«Naš robat stajaŭ za śpinaj Łukašenki na Nacyjanalnym schodzie». Paśpiachovy IT-biznesmien raskazaŭ, čamu źjechaŭ z krainy

Hościem novaha vypusku tok-šou «Žyćcio-malina» staŭ Viktar Chamianok — uładalnik kampanii Rozum Robotics, jakaja vypuskaje robataŭ, pryznačanych dla biaśpiečnaj pracy pobač z čałaviekam.

«Naš robat stajaŭ za śpinaj Łukašenki na Nacyjanalnym schodzie, kali jon tam vystupaŭ pierad deputatami. Zrazumieła, u nas nichto nie pytaŭsia, ci možna našym robatam skarystacca dla hetaha», — zhadvaje biznesmien.

Šlach u biznes

Prahramavańniem Viktar pačaŭ zajmacca, kali vučyŭsia ŭ 5-m kłasie.

«Baćki padaryli mnie kampjutar na Novy hod. Ja žyŭ u maleńkim haradku — Brasłavie. Tam nie było, dzie kupić hulni, u mianie byŭ tolki tetrys i šachmaty. Kali hulniaŭ niama, to pačynaješ pisać ich sam», — tłumačyć mužčyna.

Paśla škoły jon pastupiŭ u Biełaruski dziaržaŭny ŭniviersitet infarmatyki i radyjoelektroniki, atrymaŭ śpiecyjalnaść inžyniera-mikraelektronika. Niekatory čas papracavaŭ prahramistam, a ŭ 25 hadoŭ zasnavaŭ svaju pieršuju kampaniju.

«Ja chacieŭ zrabić svoj JEPAM», — zhadvaje ab ambicyjnych płanach Chamianok. Ale ŭ toj čas u jaho nie było ni hrošaj, ni kantaktaŭ na Zachadzie.

«Adziny dastupny instrumient, jaki ŭ nas byŭ, heta internet-markietynh. Kali ty robiš tak, kab tvoj sajt byŭ pieršym u pošukavikach. (…) Markietołah, jaki zajmaŭsia prasoŭvańniem našaha sajta, paprasiŭ mianie kupić utylitu. Ja ničoha nie znajšoŭ dobraha i kažu: «Ja sam prahramist. Davaj što-niebudź nakidaju». Pamiataju, tady dvoje sutak nie spaŭ. Praz dvoje sutak źjaviŭsia pieršy pratatyp prahramy. Jon pahladzieŭ i skazaŭ: «Jana rašaje maju prablemu».

Paźniej Viktar udaskanaliŭ svaju prahramu i prapanavaŭ jaje pradavać. Pastupova košt ad pieršapačatkovych 20 dalaraŭ vyras da 300.

U vyniku kožny treci internet-markietołah u śviecie, adpaviedna daśledavańniam 2012 hoda, jak śćviardžaje biznesmien, karystaŭsia praduktami jaho kampanii Bell Prime.

«Kali źjavilisia pieršyja hrošy, i ich jašče nie było dastatkova, kab uziać bilet na samalot, ale my mahli sabie dazvolić uziać taksi, pryjechać u aeraport, pastajać, vykuryć cyharetu, pahladzieć, jak uźlatajuć samaloty, pamaryć, jak my kaliści palacim u niejkija inšyja krainy, viarnucca. I voś heta vielmi mocna ruchała ŭ svoj čas», — zhadvaje Chamianok.

Adkul zachapleńnie robatami

Chamianok u dziacinstvie vielmi lubiŭ čytać:

«Ja pieračytaŭ usiu haradskuju biblijateku ŭ Brasłavie, i bolš za ŭsio ja lubiŭ čytać fantastyku. Heta kosmas, heta robaty, heta budučynia. I pa vialikim rachunku ja prahramistam staŭ jakraz tamu, što maryŭ pra toje, što budu rabić niešta takoje, źviazanaje z budučyniaj.

