U aficyjnaha Minska zastalisia ŭsiaho try pasły ŭ krainach Jeŭrasajuza z raniejšych 15
Za apošnija čatyry hady Łukašenka pazdymaŭ ambasadaraŭ u piatnaccaci krainach ES, a taksama zakryŭ adno pasolstva. Radyjo Svaboda raskazvaje, što stała ź biełaruskaj dypłamatyjaj u krainach Jeŭrasajuza.
Alaksandr Łukašenka 12 sakavika 2024 hodu vyzvaliŭ ad pasadaŭ adrazu troch ambasadaraŭ Biełarusi ŭ krainach ES.
Pasady stracili: Dzianis Sidarenka, jon ad 2016 hoda ŭznačalvaŭ dypłamatyčnaje pradstaŭnictva Biełarusi ŭ Niamieččynie; Dźmitryj Mirončyk, ad 2018 hoda byŭ pasłom Biełarusi ŭ Šviecyi; Alaksiej Samasujeŭ, byŭ ambasadaram u Finlandyi ad 2018 hoda.
Chto zastaŭsia?
Takim čynam, na siońniašni dzień aficyjny status pasła Biełarusi ŭ krainach ES majuć tolki Andrej Dapkiunas u Aŭstryi (ad 2020 hoda), Andrej Jeŭdačenka ŭ Niderłandach (ad 2020 hoda) i Uładzimir Ułachovič u Vienhryi (ad 2022 hoda).
Ułachovič byŭ adzinym pasłom, jakoha Łukašenka pryznačyŭ u Jeŭrasajuz paśla padziej 2020 hoda. Kadravaje rašeńnie adbyłosia 10 lutaha 2022 hoda, niezadoŭha da pačatku vajny va Ukrainie.
Były kiraŭnik handlova-pramysłovaj pałaty Uładzimir Ułachovič prysutničaŭ tady na sustrečy z Łukašenkam. Ale ni infarmacyjnaje ahienctva BiełTA, ani pres-słužba Łukašenki tady nie paviedamili, jakija pažadańni byli vykazanyja novamu pasłu.
16 červienia 2022 hodu Uładzimir Ułachovič uručyŭ davierčyja hramaty prezidentu Katalinie Novak. «Baki kanstatavali ŭzajemnuju zacikaŭlenaść u raźvićci ŭzajemavyhadnaha supracoŭnictva va ŭsich śfierach z asablivym akcentam na dalejšaje ŭmacavańnie handlova-ekanamičnych suviaziaŭ», — havaryłasia ŭ aficyjnym paviedamleńni biełaruskaha boku.
U vieraśni 2023 hoda Vienhryja taksama stała pieršaj krainaj ES, pradstaŭnik jakoj uručyŭ Alaksandru Łukašenku davierčyja hramaty. Novaj ambasadarkaj hetaj krainy ŭ Biełarusi stała Zita Iłona Bienčyk. Praź miesiac Biełaruś ź vizitam naviedvaŭ ministr zamiežnych spraŭ Vienhryi Peter Sijarta.
U Słavaččynie ambasadu zakryli
Dypłamatyčnaje pradstaŭnictva Biełarusi ŭ susiedniaj ź Vienhryjaj Słavakii naohuł zakryli. Rašeńnie padpisanaje 8 vieraśnia 2023 hoda. Biełarusaŭ, jakija pražyvali ŭ Słavakii, pieraviali na konsulski ŭlik u Aŭstryju.
Apošnim pasłom Biełarusi ŭ Słavaččynie byŭ Ihar Laščenia. Mienavita hety dypłamat 16 žniŭnia 2020 hoda pieršym z pasłoŭ padtrymaŭ pratest i asudziŭ hvałt. 18 žniŭnia Laščenia padaŭ u adstaŭku, a 24 žniŭnia — pazbaŭleny pasady. U vieraśni taho ž hoda byłoha pasła pazbavili dypłamatyčnaha ranhu.
U žniŭni 2021 hodu Ihara Laščeniu zatrymali siłaviki i źmiaścili ŭ IČU na Akreścina. Bolš jak praz tydzień jaho vyzvalili biez pradjaŭleńnia abvinavačańniaŭ.
Kaho jašče źniali paśla pratestaŭ?
Na chvali pratestu 2020 hoda dypłamatyčnych pasadaŭ taksama pazbavilisia Vasil Markovič u Łatvii i Pavieł Pustavy ŭ Ispanii, choć hetyja ludzi adkryta pratest nie padtrymlivali. Markovič taksama byŭ pazbaŭleny dypłamatyčnaha ranhu.
