Nie tolki luksavyja aŭtamabili. Jakija jašče tavary mohuć zabaranić vyvozić z Polščy ŭ Biełaruś
Dniami stała viadoma, što Polšča ŭ adnabakovym paradku i biez papiaredžańnia prypyniła vypusk u Biełaruś aŭto z abjomam ruchavika bolšym za 1,9 litra. «Naša Niva» vyvučyła, što havorycca ŭ dakumiencie, na jaki spasyłajecca polskaja mytnia, kali admaŭlajecca afarmlać ekspart u našu krainu.
Dadatkovyja miery kantrolu za rucham padsankcyjnych tavaraŭ
Usio pačałosia z taho, što z 23 sakavika ŭ pryhraničnych čatach i sacyjalnych sietkach pačała źjaŭlacca infarmacyja pra toje, što polskaja mytnia bolš nie afarmlaje nabytyja ŭ roznych krainach ES aŭto z abjomam ruchavika bolšym za 1,9 litra.
Ad pierahonščykaŭ pačali patrabavać daviedku ad vytvorcy, dzie budzie paznačała, što vytvorca viedaje pra toje, što aŭtamabil nakiroŭvajecca tranzitam praz terytoryju Biełarusi i Rasii. A taksama, što vytvorca viedaje, dzie znachodzicca punkt pryznačeńnia, kim źjaŭlajecca pradaviec i pakupnik. Usio heta nibyta patrebna dla taho, kab nie byli parušany sankcyi.
«Naša Niva» atrymała kopiju dakumienta, na jaki spasyłajucca polskija mytniki.
Pastanovu vydała Ministerstva finansaŭ Polščy 22 sakavika 2024 hoda. Dakumient pryznačany dla raspaŭsiudu ŭ padatkovyja i mytnyja orhany Polščy.
Nieabchodnaść prymać dadatkovyja miery kantrolu za rucham tavaraŭ abhruntoŭvajuć chutkim pavieličeńniem ekspartu tavaraŭ, jakija padpadajuć pad sankcyi, u krainy Jeŭrazijskaha sajuza. Mytnikam i padatkavikam rekamiendujuć bolš aktyŭna praduchilać abychod sankcyj.
U pryvatnaści, polskaje Ministerstva finansaŭ spasyłajecca na dakumient, jaki byŭ pryniaty amal dziesiać hadoŭ tamu — 31 lipienia 2014 h. Pa ŭsioj bačnaści, heta byŭ adkaz na anieksiju Rasijaj Kryma i padtrymku sieparatystaŭ na Uschodzie Ukrainy.
U dakumiencie cytujuć asobnyja častki artykułaŭ, na jakija spasyłajecca polski Minfin: «zabaraniajecca śviadoma i naŭmysna ŭdzielničać u dziejnaści, metaj abo vynikam jakoj źjaŭlajecca abychod zabaronaŭ, ustanoŭlenych u hetym rehłamiencie» i «mytnyja orhany nie dazvalajuć vypusk tavaraŭ, kali ŭ ich jość razumnyja padstavy padazravać machlarstva, i nie dazvalajuć reekspart adpaviednych tavaraŭ u Rasiju».
Kali mohuć patrabavać daviedku ad vytvorcy?
Dalej idzie pieralik tavaraŭ i mytnych kodaŭ, pry eksparcie jakich u krainy JEAES, Tadžykistan, Uźbiekistan, a taksama Turcyju i AAE supracoŭnik mytni maje prava (a nie abaviazany) zapatrabavać tuju samuju daviedku ad vytvorcy tavaraŭ. Rabić heta treba ŭ vypadkach, kali mytnik zapadozryć, što kančatkovym atrymalnikam budzie RF, a nie inšyja krainy, paznačanyja jak kančatkovy punkt pryznačeńnia.
Admietna, što ŭ śpis hety tavaraŭ uvachodziać nie tolki aŭtamabili i aŭtamabilnyja zapčastki.
U pieraliku jeść pieršyja ličby mytnych kodaŭ tavaraŭ: 84 — jadziernyja reaktary, katły, mašyny i miechaničnyja pryłady i ich častki, 85 — elektryčnyja mašyny i pryłady i ich častki, dyktafony i prajhravalniki, pryłady zapisu malunkaŭ i prajhravalniki, častki hetych vyrabaŭ, 87 — nierejkavyja transpartnyja srodki, ich častki.
To-bok, pry žadańni polskaja mytnia moža nie prapuskać praz svaju miažu nie tolki aŭtamabili, ale i pradmiety techniki.
