Na stancyi «Kastryčnickaja» ŭ hadzinu pik, a 17.54, adbyŭsia vybuch. Nie mienš za 12 čałaviek zahinuła, 150 paraniena.
Na stancyi «Kastryčnickaja» ŭ hadzinu pik, a 17.54, adbyŭsia vybuch. Nie mienš za 12 čałaviek zahinuła, 150 paraniena.
U vyniku vybuchu ŭ minskim mietro zahinuli jak minimum 12 čałaviek, paviedamlajuć krynicy ŭ pravaachoŭnych orhanach. Traŭmy roznaj stupieni ciažkaści atrymali nie mienš za 150 asobaŭ. Traŭmy paciarpiełych — u asnoŭnym apioki i paškodžańnie nižnich kaniečnaściaŭ — śviedčać ab vybuchu mahutnaj siły. Vybuchovaja chvala dalacieła da susiednich stancyj mietro. A ŭ viestybiuli «Kastryčnickaj» sarvała blašanyja padviasnyja stoli. 22 paranienyja, pieravažna z adarvanymi kaniečnaściami, znachodziacca ŭ ciažkim stanie ŭ reanimacyi Balnicy chutkaj dapamohi i inšych staličnych špitalaŭ.
Udakładnienyja śpisy paciarpiełych, a taksama infarmacyju pra patreby ŭ kryvi dla paranienych šukajcie ŭ inšych artykułach na sajcie «Našaj Nivy».
Vybuch adbyŭsia na stancyi mietro «Kastryčnickaja». Heta ŭsiaho za paru socień mietraŭ ad rezidencyi prezidenta Biełarusi. Abiedźvie linii mietro zastajucca zakrytaj dla ruchu. U centry Minska niekalki hadzin panavaŭ transpartny chaos.
A 20.15 na miesca zdareńnia prybyŭ Alaksandr Łukašenka, jaki zajaviŭ, paviedamlaje ahienctva «Interfaks», što «ŭziaŭ situacyju ŭ Minsku pad asabisty kantrol». Heta adbyłosia paśla ekstranaj narady ź jahonym udziełam. Na miesca trahiedyi jon pryjechaŭ sa svaim maleńkim synam Kolem.
Kaardynataram hrupy pa rasśledavańni vybuchu pryznačany namieśnik hienieralnaha prakurora Švied — asoba, jakuju nazyvali čałaviekam Viktara Łukašenki ŭ hienprakuratury.
«Kryć niama čym. U hetym vinavaty tolki my», — pryznaŭ Alaksandr Łukašenka.
«Biez vas nam ciažka budzie znajści hetych urodaŭ. Nam treba budzie vaša dapamoha», — źviarnuŭsia jon da hramadzianaŭ.
«Praanalizujcie, kamu nie padabałasia stabilnaść», — zapatrabavaŭ Łukašenka ad siłavikoŭ. Jahony hołas nie vydavaŭ emocyj, u jahonaj mimicy i žestykulacyi nie było niervoznaści.
«Mužyki, nam kinuty surjozny vyklik, patrebny adekvatny adkaz i jon pavinien być znojdzieny», — zajaviŭ Łukašenka.
«Ja vas papiaredžvaŭ, što nam spakojnaha žyćcia nie daduć. Chto jany? I z adkazam na hetaje pytańnie prašu paśpiašacca», — padkreśliŭ Łukašenka.
Jon zahadaŭ pryniać dapamohu Rasii ŭ rasśledavańni terakta i ŭ akazańni dapamohi paciarpiełym.
Łukašenka daŭ zahad abvieścić dzień žałoby ŭ Minsku.
Kamientatar ANT Michalčanka amal adrazu paśla vybuchu ŭskłaŭ vinu za zdareńnie na vorahaŭ stabilnaści, jakija apanavanyja svaimi idejami.
Za anałahičnym teraktam 3 lipienia 2008 hoda išła chvala aryštaŭ i pieratrusaŭ, jakaja ŭdaryła najpierš pa palityčnych praciŭnikach Alaksandra Łukašenki. Vinavatych tak i nie znajšli, ale prahnali ŭsio darosłaje nasielnictva praz daktyłaskapiju.
