«Zamiatalin napiŭsia na «Biełaruśfilmie» i pačaŭ stralać ź pistaleta». Łatuška raskazaŭ, jak zmoh zvolnić ideołaha
Łukašenka dazvoliŭ vyhnać Zamiatalina paśla vybaraŭ-2010.
Pavieł Łatuška ŭ efiry tok-šou «Obyčnoje utro» raskazaŭ pra toje, jak zmoh zvolnić Uładzimira Zamiatalina — byłoha savieckaha zampalita rasijskaha pachodžańnia, jaki ŭ 1990-ja staŭ adnym z najbližejšych paplečnikaŭ Alaksandru Łukašenki.
Zamiatalin byŭ namieśnikam kiraŭnika Administracyi prezidenta, adkaznym za ideałohiju, a paśla vice-premjeram. Jaho nazyvali aŭtaram dvuch biełaruskich refierendumaŭ, chrosnym baćkam «Dažynak» i «Słavianskaha bazaru».
A kali Łatuška pracavaŭ ministram kultury, Zamiatalin uznačalvaŭ kinastudyju «Biełaruśfilm».
Łatuška adznačaje, što heta byŭ čałaviek, jaki «nie ličyŭ, što jość biełaruskaja mova i kultura». Tamu dla Łatuški było važnaj spravaj zrabić tak, kab Zamiatalin nie mieŭ nijakaha dačynieńnia da śfiery kultury.
«Dumka pra toje, jak adchilić Zamiatalina, zaŭsiody kruciłasia ŭ majoj hałavie», — pryznajecca były ministr kultury. Ale heta było składana zrabić praz toje, što były hałoŭny ideołah byŭ vielmi blizki da Łukašenki.
Ale niečakana Zamiatalin sam padstaviŭsia. Jak zhadvaje Łatuška, jon napiŭsia na kinastudyi «Biełaruśfilm» i pačaŭ stralać ź pistaleta — svajoj asabistaj zbroi.
U toj čas u Biełaruś pryjechaŭ viadomy režysior Emir Kusturyca, ale pjany Zamiatalin nie zmoh ź im sustrecca. Takija pavodziny dali Łatušku nahodu paskardzicca Łukašenku na dyrektara kinastudyi.
«Ja schitryŭ. Pamiataju, kali my adkryvali Mirski zamak, ja išoŭ pa leśvicy z Łukašenkam. … U mianie była nahoda Łukašenku skazać: «Hladzicie, jon užo pje biesprabudna. Jon stralaje ź pistaleta. Jon nie sustrakajecca z suśvietna viadomym režysioram».
Jon (Łukašenka — NN) kaža: «Prybirajcie jaho z pasady paśla vybaraŭ» (majucca na ŭvazie prezidenckija vybary, jakija adbylisia 19 śniežnia 2010 hoda — NN)».
Łatuška zaŭvažaje, što źniaŭ Zamiatalina, ale Łukašenka jamu hetaha nie daravaŭ.
«Jon pastaviŭsia da hetaha vielmi krytyčna. Jakoje ja mieŭ prava adchilić ad pasady hienieralnaha dyrektara nacyjanalnaj kinastudyi biez zhody ź im? Ale ja jamu pryhadaŭ našu razmovu i jon skazaŭ: «Akiej. Tady vy budziecie adkazvać za śfieru kino».
Papularny tyktokier z Rasii tusić u darahich restaranach Minska: «Byccam bamžu padali. Žarycie, na zdaroŭje»28
Kamientary
U našaj krainie nielha dapuskać rasiejcaŭ i im padobnych da palityki, biez roźnicy ci pad kz ci bčb (roznyja Ivany i Taćjany).