Hrodzienskim studentam na ekskursii ŭ turmie raskazali pra «samyja kamfartabielnyja ŭmovy»
Studentaŭ piedyjatryčnaha fakulteta HrDMU adpravili na ekskursiju ŭ hrodzienskuju turmu z metaj «prafiłaktyki pravaparušeńniaŭ». Turma ličycca samaj strohaj u Biełarusi. Studentam raskazali pra historyju ŭstanovy, a taksama pahruzili ŭ niuansy turemnaha pobytu, piša Hrodna.life.
«Kamfort» zabiaśpiečvajuć dvuchhadzinnaj prahułkaj i kamieraj na čaćviarych
Padčas ekskursii navučencam Hrodzienskaha dziaržaŭnaha miedycynskaha ŭniviersiteta raskazali pra asablivaści žyćcia ŭ turmie. Naprykład, na praciahu dnia źniavolenym naležyć dvuchhadzinnaja prahułka. «Adnak faktyčna jana adbyvajecca na praciahu hadziny», — adznačajuć na sajcie HrDMU.
Kazali studentam i pra «samyja kamfartabielnyja ŭmovy» — pad imi majecca na ŭvazie 4-miascovaja kamiera. Astatnija kamiery turmy raźličany na 7−8 čałaviek.
Źniavolenyja ŭ hrodzienskaj turmie pracujuć pa 8 hadzin za dzień.
Što jašče studenty daviedalisia na ekskursii
Napaŭnialnaść turmy — 2 tysiačy čałaviek. Padjom źniavolenych — u 6 ranicy. Užo praz 10 chvilin — śniadanak. Paśla hetaha źniavolenyja adpraŭlajucca na abaviazkovyja pracy. Abied u 12 hadzin, paśla — iznoŭ adpraŭka na pracy. U 18 hadzin viačera.
Niama posudu, kamiery pierapoŭnieny, a na prahułcy «nie razharnucca»
U razmovie z Hrodna.life były palitźniavoleny Illa ŭ 2021 hodzie raskazvaŭ pra ŭmovy ŭtrymańnia ŭ hrodzienskaj turmie. Pa słovach mužčyny, realny pobyt adroźnivajecca ad taho, jakim jaho malujuć naviedvalnikam ekskursij.
Naprykład, u kamierach nie było posudu i stałovych pryboraŭ — novaprybyłym vydajuć tolki matrac, koŭdru, dźvie praściny, navałačku i žaleznuju kružku. Pry hetym u kamierach znachodziłasia ad 8 da 12 čałaviek — heta ŭ 1,5 razy bolš, čym treba.
Prahułki byli štodzionnymi — zvyčajna źniavolenych vyvodzili ranicaj na adnu hadzinu ŭ dvoryk. Ale ruchacca tam było składana, asabliva kali prahułka prachodziła ŭ maleńkim dvoryku 2,5 na 6 mietraŭ. «Tam 12 čałaviekam nie razhulacca, ciesna», — raskazvaŭ Illa.
Kamientary