Sotni ludziej vyjšli pratestavać, niahledziačy na choład i śnieh, piša Radyjo Svaboda.
Vybary prachodziać u budynku parłamienta ŭ Tbilisi. Ich pravodziać pa novaj sistemie — nie ahulnanacyjanalnym hałasavańniem, a praz kalehiju vybarščykaŭ, bolšaść u jakoj naležyć kiroŭnaj «Hruzinskaj mary».
U kalehiju ŭvachodziać 300 členaŭ: usie 150 deputataŭ parłamienta, deputaty Viarchoŭnych Savietaŭ Adžaryi i Abchazii — 21 i 20 adpaviedna, i 109 delehataŭ ad municypalnych savietaŭ. Hałasavańnie zavieršycca a 14:00 pa miascovym časie.
U «Hruzinskaj mary» 211 vybarščykaŭ, abo 70,3%. Hetaha dastatkova jak dla praviadzieńnia hałasavańnia, tak i dla abrańnia prezidenta.
Čatyry apazicyjnyja partyi, jakija prajšli pa vynikach vybaraŭ u parłamient, ale admovilisia ad mandataŭ, bajkatujuć pasiadžeńnie vybarščykaŭ. Jany zajavili, što nie pryznajuć prezidenta, za jakoha prahałasuje kalehija.
Kandydat na vybarach adzin. «Hruzinskaja mara» vyłučyła na hetuju pasadu byłoha futbalista Michaiła Kaviełašvili.
Budučy deputatam parłamienta troch sklikańniaŭ, jon nieadnarazova vystupaŭ z antyzachodniaj rytorykaj. U pryvatnaści, Kaviełašvili kazaŭ, što ŭ ZŠA i Jeŭrasajuzie dziejničaje niejkaja «hłabalnaja partyja vajny», jakaja sprabuje adkryć u Hruzii Druhi front i ŭciahnuć krainu ŭ novuju vajnu z Rasijaj. Ciapier Kaviełašvili 53 hady, źviestak pra jaho adukacyju niama.
Na pasadu prezidenta krainy ŭpieršyniu vyłučyŭsia kandydat biez vyšejšaj adukacyi.
Pierad budynkam parłamienta prachodzić akcyja pratestu «Pakažy dypłom!», na prajeznaj častcy hulajuć u futboł.
Pakul ludziej sabrałasia niašmat, pra sutyknieńni z palicyjaj nie paviedamlałasia. Palicyja i vadamioty stajać na płoščy Svabody. U stalicy Hruzii minusavaja tempieratura, prajšoŭ pieršy śnieh.
Inaŭhuracyja novaha prezidenta pavinna adbycca 29 śniežnia — terminam na piać hadoŭ. Ciapierašniaja kiraŭnica Hruzii Sałame Zurabišvili, čyje paŭnamoctvy minajuć 16 śniežnia, nazvała vybary nielehitymnymi i admoviłasia pakidać pasadu. Siońnia, 14 śniežnia, jana taksama vyjšła na pratest u Tbilisi.
Kamientary