Kali ja stvaraŭ Bell Prime, to nie dumaŭ, što ja budu ŭsio svajo žyćcio zajmacca prahramnym zabieśpiačeńniem dla internet-markietynhu. Ja dumaŭ, što heta ŭsiaho tolki pieršaja prystupka, ad jakoj ja adšturchnusia. Budzie druhaja prystupka, tam, dzie ja ŭžo zajmusia niečym bolšym».

Praź dziesiać hadoŭ, pa słovach Chamianka, u jaho adbyłosia pieraasensavańnie sensu žyćcia, i jon źmianiŭ napramak svajoj dziejnaści:

«Dniom chavaju baćku, uviečary ŭ mianie naradžajecca syn. Takoje koła sansary adbyvajecca, adbyvajecca pieraasensavańnie, chto ja, što ja, navošta ja na hetym śviecie, navošta ja hetym zajmajusia. Nu, mianie, viadoma, tady vielmi mocna ŭzrušyła. Niejki čas ja padumaŭ, pryjšoŭ da svajho partniora, pacisnuŭ jamu ruku, kažu: «Słuchaj, ja pajdu dalej». I pajšoŭ rabić robataŭ».

«Kali ja pačaŭ prahramavać, heta niejki cud, kali ty kampjutaru daješ niejkuju prahramu, i jon pačynaje rabić toje, što ty žadaješ. Moža być, tam niejkija karcinki malavać ci tam kubiki niejkija ruchać, ale heta mahija.

A kali ty zajmaješsia žalezam, heta mahija, jakaja prynosicca ŭ naš realny śviet. I kali hety robat upieršyniu zavarušyŭsia, ty nie ŭjaŭlaješ, jakija adčuvańni», — dzielicca svaimi emocyjami Chamianok.

Čamu vyjšaŭ ź biznesu

Paśla padziej 2020 hoda, jak raskazvaje biznesmien, jon pasvaryŭsia z uładami:

«U mianie žonka zajmałasia «ekstremisckaj dziejnaściu» — dapamahała ludziam u 2020 hodzie. Praz paŭtara hoda paśla vybaraŭ pryjšoŭ sihnał, i my, nie viartajučysia dadomu, sabrali dva z pałovaj čamadany i źjechali na aŭtobusie ŭ Kijeŭ. Pasiadzieli niekatory čas u Kijevie i za paŭtara miesiaca da vajny paśpieli pierabracca ŭ Vilniu», — raskazvaje Chamianok.

Z pačatkam vajny va Ukrainie mužčyna vyjšaŭ z svajho biznesu ŭ Biełarusi.

Pa słovach Chamianka, jaho rašeńnie ab vychadzie ź biznesu składałasia ź dźviuch častak — racyjanalnaj i iracyjanalnaj: «Racyjanalnaja častka: ja zrazumieŭ, što pabudavać mižnarodnuju kampaniju nie atrymajecca, a zajmacca niejkaj biazmetnaj rabotaj ja nie lublu. Było, zrazumieła, i iracyjanalnaje. Ale ja nie liču, što heta hieraizm».

Jak tłumačyć Chamianok, takoje rašeńnie jon pryniaŭ z-za taho, što dva asnoŭnyja inviestary jaho kampanii byli z Rasii. Pryčym adzin ź ich byŭ źviazany z rasijskim vajennym chołdynham. Hetych inviestaraŭ jon znajšoŭ u 2017 hodzie. Jak tłumačyć biznesmien, na toj čas vybar byŭ ci zakryć kampaniju, ci ŭziać «taksičnyja hrošy» dla taho, kab praciahvać spravu.

«Paśla majho zychodu na praciahu miesiaca ŭ kampanii nie zastałosia nivodnaha raspracoŭščyka. Jašče praz dva tydni pajšoŭ uvieś kamiercyjny adździeł. Zastałasia tolki vytvorčaść. To-bok jany nie zdoleli ŭtrymać ludziej. Pačalisia prablemy ź impartam-ekspartam. Niemahčyma było nabyvać kamplektujučyja, narmalna handlavać».

