Biełarus Arciom zapuściŭ u Polščy zbor na dapamohu sabie. Mnohija pavieryli, a jon akazaŭsia machlarom

Infarmacyja pra hety zbor źjaviłasia ŭ siecivie niekalki miesiacaŭ tamu, a niekatoryja karystalniki śćviardžajuć, što bačyli jaho jašče ŭ minułym hodzie (u nas nie atrymałasia znajści paćvierdžańniaŭ). Pa instahramie raźlacieŭsia tekst, aŭtar jakoha raskazvaŭ nibyta pra siabie i siastru, jakija źbiehli ŭ Polšču ad palityčnaha pieraśledu. Im, miarkujučy pa tekście, patrabavałasia dapamoha:

«Siastra była vymušanaja biehčy ciažarnaj, ciapier naradziła ŭ Polščy. Paśla šerahu składanych apieracyj nam nieabchodna apłacić adrazu niekalki rachunkaŭ na ahulnuju sumu 21500 złotych (heta 5000 jeŭra — NN). Na ciapierašni momant sabrana 16500 złotych. My hatovyja nie prosta pryniać dapamohu, ale i hatovyja pazyčyć hrošy».

Dalej u tekście byli prapisanyja rekvizity dla pieravodaŭ pa polskaj płaciožnaj sistemie BLIK i numar kartki.

9 listapada hetaha hoda błohier @RicPiccolo apublikavaŭ u tvitary post, dzie raskazaŭ padrabiaźniej pra hety zbor — pavodle jaho słoŭ, za zboram stajać machlary.

Błohier nazvaŭ imia čałavieka, jaki staić za zboram — Arciom Taŭstyka. Kartku jamu daŭ jahony znajomy Dźmitryj Kazanovič.

My raspytali @RicPiccolo padrabiaźniej pra toje, jak jon paznajomiŭsia ź mierkavanymi machlarami. Kastuś (imia źmienienaje) raskazvaje, što zaŭvažyŭ zbor paśla taho, jak infarmacyju pra jaho pierapościła ŭ instahramie Alaksandra Hierasimienia. Chutka zbor pačali raspaŭsiudžvać i ŭ tvitary, i Kastuś sam pisaŭ pra jaho.

Paśla hetaha ź im źviazaŭsia Arciom Taŭstyka:

«Jon mnie padziakavaŭ i skazaŭ, što zbor idzie vielmi ciažka. Potym ja dapamoh jamu, darečy, na narmalnyja hrošy. Jość ludzi, jakija zadanacili hetamu čałavieku bolš za tysiaču złotych, ja sam jamu zadanaciŭ amal što tysiaču (kala 230 jeŭra — NN). Čałaviek ciśnie na škadavańnie — maŭlaŭ, ludzi pryjechali paśla pieraśledu ŭ Biełarusi, majuć prablemy paśla taho, jak užo ŭ Polščy ŭ ich siamji naradziłasia dzicia. To-bok ja troški trapiŭ u emacyjnuju pastku.

Potym ja zaŭvažyŭ, što čałaviek skidaje falšyvyja fiskalnyja dakumienty. Tady ja pačaŭ pytacca ŭ znajomych, ci danaciŭ jamu chto i čym heta skončyłasia. Znajšoŭ paru čałaviek, jakija taksama ŭ im sumniavajucca».

Pa słovach Kastusia, Arciom Taŭstyka skidaje i inšym ludziam, jakija jamu danacili, falšyvyja dakumienty — naprykład, čeki ci miedycynskija papiery. Darečy, nakont dakumientaŭ: jość pratakoł ab administratyŭcy, vypisany ŭ dačynieńni da Taŭstyki, i tam paznačana, što raniej mužčyna byŭ sudzimy za machlarstva.

Kastuś razam ź inšym błohieram chutka vyśvietlili imiony ludziej, jakija stajać za zboram, i źviarnulisia ŭ polskuju palicyju z usioj infarmacyjaj pa spravie. Kastuś taksama napisaŭ zajavu ŭ palicyju, i jaje pryniali. Vierahodna, heta tolki pačatak: biełarus kaža, što i inšyja paciarpiełyja ad zboru hatovyja nakiravać u palicyju svaje zajavy. Chłopiec kaža, što paciarpiełyja stvaryli ahulny čat — ciapier u im 12 čałaviek, ale heta nie ŭsie paciarpiełyja, chto jamu viadomy, bo niekatorych ludziej jon nie zdoleŭ vieryfikavać. 

