Alepa za try dni? Siryjskija paŭstancy ŭvajšli ŭ najbujniejšy horad Siryi. Erdahan iznoŭ usadziŭ jatahan u śpinu Pucina

Za dyktaturaj Bašara Asada staić Maskva. Siryjskich paŭstancaŭ padtrymlivajuć Turcyja i niekatoryja arabskija krainy. Na hetym tydni paŭstancy pačali niečakany i maštabny nastup na paŭnočnym zachadzie Siryi.

Jany ŭziali pad kantrol da 100 nasielenych punktaŭ i sotni kvadratnych kiłamietraŭ terytoryi ŭ pravincyjach Alepa i Idlib. Taksama jany ŭziali ŭ pałon niamała bajcoŭ siryjskaj uradavaj armii, śćviardžajuć surazmoŭcy Anadolu.

U sieradu 25 listapada jany prarvali liniju frontu i na chutkachodnych mašynach uklinilisia hłyboka ŭ tył rasijska-asadaŭskim siłam. U čaćvier jany pierarezali aŭtamahistral, jakaja źviazvaje dvuchmiljonny horad Alepa sa stalicaj, Damaskam. A siońnia, u piatnicu, jany ŭvajšli ŭ sam horad.

Kanał «Rybaŕ», blizki da HRU Minabarony Rasii, paviedamlaje, što bai iduć u vakolicach Vajskovaj akademii imia Asada i kvartałaŭ vakoł jaje. Paŭstancy biez asablivaha supracivu dasiahnuli taksama rajona mižnarodnaha stadyjona Alepa. Pakul niama śviedčańniaŭ čynnaha supracivu z boku ŭradavych vojskaŭ, praŭradava nastrojenyja žychary pakidajuć horad i jaho vakolicy. Paŭstancy zajaŭlajuć pra zachop imi 31 tanka, 20 BMP, 3 samachodnych haŭbic. Navat kali hetyja ličby pierabolšanyja, trafiei ŭ ich sapraŭdy jość.

Kanał Nierybaŕ sihnalizuje, što za noč paŭstancy ŭmacavali svaje pazicyi ŭ kvartale Vajskovaha daśledčaha centra na ŭskrajku Alepa i praviali vyłazki ŭ susiednija mikrarajony. 

U Siecivie źjavilisia videa, źniatyja paŭstancami ŭnutry horada.

Rakietnyja ŭdary byli naniesieny pa rajonach Chamdanija i Novy Alepa.

Videa z bajevikami, jakija, jak śćviardžajecca, źjavilisia na vulicach horada, publikuje manitorynhavy akaŭnt Status 6 u sacsietcy X.

Syrian rebels are on the streets of the city of Aleppo. pic.twitter.com/FClCAPjoJY

— Status-6 (Military & Conflict News) (BlueSky too) (@Archer83Able) November 29, 2024

U toj ža čas pradstaŭnik rasijskaha centra prymireńnia bakoŭ u Siryi Aleh Ihnasiuk paviedamiŭ, što vajskoŭcy ŭradavaj armii pry padtrymcy rasijskaj avijacyi atakavali pazicyi hrupoŭki. Śćviardžajecca, što nibyta zahinuli 400 paŭstancaŭ.

Režym Asada padtrymlivajuć taksama Iran i livanskaja radykalnaja hrupoŭka «Chiezbała». Adnak paśpiachovaja pejdžynhavaja apieracyja dy inšyja ŭdary Izraila pa «Chiezbale» źnizili jaje bajazdolnaść. U pryvatnaści, paviedamlajecca pra hibiel iranskaha hienierała, jaki kamandavaŭ dziejnaściu šyickaha apałčeńnia kala Alepa.

Na tle nastupleńnia isłamistaŭ u Siryi ŚMI paviedamili pra vizit Bašara Asada ŭ Maskvu dla sustrečy z prezidentam Rasii Uładzimiram Pucinym. Aficyjna pra pajezdku siryjskaha prezidenta pakul nie paviedamlajecca.

Prezident Turcyi Redžep Taip Erdahan iznoŭ zarekamiendavaŭ siabie jak tonki hulec. U 2020 hodzie jon vykarystaŭ słabaść Rasii i jaje źviazanaść u Siryi, kab dapamahčy Azierbajdžanu adnavić kantrol nad Nahornym Karabacham. Ciapier pratureckija siły nanieśli ŭdar u Siryi ŭ momant, kali Maskva pieradysłakavała ŭsie najlepšyja siły na ŭkrainski front. Pry hetym jon praciahvaje zachoŭvać pryvilejavanyja adnosiny z Uładzimiram Pucinym, a ŭzamien za niedałučeńnie da zachodnich sankcyj suprać Rasii atrymlivaje haz pa vyhadnych cenach. Źviartaje ŭvahu, što start apieracyi pad Alepa dali ŭ dzień samita Arhanizacyi damovy pra kalektyŭnuju biaśpieku ŭ Astanie — u situacyi kali Ankara i Maskva zmahajucca za ŭpłyŭ u ciurkamoŭnych krainach Centralnaj Azii: Kazachstanie, Uźbiekistanie, Kyrhyzstanie i Turkmienistanie.

Nie vyklučana, što Rasii daviadziecca źniać častku siłaŭ z ukrainskaha frontu, kab stabilizavać situacyju na poŭnačy Siryi.

• 53
• 0
• 5
• 1
• 2
• 0
• 0
• 0