracyjaj.
A ŭ skruhlenaj častcy, jakaja vychodzić jak raz na vuhał skryžavańnia, vierchniuju častku budynka ablicavali panelami bieła-błakitnych adcieńniaŭ ź viertykalnym malunkam-nasiečkaj.
Asnoŭny varušniak adbyvajecca z advarotnaha boku budynka. Tut raźmiaściŭsia budaŭničy haradok, i tut ža vizualna maksimalnaja aktyŭnaść budaŭnikoŭ. Štabieli minieralnaj vaty, špulki z kabielami, elemienty vientylacyi, budaŭničyja ryštavańni, svabodnyja paddony i šmat śmiećcia.
A voś termin zdačy abjekta dakładna ssunuŭsia — ciapier heta ŭžo lipień 2024-ha. Heta značyć, adkryćcia kram pryjdziecca pačakać jašče minimum 7 miesiacaŭ.
Vułačka, jakaja prachodzić zboku ad budučaha HC — heta vulica Aranžarejnaja. Mabyć, heta samaja karotkaja ŭ Minsku vulica, dzie až dva razy arhanizavany kalcavy ruch.
Kaliści na hetaj vulicy stajali damy minskich padpolščykaŭ časoŭ Druhoj suśvietnaj — miemaryjalnaja doška, pryśviečanaja im, zastałasia na miescy, ale kali raniej jana stajała kala jabłyni, to ciapier amal padpiraje ścianu handlovaha centra.
Darečy, z boku Aranžarejnaj budoŭla nijak nie aharodžana, možna padyści amal uščylnuju da HC i zazirnuć u padkramavuju prastoru, dzie chavajecca niešta, padobnaje da parkinhu.
Pakolki tut rabočym nie treba staracca paśpieć da 31 śniežnia, to padajecca, što času ŭsio darabić u ich dastatkova, nie buduć u aŭralnym paradku razrezać stužačku prosta pad lulkaj z rabočymi, što prybivajuć na vyšyni šyldu.
Miarkujecca, što pieršyja dva pavierchi ŭ abjekta buduć handlovymi — hipiermarkiet i nievialikija kramy, vyšej dziciačy centr sa spartzałaj, zonami adpačynku i kramami adzieńnia. Płanujecca raźmiaščeńnie 3-ch dvuchpaviarchovych kramaŭ, jakija abjadnoŭvajuć pieršy i druhi pavierchi HC, unutry jakich buduć ustanoŭleny eskałatary. Takoje rašeńnie zaklikana pavyšać prachodnaść druhoha paviercha HC, pryvodziačy tudy naviedvalnikaŭ, jakija zajšli ŭ jakarnyja kramy-mahnity. Dakładna takoje ž rašeńnie možna ŭbačyć u HC Dana Mall. Jakarnym arandataram budzie hipiermarkiet Green.
Na sajcie inviestycyjnaj hrupy Rapa skazana, što handlovy centr atrymaje nazvu «Červieński», jaho adras budzie taki: vulica Majakoŭskaha, 6.
Ahulnaja płošča — krychu bolšaja za 63 tysiačy kvadratnych mietraŭ, karysnaja płošča — 34 tysiačy «kvadrataŭ».
Ułasna handlovy centr budzie mieć płošču 43,6 tysiačy kvadratnych mietraŭ i dva parkinha: padziemny i naziemny (pa 500 miescaŭ u kožnym).
Papularny tyktokier z Rasii tusić u darahich restaranach Minska: «Byccam bamžu padali. Žarycie, na zdaroŭje»19
Kamientary