Siadzieŭ na naradzie chvorym i bajaŭsia nadzieć masku. Čym zapomniŭsia Sierhiejenka, jakoha vypraŭlajuć z Administracyi Łukašenki

Chvorym siadzieŭ na naradzie Łukašenki

Na naradzie 17 listapada 2020 hoda ŭvahu źviartała śpiecyfičnaja rassadka top-čynoŭnikaŭ. Natalla Ejsmant siadzieła da Alaksandra Łukašenki bližej za staršyniu KDB. A pa pravuju ruku ad jaje siadzieŭ kiraŭnik Administracyi Ihar Sierhiejenka, jaki vyhladaŭ vielmi blednym, heta było zaŭvažna na aficyjnych videa z narady.

Pavialičyć

Jak paśla stała viadoma sa źlivu telefonnaj razmovy Ejsmant i asabistaha pamočnika Łukašenki Mikałaja Łatyšonka, Administracyju tady zachłynuła epidemija karonavirusa.

Pačaŭ zmahacca z «ekstremizmam» jašče da 2020-ha

Pryznavać ekstremisckimi niaŭhodnyja knihi, artykuły i ŚMI biełaruskija sudy pačali ŭ 2008 hodzie (zakon «Ab supraćdziejańni ekstremizmu» pryniali ŭ 2007 hodzie).

Pieršy danos byŭ ad Sierhiejenki, jaki tady ŭznačalvaŭ Hrodzienskaje ŭpraŭleńnie KDB.

U artykule «Vajna ŭ Hruzii» ŭ vydańni «Svaboda» śpiecsłužbist uhledzieŭ prykmiety kampramietacyi dziejnaści pravaachoŭnych orhanaŭ Biełarusi. Jaho pazoŭ razhladaŭ sud Iŭjeŭskaha rajonu. Žnivieński numar vydańnia pryznali ekstremisckim.

U 2008-m taksama mienavita pad kantrolem Sierhiejenki prachodziŭ praces pryznańnia ekstremisckimi knih «Listy ź lesa» Paŭła Sieviarynca, «Vypadkovy prezident» (Śviatłany Kalinkinaj i Paŭła Šaramieta), a taksama haziety polskaj mienšaści «Hłas z-nad Niemna».

Zastupaŭsia za Kurapaty, ale niadoŭha

U 2017 hodzie čekist Sierhiejenka padtrymlivaŭ ideju stvareńnia ŭ Kurapatach miemaryjału. Pavodle jaho, pamiatny znak pavinien abjadnoŭvać, a «nie adlustroŭvać intaresy peŭnaj nacyi, kanfiesii abo palityčnaj hrupy».

Jon abiacaŭ, što KDB z ułasnaj inicyjatyvy vyvučyć usie archiŭnyja materyjały, jakija zachoŭvajucca ŭ śpiecsłužbaŭ i Nacyjanalnym archivie.

Paźniej u adkazie na pietycyju pradstaŭnikoŭ hramadskaści Sierhiejenka zajaviŭ, što źviestak pra miescy rasstrełaŭ i pachavańnia achviar palityčnych represij u archivach orhanaŭ dziaržaŭnaj biaśpieki Biełaruś niama.

Daŭ admašku niščyć znaki pra Kalinoŭskaha i Kaściušku…

U 2022 hodzie Ihar Sierhiejenka tranślavaŭ zahad Łukašenki pra nieabchodnaść unieści «peŭnyja karektyvy» ŭ padručniki pa historyi.

Tady ž stvaryli Respublikanskuju radu pa histaryčnaj palitycy, jakuju ŭznačaliŭ sam Sierhiejenka.

Paźniej kiraŭnik Administracyi Łukašenki zajaviŭ, što nie ličyć Kaściušku i Kalinoŭskaha nacyjanalnymi hierojami Biełarusi.

Paśla hetaha pačali prybirać znaki, źviazanyja z hetymi histaryčnymi asobami. Rej viali prarasijskija aktyvisty.

… i prybirać łacinku

Pra rašeńnie admovicca ad łacinki stała viadoma ŭ kancy 2022 hoda.

Sierhiejenka tłumačyŭ, što łacinku prybirajuć praz zvaroty «nieabyjakavych hramadzian», jakija tut «ubačyli naviazvańnie zachodnich libieralnych kaštoŭnaściaŭ i kulturnych tradycyj».

Jon taksama kazaŭ, «kiraŭnikom dziaržavy daručana ŭradu vyklučyć praktyku prymianieńnia łacinki ŭ najmieńni vulic i tapahrafičnych abjektaŭ i vykarystoŭvać tolki dziaržaŭnyja movy».

Za admienu biełaruskaj łacinki ŭ tranślitaracyi hieahrafičnych nazvaŭ zmahalisia prarasijskija aktyvisty na čale z Volhaj Bondaravaj.

Za hety čas łacinku zamianili na ruskuju movu na mnohich prypynkach transpartu i ŭ mietro.

Byŭ suprać ustupleńnia Biełarusi ŭ vajnu z Ukrainaj

Jak raniej śćviardžali krynicy «Našaj Nivy», Sierhiejenka nie padtrymlivaŭ adpraŭki vojskaŭ na vajnu suprać Ukrainy. Arhumienty suprać udziełu da Łukašenki dachodzili praz kiraŭnika Administracyi.

Jon navažvaŭsia ich danosić, niahledziačy na toje, što byŭ «strašna zapałochany represijami», kazali krynicy «Našaj Nivy».

Pavodle ich, u atačeńni Łukašenki Sierhiejenku ličać «čałaviekam biez pazicyi», ale jon «hulaje vielmi tonka». Čekist padavaŭ Łukašenku infarmacyju tak, kab u «hałasach ludajedaŭ» hučali taksama antyvajennyja hałasy.

Hladzicie taksama:

Što viadoma pra baćkoŭ i siamju novaha kiraŭnika Administracyi prezidenta Ihara Sierhiejenki

Dzie pracujuć i jak vyhladajuć žonki top-čynoŭnikaŭ? Pieršaja častka

Kiraŭnik Administracyi Łukašenki prapanavaŭ pakazać u škołach film z udziełam samoha Łukašenki

«Vyvieści z užytku». Łukašenkaŭcy vyrašyli rusifikavać i tranślitaracyju hieahrafičnych nazvaŭ

• 4
• 0
• 0
• 2
• 4
• 1
• 7
• 0