Achviary vybuchu ŭ minskim mietro. Aściarožna: šakujučyja foty:
Śviedčańni paciarpiełych ad vybuchu na «Kastryčnickaj». Repartaž Biełsata:
Repartaž STV:
Vybuch na «Kastryčnickaj». Videa LifeNews:
Pieršymi nam pra vybuch paviedamili čytačy. Na momant pryjezdu na płošču reparcioraŭ, z padziemnych pierachodaŭ išoŭ dym. Na Płoščy stajaŭ pach harełaha. Mašyny chutkaj dapamohi stajali pa ŭsioj daŭžyni Płoščy. Ludzi vychodziać z padziemnych pierachodaŭ, jaki viaduć u mietro, niekatorych paciarpiełych vynosiać. Mnohija ludzi skryvaŭlenyja, abpalenyja. Takuju karcinu nazirali reparciory «Našaj Nivy».
Vybuch adbyŭsia na stancyi «Kastryčnickaja», z boku HUMa.
Da miesca zdareńnia nieŭzabavie źjechalisia dziasiatki mašyn pažarnych, chutkaj dapamohi i milicyi.
Paranienych vynosili i vyvodzili z roznych vychadaŭ sa stancyi «Kastryčnickaja». Paranienych byli dziasiatki.
Reparciory «Našaj Nivy», jakija prybyli na Płošču praź niekalki chvilin paśla zdareńnia, bačyli, jak z padziemnaha pierachodu vybiahajuć šakavanyja ludzi. Vopratka niekatorych ź ich absypanaja tynkoŭkaj. Pavodle ich słovaŭ, na stancyi niešta hučna vybuchnuła.
Ruch pa praśpiekcie Niezaležnaści dla aŭtamabilaŭ byŭ pierakryty prykładna na hadzinu. Piešachodaŭ z Płoščy nieŭzabavie adciaśniŭ śpiecnaz.
Vidavočcy kazali pra šmatlikija achviary.
Chłopiec, jaki vyjšaŭ sa stancyi, paviedamiŭ reparcioru «Našaj Nivy», što bačyŭ ludziej z adarvanymi nahami. Žurnalistka «Našaj Nivy» bačyła, jak da chutkaj dapamohi vynieśli žančynu z adarvanaj stupnioj.
Na vychadach ź mietro ŭ bok HUMa i ŭ bok Doma aficeraŭ siadzieli i lažali paranienyja. Niekatoryja biez prytomnaści, ź vielmi ciažkimi ranieńniami. Ludzi na vulicy dapamahali daktaram akazvać im dapamohu.
U cełym panavała vydatnaja arhanizavanaść. Miedyki i pažarniki dziejničali ŭ daskanałym paradku. Ludzi na vulicach prajaŭlali salidarnaść, pavodzili siabie razumna.
Nieŭzabavie milicyjanty ačapili chutkija, kab zabiaśpiečyć umovy dla pracy daktaroŭ.
Bolšaja častka paciarpiełych znachodziłasia z boku HUMa.
Trupy lažali na tratuarach, nakrytyja cełafanam i materyjaj.
«Ja stajaŭ na siaredzinie pierona „Kastryčnickaj“, bližej da kirunku na Uručča, — raskazaŭ „Našaj Nivie“ vidavočca. — Ciahnik užo prajšoŭ, ja na jaho nie paśpieŭ. Vybuch adbyŭsia ŭ procilehłym baku stancyi, z boku HUMa. Adrazu ŭźniałosia šmat pyłu, ludzi zakryčali. Bačyŭ akryvaŭlenych».
Alaksandr Łukašenka sabraŭ ekstranuju naradu z nahody zdareńnia. Łukašenkaŭskija ŚMI paviedamlajuć, što im dadziena daručeńnie pra ŭzmacnieńnie mieraŭ biaśpieki. Na naradzie Łukašenka daŭ zadańnie siłavikam pravieryć usie składy, dzie zachoŭvajecca vybuchoŭka, a taksama pravieści ŭsie nieabchodnyja pravierki. Niekatoryja naziralniki miarkujuć, što zaraz moža adbycca čarhovaja chvala pieratrusaŭ u aktyvistaŭ apazicyi i aryštaŭ palityčnych praciŭnikaŭ Łukašenki, jak toje było paśla vybuchu 3 lipienia 2008 hoda.
Sačycie za infarmacyjaj praz «Našu Nivu».
Papularny tyktokier z Rasii tusić u darahich restaranach Minska: «Byccam bamžu padali. Žarycie, na zdaroŭje»29
Kamientary