Śpiavak maje nie tolki miljony prasłuchoŭvańniaŭ na stryminhach, ale ŭ 28 hadoŭ užo ŭsprymajecca jak kultavy muzykant u svaim žanry. U jaho bijahrafii i tvorčaści niamała biełaruskich śladoŭ.
Yung Lean pa pravie ličać sučasnym tvaram kłaŭd-repa — stylu, jaki charaktaryzujecca spakojnym, rassłablenym i «tumannym» hučańniem. Jon pryŭnios na chip-chop scenu ŭnikalny i ekśpierymientalny huk, spałučajučy ŭ svajoj muzycy elemienty tryp-chopa, embijenta i drym-popa. Yung Lean časta krytykujuć za «biessensoŭnyja» i «niaskładnyja» teksty piesień, adnak jon śćviardžaje, što takim čynam prosta choča vykazać siabie ŭ muzycy.
«Savieckaja» siamja
Budučaja zorka chip-chopa pachodzić ź siamji tvorčaj intelihiencyi, jakaja ščylna źviazała siabie z našym rehijonam.
Ściežku da Biełarusi prakłała jašče jahonaja babula — žurnalistka Dysa Chostad, jakuju sami šviedy nazyvajuć niajnačaj jak «naša lehiendarnaja Dysa». U 1970—1980-ch hadoŭ jana pracavała karespandentkaj adnoj z najbolš papularnych šviedskich Dagens Nyheter u SSSR, a paśla 1992 hoda — užo ŭ Rasii. Pra Saviecki Sajuz u Dysy Chostad vyjšli čatyry knihi, adna ź jakich była pryśviečana piśmieńnikam, a jaje dom u Stakholmie na peŭny čas staŭ samym ruskim miescam u Šviecyi.
U Maskvu Dysa prajechała sa svajoj čatyrochhadovaj dačkoj Elzaj, jakaja naradziłasia ad anhlijskaha dramaturha Arnalda Ueskiera. Dziaŭčynka piać hadoŭ pravučyłasia ŭ savieckaj škole. Vydatnaje viedańnie ruskaj movy vyznačyła jaje dalejšuju karjeru. U 1997-1999 hady jana pracavała ŭ Prahramie raźvićcia AAN u Minsku, zajmałasia pravami čałavieka ŭ Biełarusi. Paśla trapiła va ŭradavuju arhanizacyju SIDA i vyrašała pytańni mižnarodnaha supracoŭnictva, raźvićcia i pravoŭ ŁHBT-mienšaści ŭ roznych krainach śvietu — ad SND da Amieryki. Siońnia jana zajmaje pasadu pasła Šviecyi ŭ Ałbanii.
Archiŭnaje videa, na jakim maleńki Junatan razmaŭlaje pa-rusku
Na pracu ŭ Minsk Elza pierajechała razam ź siamjoj: mužam Krystafieram Leandoeram i adnahadovym synam Junatanam. Elza chacieła, kab u jaje syna było dziacinstva, padobnaje da taho, jakoje było ŭ jaje. Praz heta časta možna pabačyć infarmacyju, što jon naradziŭsia mienavita ŭ Minsku, ale jaho rodny horad usio ž Stakholm.
Jahonamu baćku Krystafieru Leandoeru, šviedskamu žurnalistu i piśmieńniku, za niadoŭhi čas žyćcia ŭ Biełarusi ŭdałosia naładzić dobryja suviazi ź biełaruskimi litaratarami.
Jahonyja vieršy ŭ pierakładzie takich zorak, jak Ryhor Baradulin i Aleś Razanaŭ, byli źmieščanyja ŭ šviedska-biełaruskim zborniku «4+4+4», jaki pabačyŭ śviet u 1999 hodzie. U tym ža hodzie ŭ pierakładzie Baradulina byŭ asobna vydadzieny zbornik paezii Leandoera «Vieršy dla Elzy».
Vizit Krystofa Leandoera z Ryhoram Baradulinym u majsterniu pa vyrabie muzyčnych instrumientaŭ
Leandoer staŭ hanarovym siabram Biełaruskaha PEN-centra. Pra biełarusaŭ nie zabyvaŭsia: u 2011 hodzie braŭ udzieł u Marafon šviedskich litarataraŭ u padtrymku Biełarusi.
Razam z baćkami Junatan Chosted pravioŭ try hady svajho dziacinstva ŭ Minsku. Pieršaj jaho movaj stała ruskaja, ale paśla viartańnia ŭ Stakholm jon vyvučyŭ šviedskuju, a ruskuju zabyŭ.
Uzychodžańnie
Žyćcio ŭ Šviecyi dla Junatana, zdavałasia, pajšło pa nachilnaj. U škole ŭ jaho byli prablemy z narkotykami, va ŭzroście 15 hadoŭ jon navat atrymaŭ umoŭny termin za kureńnie kanabisu.
Ale Chosted zacikaviŭsia chip-chopam i adnojčy ŭ miascovym parku paznajomiŭsia z dvuma chłopcami, jakija padzialali jahonyja husty ŭ muzycy. Razam jany stvaryli Hasch Boys, jaki, praŭda, praisnavaŭ niadoŭha.