U intervju «Našaj Nivie» Vasil Markovič kazaŭ: u ambasadzie Biełarusi ŭ Łatvii padčas vybaraŭ nie stali chavać, što na ich učastku pieramahła Cichanoŭskaja.
Niama pasłoŭ u susiednich Litvie i Polščy
U listapadzie 2021 hodu Alaksandr Łukašenka pazbaviŭ pasady pasła Biełarusi ŭ Francyi Ihara Fisienku. Pierad hetym Fisienku vyklikali ŭ Miensk dla kansultacyj. Aficyjny Miensk aburyła, što pasoł Francyi ŭ Biełarusi Nikala de Lakost tak i nie ŭručyŭ davierčyja hramaty Alaksandru Łukašenku, a tolki tahačasnamu ministru zamiežnych spraŭ Uładzimiru Makieju.
Nie maje Biełaruś pasłoŭ i ŭ susiednich krainach. U červieni 2021 hoda apošniaha pa časie ambasadara Biełarusi ŭ Litvie Valeryja Baranoŭskaha pryznačyli pasłom na Kubu. U traŭni 2022 hodu Łukašenka vyzvaliŭ z pasady pasła Biełarusi ŭ Polščy Uładzimira Čušava.
Dzie jašče niama biełaruskich pasłoŭ?
Ad červienia 2020 hoda Biełaruś nie maje pasła ŭ Italii. Kolišniaha ambasadara Alaksandra Hurjanava pieraviali na pasadu pieršaha namieśnika ministra zamiežnych spraŭ Biełarusi. U 2021 hodzie ŭ italjanskich ŚMI prachodziła infarmacyja, što aficyjny Rym admaŭlajecca vydać ahreman na pryznačeńnie pasłom pres-sakratara MZS Anatola Hłaza.
Vakantnyja taksama pasady pasłoŭ Biełarusi ŭ Bielhii (Alaksandr Michnievič adpraŭleny ŭ adstaŭku ŭ lipieni 2021 hoda), Čechii (Valery Kurdziukoŭ adpraŭleny ŭ adstaŭku ŭ vieraśni 2021 hoda), Bałharyi (Alaksandr Łukaševič źniaty ŭ sakaviku 2022 hoda), Rumynii (Andrej Hrynkievič źniaty ŭ lipieni 2022 hoda), Estonii (Viačasłaŭ Kačanaŭ źniaty ŭ kastryčniku 2023 hoda).
Nia maje Biełaruś na siońnia ambasadara i ŭ Vialikaj Brytanii, jakaja vyjšła ź Jeŭraźviazu. Maksim Jermałovič 1 žniŭnia 2022 hoda byŭ pryznačany namieśnikam kiraŭnika Administracyi Łukašenki i pakinuŭ dypłamatyčnuju pracu.
Chto ź jeŭrapiejcaŭ zastaŭsia?
Z krainaŭ ES u Miensku na siońniašni dzień jość dva ambasadary. U 2023 hodzie svajho pasła ŭ Biełaruś adpraviła Vienhryja i praciahvaje svaju misiju ŭ Minsku pasoł Bałharyi Hieorhi Vasileŭ. Jon na hetaj pasadzie ad 2019 hoda.
Situacyju ź Italijaj padajuć pa-roznamu. Na sajcie pasolstva Tamaza Pjetra Markiedžani nazvany «časovym pavieranym u spravach», a voś dziaržaŭnaje biełaruskaje telebačańnie nazyvaje jaho «pasłom». Jak by tam ni było, davierčyja hramaty Łukašenku Markiedžani nie ŭručaŭ.
Pa-raniejšamu pasłom Łatvii ŭ Biełarusi značycca Ejnars Semanis, ale z prypiskaj «z rezidencyjaj u Ryzie».
U lipieni 2023 hoda Biełaruś pakinuŭ ambasadar Niamieččyny Manfred Huterer. Ciapier pasolstvam kiruje časovy pavierany. Pasolstvam Francyi — taksama pavierany ŭ spravach Biełarusi Ludavik Ruaje.
Pradstaŭnica Litvy Asta Andryjaŭskienie maje status Ambassador-at-Large (pasoł pa asobych daručeńniach), jana znachodzicca ŭ Vilni. Artur Michalski, jaki byŭ pasłom Polščy ŭ Biełarusi, u vieraśni 2023 hoda byŭ pryznačany śpiecpradstaŭnikom MZS Polščy pa supracoŭnictvie z demsiłami Biełarusi. U listapadzie 2023 hoda Šviecyja pryznačyła Krystynu Juhanesan śpiecpasłańnikam pa suviaziach z demakratyčnaj Biełaruśsiu.
Zdajuć u arendu katedž zahinułaha chakieista Cypłakova ŭ Drazdach. Voś interjery FOTY20
Kamientary