Pavodle słoŭ Kastusia, kali jon apublikavaŭ vyniki svajho mini-rasśledavańnia, Arciom Taŭstyka vyjšaŭ na jaho siamju i ciapier pahražaje jahonym svajakam u Biełarusi. Kastuś taksama znajšoŭ akaŭnt u instahramie «siastry Arcioma». Dziaŭčyna, jakoj naležyć staronka, sapraŭdy niadaŭna stała maci, ale na zapyt błohiera pa kamientar jana adkazała błakavańniem.

Arciom Taŭstyka nie tolki raspaŭsiudžvaŭ tekst zboru, ale i pisaŭ paviedamleńni karystalnikam sacsietak z prośbaj dapamahčy. Kab vyklikać da siabie davier, mužčyna karystaŭsia znajomstvami ŭ NDA-siektary, a taksama spasyłaŭsia na arhanizacyi, jakija jamu ŭžo nibyta dapamahli — «Viasnu», «Bajsoł» i «Bajchełp».

Taksama, kaža Kastuś, Arciom Taŭstyka stvaryŭ u telehramie fejkavyja akaŭnty znajomych jamu supracoŭnikaŭ «Viasny». I kali ŭ jaho pytalisia, jak mahčyma pravieryć jahonuju historyju, Arciom, pavodle słovaŭ Kastusia, davaŭ ludziam spasyłki na hetyja akaŭnty i dalej kamunikavaŭ ź imi byccam by ŭ jakaści «viasnoŭca».

Kastuś pieradaŭ «Našaj Nivie» skrynšoty kamunikacyi z Taŭstykam, dzie adlustravanyja ŭ tym liku i pahrozy ad Arcioma ŭ bok adnaho z paciarpiełych.

Na inšych skrynach Taŭstyka piša, byccam by jamu dapamahli Alaksandra Hierasimienia i Jaŭhien Bułka — tut možna adznačyć, što niekatoryja publičnyja asoby nasamreč dapamahali raspaŭsiudžvać infarmacyju pra zbor, nie viedajučy, što za im staić machlar. Taksama Taŭstyka śćviardžaŭ, što ŭ jaho brali intervju pra zbor Most i «Naša Niva». U Most nam raskazali, što Arciom nasamreč źviartaŭsia da ichnich žurnalistaŭ sa svajoj historyjaj, ale redakcyja pryniała rašeńnie nie rabić publikacyju. Nie było takich publikacyj i na «Našaj Nivie».

My taksama źviazalisia ź Dźmitryjem Kazanovičam, na čyju kartku źbiralisia hrošy, i vysłuchali jaho viersiju padziej. Kazanovič nazyvaje Taŭstyku svaim siabram i kaža, što toj trapiŭ u balnicu vielmi chutka paśla pierajezdu ŭ Polšču. Rachunak za miedycynskija pasłuhi nibyta byŭ kaśmičny, bo strachoŭki Arciom nie mieŭ, tamu jamu vyrašyli adkryć zbor.

Taŭstyka na toj čas nie mieŭ polskaj kartki, tamu, kaža Dźmitryj, jon daŭ jamu svaje danyja. Hrošy sa zboru pieravodzili na kartku Dźmitryja, a toj potym pieravodziŭ siabru hrošy praz Paysend. 

Ale adkul tady ŭziaŭsia zbor na siastru Arcioma? Dźmitryj kaža, što hety zbor na siastru — nastupny, a zbor na lekavańnie samoha Arcioma byŭ pieršym. Jość niepaćvierdžanyja źviestki, što zbor na siastru źjaviŭsia ŭ siecivie jašče šmat miesiacaŭ tamu, i Kazanovič śćviardžaje, što heta dla jaho novaja infarmacyja — maŭlaŭ, jon vieryŭ siabru na słova.

My pasprabavali źviazacca i z samim Arciomam Taŭstykam, ale mužčyna pakinuŭ našy paviedamleńni niepračytanymi.

• 1
• 0
• 3
• 4
• 0
• 1
• 6
• 0