Chamianok raskazvaje, što ŭ svoj čas u raźvićcio kampanii ŭkłaŭ kala dvuch miljonaŭ dalaraŭ. Kali jon pajšoŭ z kampanii, to atrymaŭ «umoŭna adnu dziasiatuju ad taho, što inviestavaŭ».

Heta źviazana z tym, što jaho dola «była nie vielmi likvidnaja», tamu «daviałosia pahadžacca z tym, što prapanavali».

Robat u kožny dom

Pa prahnozach Chamianka, na praciahu piaci hadoŭ źjaviacca robaty-optymusy, jakija vyhladajuć jak čałaviek i zdolnyja vykonvać pracu pa domie.

«Jon moža prybrać cacki za dziećmi, prynieści šklanku vady, pryhatavać viačeru», — tłumačyć biznesmien. Ale, pa jaho słovach, košt ich budzie składać ad 30 da 50 tysiač dalaraŭ.

«Nie kožnaja siamja zmoža ich dazvolić, ale, jak i aŭtamabil, jany praniknuć u kožny dom», — prahnazuje Chamianok.

Jak zrabić krutuju kampaniju

Chamianok adznačaje, što ŭ kožnaha čałavieka jość try-piać hadoŭ na toje, kab dasiahnuć pośpiechu.

Jak tłumačyć jon, «heta ŭłaścivaść čałaviečaj psichiki: my z radaściu pačynajem niejkuju novuju spravu, kali raściom, kali vučymsia niečamu novamu». Jon sam nie moža sabie ŭjavić, kab zajmacca adnym i tym ža biznesam, naprykład, 20 hadoŭ.

«Mnie chočacca čahości novaha. Tamu ty pavinien (navat kali ty praciahvaješ tuju samuju spravu, što pačaŭ daŭno) znachodzić niejkija novyja prajekty, zapuskać novyja pradukty, niešta pavinna być novaje», — ličyć Chamianok.

Mužčyna adznačaje, što ŭ lubym biznesie vielmi važna adčuć, kali jon bolš nie moža raźvivacca i prynosić prybytak: «Adzin čałaviek skazaŭ dobruju frazu: jość dźvie prymaŭki: «Nikoli nie zdavajsia» i «Kali koń zdoch, źleź ź jaho». Ale zaŭsiody vielmi składana vyznačyć voś hety momant — kali treba zdacca z-za kania, jaki zdoch».

Jašče adno praviła, jakim dzielicca Chamianok: «Kali vy samy niezamienny člen kamandy, to vas treba zvolnić jak maha chutčej»:

«Niezamiennyja ludzi — heta pahroza dla biznesu. (…) Ale samaje niebiaśpiečnaje — heta kali ŭłaśnik kampanii stanovicca niezamiennym dla svajoj kampanii, tamu što kali ź im niešta adbyvajecca, kali ŭ jaho źnikaje cikavaść, vyharaje, to pad adchon lacić uvieś biznes. Tamu funkcyi pavinny reziervavacca, i pavinien być płan B».

Nastupnaje praviła, jakim raić karystacca Chamianok: «Dobry kiraŭnik toj, jaki ŭsio viedaje i ŭmieje, ale ničoha nie robić sam, tamu što jaho ruki źviazany za śpinaj».

Jak tłumačyć Chamianok, «u kiraŭnika zaŭsiody jość vialikaja spakusa zrabić usio samomu, tamu što jon viedaje, jak heta treba rabić, jak heta treba rabić dobra, ale ŭ hetym niama kropki rostu dla supracoŭnikaŭ i niama kropki rostu dla kampanii, tamu što resursy kiraŭnika vielmi abmiežavanyja, i kali jon budzie rabić usio sam, to kampanija raści nie budzie. Adpaviedna, ty pavinien delehavać, ty pavinien daviarać ludziam, kab jany rabili i raśli».

• 14
• 2
• 2
• 0
• 0
• 0
• 0
• 1