8 lutaha Uładzimir Zialenski adpraviŭ u adstaŭku hałoŭnakamandujučaha USU Valeryja Załužnaha. Zamiest jaho na hetuju pasadu byŭ pryznačany Alaksandr Syrski — ciapier užo były kamandujučy Suchaputnych vojskaŭ USU. ŚMI praktyčna adrazu źviarnuli ŭvahu na toje, što novy ŭkrainski hałoŭnakamandujučy naradziŭsia va Uładzimirskaj vobłaści Rasii i vučyŭsia ŭ Maskoŭskim vyšejšym ahulnavajskovym kamandnym vučyliščy. Asabliva aktyŭna pra heta paviedamlała rasijskaja prapahanda, piša «Mieduza».
Novy hałoŭnakamandujučy USU Alaksandr Syrski naradziŭsia ŭ 1965 hodzie ŭ vioscy Navinki Uładzimirskaj vobłaści RSFSR u siamji vajskoŭca. Jak piša «Ukrainskaja słužba Bi-bi-si», u 1970-ja hady baćku Syrskaha pieraviali słužyć va Ukrainu, ź im pierajechała ŭsia siamja. Škołu novy hałoŭnakamandujučy USU skončyŭ u Charkavie i, jak śćviardžaje «Bi-bi-si», hety horad jon ličyć rodnym.
Z 1982 pa 1986 hod Syrski vučyŭsia ŭ Maskoŭskim vyšejšym ahulnavajskovym kamandnym vučyliščy (MVAKV). Prykładna ŭ tyja ž hady tam vučylisia ciapierašnija deputaty Dziarždumy Rasii — Andrej Kartapołaŭ (kiraŭnik Kamiteta abarony) i Andrej Łuhavy (padazravany ŭ zabojstvie byłoha raźviedčyka Alaksandra Litvinienki), źviarnuła ŭvahu «Ruskaja słužba Bi-bi-si».
U 1980-ch Syrski kamandavaŭ motastrałkovym uzvodam, jaki bazavaŭsia ŭ Łubnach Pałtaŭskaj vobłaści, u 1990-ja — bataljonam i pałkom 6-j dyvizii Nachvardyi Ukrainy, jakija stajali ŭ Charkaŭskaj vobłaści. Paźniej jon vučyŭsia ŭ Akademii USU i Nacyjanalnaj akademii abarony Ukrainy.
Va Uładzimiry, jak śćviardžajuć rasijskija ŚMI, žyvie brat Alaksandra Syrskaha Aleh. Prykładna praz hadzinu paśla taho, jak stała viadoma ab pryznačeńni Syrskaha, z Aleham źviazałasia rasijskaje dziaržahienctva TASS. Jon raskazaŭ, što ŭžo daŭno nie bačyŭsia z bratam.
«Ja ź im nie kantaktuju, ja navat nie viedaju, dzie jon. Ja pra jaho ničoha nie viedaju. Daŭno ŭžo, vielmi daŭno jon źjechaŭ tudy [va Ukrainu]. Jon tam usio žyćcio, jon tam pačaŭ słužbu i praciahvaje jaje, u jaho tam siamja», — skazaŭ Aleh.
Rasijskaja prapahanda aktyŭna pisała pra baćkoŭ Syrskaha. Telekanał Russia Today śćviardžaje, što jany žyvuć u Rasii i nibyta «rehularna» ŭdzielničajuć u akcyi «Nieśmiarotny połk». Da takoj vysnovy kanał pryjšoŭ, vyvučyŭšy sacsietki, jakija mierkavana naležać svajakam Syrskaha.
RT taksama paviedamiŭ, što jaho supracoŭnikam udałosia pahavaryć sa znajomymi baćkoŭ novaha hałoŭnakamandujučaha USU. U pryvatnaści, kanał pryvodzić słovy žycharki Uładzimira i kiraŭnika muzieja adnoj sa škoł Taćciany Viesiałovaj, jakaja raniej mieła znosiny sa svajakami Syrskaha. Jana śćviardžaje, što mnohija vypuskniki škoły viedali Syrskaha i na sustrečy vypusknikoŭ nazyvali jaho «zdradnikam».
RT piša, što parazmaŭlała ź jašče adnoj znajomaj siamji Volhaj. Jana nazyvaje baćkoŭ hałoŭnakamandujučaha patryjotami, a pra Alaksandra jany ciapier zusim nie havorać, «byccam jaho i nie było nikoli».