Chłopiec uziaŭ sabie tvorčy psieŭdanim Yung Lean, jahonyja siabry — Sherman i Gud, ale z toj ža prystaŭkaj Yung. U chip-chop-kultury papularnyja prystaŭki da imieni, jakija zvyčajna źjaŭlajucca abrevijaturami ź niekalkich litar, zrazumiełych tolki amataram žanru. U vypadu z Yung usio praściej — prystaŭka pakazvała na maładość muzykantaŭ (anhł. Young — małady, juny), jakim na toj momant jašče nie spoŭniłasia i 18 hadoŭ.
Z Sherman i Gud jon stvaryŭ novy hurt Sad Boys, jaki chutka znajšoŭ svaich prychilnikaŭ praź internet-servisy. U mai 2013 hoda chłopcy vystupili sa svaim pieršym kancertam u Hioteborhu.
Sapraŭdnuju papularnaść Yung Lean zdabyŭ dziakujučy svajmu treku Ginseng Strip 2002, jaki zavirusiŭsia na jutubie ŭ tym ža hodzie. Jon uvajšoŭ u jahony debiutny mini-albom «Lavender», jaki pabačyŭ śviet u žniŭni 2013. Yung Lean pačaŭ raźjazdžać z turami pa krainach Jeŭropy i Paŭnočnaj Amieryki. U 2022 hodzie trek Ginseng Strip 2002 zdabyŭ druhoje naradžeńnie dziakujučy papularnaści ŭ TikTok.
Padzieńnie
U čas zapisu svajho druhoha studyjnaha alboma Warlord repier žyŭ u Majami-Bič, dzie znoŭ padsieŭ na narkotyki. U krasaviku 2015 hoda ŭ jaho adbyłasia pieradaziroŭka, i jon trapiŭ u špital. U hety ž čas pamior jahony blizki siabar. Stan u chłopca byŭ taki, što jon navat nie paznaŭ spačatku baćku, jaki prylacieŭ zabrać jaho ŭ Šviecyju. Kala dvuch miesiacaŭ śpiavak pravioŭ u adnosnaj izalacyi ŭ sielskaj miascovaści, pierš čym viarnucca ŭ šviedskuju stalicu. U 2017 hodzie ŭ jaho dyjahnastavali bipalarny razład, čaho śpiavak nie chavaje.
Niahledziačy na prablemy, u tym ža hodzie ŭ jaho vyjšaŭ treci albom Stranger. U dakumientalnym filmie, jaki vyjšaŭ u 2020 hodzie, pakazana, što asoba Yung Lean dazvalała Junatanu źbiehčy ad paŭsiadzionnaha žyćcia, baraćby z narkotykami i psichičnych prablem. Amal kožny hod śpiavak vypuskaŭ pa albomie, a taksama sprabavaŭ siabie ŭ kino i inšych mastactvach.
Pad novym psieŭdanimam Jonatan Leandoer96, utvoranym ad proźvišča baćki (u žyćci nosić proźvišča maci), jon vypuściŭ albomy Nectar (2019), Blodhundar & Lullabies (2020) i Sugar World (2023), u jakich sprabuje adyści ad chip-chopa i ŭ boku sumiesi indy-roku i nieafołku.
Viartańnie ŭ Minsk
U 2016 hodzie Yung Lean jašče raz viarnuŭsia ŭ amal rodny Minsk, dzie 10 vieraśnia vystupiŭ kłubie RE:Public. U biełaruskaj stalicy jon taksama zrabiŭ niekalki fota ŭ padjeździe, dzie, jak śćviardžajecca, pravioŭ svajo dziacinstva. Fanaty pa hetych fota apaznali 9-paviarchovy dom pa vulicy Pulichava, 7 korpus 1.
Nie tak daŭno dom źviedaŭ kapitalny ramont, paśla jakoha stary vyhlad padjezda z vulicy niepapraŭna źmianiŭsia. Fanaty muzykanta, jakija pieratvaryli jaho ŭ miesca dla svaich fotasiesij, vykazali svoj rašučy pratest suprać ramontu, jaki, na ichniuju dumku, źniščyŭ histaryčnuju spadčynu.
U kancy 2016 hoda šviedski repier vypuściŭ na kasietach albom Psychopath Ballads, siarod jakich była sumnaja pieśnia-pryśviačeńnie Hotel in Minsk. U joj niama pramych zhadak pra Biełaruś, ale jaje tekst zmročny i depresiŭny, jak padjezd u savieckim šmatpaviarchoviku:
«Pałki i kamiani ŭ maim ciele
Ja zapluščvaju vočy, chaču pakinuć svajo cieła
Ja adčuvaju, što pamiraju
Zaplušču vočy i laču».
U 2022 hodzie Yung Lean zapisaŭ novy sinhł Bliss razam z FKA Twigs. U asnovie miełodyi sempł ź viadomaj pieśni «Na zarie» hurta Aljans. U kamientach pad klipam niechta napisaŭ pra biełaruskaje Lozna pad Viciebskam, paśla čaho papaŭźli čutki, što rolik zdymaŭsia mienavita tam. Ale kožny biełarus, jaki bačyŭ klip, moža na svaje vočy pierakanacca, što krajavidy ŭ klipie zusim nie biełaruskija.
«Naša Niva» — bastyjon biełaruščyny
PADTRYMAĆPapularny tyktokier z Rasii tusić u darahich restaranach Minska: «Byccam bamžu padali. Žarycie, na zdaroŭje»22
Kamientary