Kanflikt pamiž dvuma biełaruskimi apazicyjanierami, Sierhijevičam i Kamisaravym, moža dajści ŭ Polščy da kryminałki

Błohier «Virus» raskazaŭ pra hetuju historyju ŭ kancy studzienia 2024 hoda. Pa jahonych słovach, «bajpołaviec» Alaksandr Kamisaraŭ źbiŭ administratara kanała «Stop Łuka» Źmitra Sierhijeviča.

Pavialičyć

«Stop Łuka» — heta sietka niekali bujnych supolnaściaŭ, jakija isnavali pad brendam «Nadakučyŭ nam hety Łukašenka», a paśla źmianili nazvu.

Siarhiej Biaspałaŭ raspavioŭ «Našaj Nivie», što Źmicier Sierhijevič vyjšaŭ ź pieršapačatkovaha prajekta i viadzie ŭłasnaje adhalinavańnie. Prajekt, jakim zajmajecca Sierhijevič, maje 100 padpisantaŭ u telehramie. Taksama za im zastałasia hrupa ŭ Adnakłaśnikach i Fejsbuku (u pieršapačatkovaj viersii my nie zaŭvažyli astatnija sacsietki toj častki prajekta STOP LUKA, jakim zajmajecca Źmicier — zaŭv. NN). Alaksandra Kamisarava jon nikoli ŭ žyćci nie bačyŭ, tamu pra situacyju ničoha raskazać nie moža.

Paśla historyja atrymała praciah: suprać Alaksandra Kamisarava nibyta zaviali kryminalnuju spravu. Mužčyna na voli, tamu my zapytalisia, što adbyłosia i jak jon bačyć situacyju:

«Ja nie supracoŭnik «Bajpoła» i nijakaha dačynieńnia da milicyi nikoli nie mieŭ.

Heta vyklučna bytavy kanflikt, asabisty. Ja razyšoŭsia z žonkaj, i jana ciapier razam sa Źmitrom. I ŭsio było b prosta, kab u nas nie było ahulnaha dziciaci i naciahnutych adnosinaŭ. Tamu anijakaha palityčnaha składnika ja tut nie baču, choć šmat u čym našy pazicyi sapraŭdy razychodziacca.

Nakolki ja razumieju polskija zakony, kryminalnaj spravy suprać mianie ciapier niama. Źmicier sapraŭdy padaŭ zajavu. Adkrytaja vytvorčaść, bo taki miechanizm pracy palicyi ŭ Polščy — kali jość zajava, to adkryvajecca sprava. Ale ja nie prachodžu ŭ statusie abvinavačanaha, śledčych dziejańniaŭ nie adbyvajecca, śviedak nie vyklikali. Zdajecca, heta ničym nie skončycca, bo paškodžańniaŭ Źmicier nie atrymaŭ.

U Źmiciera moža być inšaje bačańnie historyi, viadoma. Tamu pasprabujcie pahutaryć jašče i ź im», — prapanavaŭ Alaksandr.

Na žal, z druhim udzielnikam hetaj historyi, Źmitrom Sierhijevičam, pahutaryć nie atrymałasia.

Jon vystaviŭ žurnalistu «Našaj Nivy» ŭmovu — pryjechać u Biełastok, dzie Sierhijevič zapiša hutarku na videa z tvaram žurnalista. A kali jamu nie spadabajecca publikacyja, to vykładzie hutarku ŭ publičny dostup. Viadoma, što na takija ŭmovy my nie pahadzilisia — fakt pracy na «ekstremisckaje farmiravańnie» pahražaje žurnalistu «NN» zaviadzieńniem kryminalnaj spravy i pieraśledam svajakoŭ u Biełarusi.

Skrynšoty pierapiski žurnalista «Našaj Nivy» i Źmitra adrazu paśla zvarotu byli apublikavanyja ŭ kanale Kandracienki — OSINT «Fieniks», a ź jaho pierakačavali ŭ biełaruskija praŭładnyja kanały.

• 5
• 0
• 16
• 42
• 4
• 4
• 7
• 0