Pra baćkoŭ Syrskaha taksama piša praŭładny telehram-kanał Shot. Vydańnie śćviardžaje, što jamu ŭdałosia źviazacca z baćkam novaha hałoŭnakamandujučaha USU, jaki paprasiŭ «nie čapać ich siamju, tamu što dla ich heta ciažki čas». Nijakich paćviardžeńniaŭ telehram-kanał nie pryvodzić.
Shot sa spasyłkaj na sacsietki nibyta baćkoŭ Syrskaha taksama piša, što jany ŭdzielničajuć u «Nieśmiarotnym pałku». Kanał śćviardžaje, što na baćkoŭ hałoŭnakamandujučaha USU «ciapier abrynułasia chvala chejtu».
Prapahandyst RT Kanstancin Prydybajła apublikavaŭ fatahrafii, na jakich, jak jon śćviardžaje, Alaksandr Syrski adlustravany na śviatkavańni Dnia Rasii. «Jeŭ tort z ukrainskim i rasijskim ściaham na viarchušcy, abdymaŭsia z rasijskimi vajskoŭcami na pryjomie», — piša Prydybajła. Pra jakoje mierapryjemstva idzie havorka, jon nie ŭdakładniŭ.
Dziaržahienctva «RIA Novosti» vypuściła materyjał, u jakim havorycca, što «mierkavany brat» Syrskaha Aleh u 2013 hodzie byŭ aštrafavany sudom va Uładzimiry na 30 tysiač rubloŭ pa artykule ab zahadzia chłuślivym paviedamleńni pra rychtavany vybuch. Vierahodna, havorka idzie pra taho ž brata, ź jakim mieŭ znosiny TASS, ale «RIA Novosti» nazyvaje jaho «mierkavanym».
Hazieta «Komsomolskaja pravda» piša, što baćkoŭ Syrskaha zavuć Ludmiła Ivanaŭna i Stanisłaŭ Prakopavič. «Mieduza» vyjaviła na sajcie Leninskaha rajonnaha suda pazoŭ Syrskaha Stanisłava Prakopaviča da vajskovaha kamisaryjata vobłaści ad 2013 hoda. U im jon patrabuje pryznać jaho prava na pieraraźlik piensii ŭ suviazi z pavieličeńniem pamieru akładu pa vajskovym zvańni. U rašeńni suda havorycca, što Syrski S.P. — piensijanier Minabarony RF i jamu pryznačanaja piensija za vysłuhu hadoŭ. Ci sapraŭdy heta pazoŭ baćki novaha hałoŭnakamandujučaha USU, nieviadoma.
«Komsomolskaja pravda» paviedamlaje, što karespandent vydańnia źjeździŭ va Uładzimir i znajšoŭ kvateru baćkoŭ Syrskaha. Vydańnie śćviardžaje, što baćki «zabarykadavalisia ad žurnalistaŭ u kvatery, paprasili susiedziaŭ nikoha nie puskać u ahulny choł i trymali abłohu z upartaściu sapraŭdnych vajaroŭ».
Karespandent «KP» pahavaryŭ z sakratarkaj doma Natallaj Alaksiejeŭnaj, jakaja, jak śćviardžajecca, siabruje z maci Alaksandra Syrskaha. Jana śćviardžaje, što paśla 2014 hoda Syrski da baćkoŭ nie pryjazdžaŭ.
Pra «patryjatyčnuju pazicyju» svajakoŭ Syrskaha piša i praŭładny telehram-kanał Readovka. Vydańnie śćviardžaje, što znajšło staronki maci Syrskaha ŭ sacsietkach, na jakich možna znajści «ad pažadańniaŭ mocnaha zdaroŭja prezidentu Pucinu da žartaŭ nad kancleram FRH Šolcam za jaho pastaŭki zbroi dla USU».
RT paviedamiła, što vyjaviła list maci Syrskaha svajmu baćku, jaki zahinuŭ padčas «Vialikaj Ajčynnaj vajny», «ratujučy tavaryšaŭ ad fašystaŭ». Miarkujučy pa skrynšotach, tekst byŭ raźmieščany va «Ukantakcie». Nijakich paćvierdžańniaŭ sapraŭdnaści lista RT nie pryvodzić.
Naviny aktyŭna rastyražavali inšyja praŭładnyja ŚMI, u tym liku «Iźviestija», «Rośsijskaja hazieta», «Vzhlad», «Hazieta.ru», «RIA Novosti» i inšyja.
«Vialiki absalutna čałaviek». Kola Łukašenka raskazaŭ, što dla jaho baćka i ŭ čym jahonaja apazicyjnaść22
Kamientary