Važna, jak raźličylisia za tavar
Paśla pieraliku tavaraŭ u liście ad polskaha Minfina davodzicca nastupnaja infarmacyja:
«Paśla praviadzieńnia analizu ryzyk i vyvučeńnia takich dakumientaŭ, jak: rachunki-faktury, transpartnyja dakumienty, kantrakty i paćviardžeńnie apłaty tavaraŭ, jakija źjaŭlajucca pradmietam mytnaj apieracyi, [supracoŭniki mytni] majuć prava zapatrabavać pradastaŭleńnie dakumienta abo infarmacyi, vydadzienaj vytvorcam tavaru, jaki padlahaje ekspartu abo reekspartu».
Aproč hetaha, Ministerstva finansaŭ raić źviartać dadatkovuju ŭvahu na toje, jakim čynam pravodziŭsia raźlik za tavary sa śpisu. Siarod prykładaŭ pryvodziać raźliki z dapamohaj kryptavalut, a taksama z pasiarednictvam takich krain, jak Siejšelskija vyspy i AAE.
«Bolš za toje, u vypadkach, kali tavary padlahajuć mytnym praceduram i mohuć uźniknuć padazreńni ŭ abychodzie ŭstanoŭlenych sankcyj, zaŭsiody nieabchodna atrymać ad dekłaranta-atrymalnika rehistracyjnyja danyja atrymalnika, h. zn. najmieńnie i adras miescaznachodžańnia zamiežnaha kontrahienta, identyfikacyjny numar u adpaviednym rejestry zamiežnaj dziaržavy, datu rehistracyi, a taksama imiony i proźviščy asob, jakija ŭvachodziać u orhan, upaŭnavažany pradstaŭlać tvar, i ich identyfikacyjnyja numary», — havorycca ŭ dakumiencie.
Taksama Minfin nahadvaje, što treba nie prymać pry padačy ekspartnyja i mytnyja dekłaracyi ŭ vypadkach, kali maršrut dastaŭki vyhladaje niełahičnym i nie rentabielnym.
Kali sapraŭdy mohuć nie vypuścić?
Vyvučyŭšy dakumient, možna pryjści da vysnovy, što abmiežavańniaŭ pa ŭvozie ŭ Biełaruś aŭto z abjomam ruchavika bolš za 1,9 litra i koštam bolš za 50 tysiač jeŭra (u niezaležnaści ad abjomu) jak nie było, tak i niama. Sankcyi ES pa-raniejšamu zabaraniajuć ekspart takich aŭto tolki ŭ RF. Hetaje abmiežavańnie dziejničaje jašče z 23 červienia 2023 hoda.
Tym nie mienš, prynamsi ŭ častcy vypadkaŭ, u polskich mytnikaŭ sapraŭdy jość usie padstavy ličyć, što aŭtamabil nakiroŭvajecca nie ŭ Biełaruś abo ŭ Kazachstan, a ŭ Rasiju.
Jak pisała «Naša Niva» raniej, Polšča da 23 sakavika była samaj łajalnaj krainaj u płanie propusku praź miažu aŭto, nabytych u ES. «Jany vypuskali mašyny biez dadatkovych pytańniaŭ, ich nie cikaviła, chto i jak zapłaciŭ za aŭto, kudy jano nakiroŭvajecca, čamu pakupnik — adzin čałaviek, a viazie inšy», — raspaviadaŭ «Našaj Nivie» pierahonščyk.
Naprykład, taja ž Litva daŭno patrabavała pašyrany pakiet dakumientaŭ. U adroźnieńnie ad palakaŭ, litoŭcy daŭno nie prapuskajuć praz svaju miažu mašynu, kali za styrnom znachodzicca nie sam pakupnik aŭto. Płaciež za aŭto, invojs i JECH musiać być aformlenyja na taho, chto niepasredna vyvozić mašynu.
Što na bałtyjskim kirunku?
Litva vypuskaje ŭ Biełaruś aŭto ź lubym abjomam ruchavika ŭ niezaležnaści ad koštu mašyny. Hałoŭnaje, kab dakumienty byli ŭ paradku.
Što tyčycca Łatvii, to ad učora ŭ čatach pačała źjaŭlacca infarmacyja pra toje, što nibyta łatvijcy taksama razvaročvajuć aŭto z abjomam bolš za 1,9 litra. Mahčyma, heta tyčycca tolki tych vypadkaŭ, kali pieravozčyk abo pierahonščyk nie maje mahčymaści paćvierdzić toj fakt, što mašyna jedzie mienavita ŭ Biełaruś. Naprykład, nie mohuć paćvierdzić fakt apłaty za aŭto. Pra źjaŭleńnie niejkich novych pastanoŭ z boku łatvijskich orhanaŭ prynamsi na dadzieny momant nie viadoma.
List ad polskaha Ministerstva finansaŭ nijak nie moža raspaŭsiudžvacca na pracu litoŭskaj abo łatvijskaj mytni, bo heta nie ahulnajeŭrapiejski dakumient.
«Naša Niva» — bastyjon biełaruščyny
PADTRYMAĆ
Kamientary